Crackdown on Crime: કલોલ તાલુકાના દંતાલી ગામની સીમમાં સાંતેજ પોલીસે એક મોટા ગેરકાયદે ગેસ રિફિલિંગ રેકેટનો પર્દાફાશ કર્યો છે. વહીવટી તંત્ર અને સુરક્ષા ધોરણોને નેવે મૂકીને ચલાવવામાં આવી રહેલી આ જોખમી ફેક્ટરી પર દરોડો પાડી પોલીસે લાખો રૂપિયાનો મુદ્દામાલ જપ્ત કરી કાયદેસરની કાર્યવાહી હાથ ધરી છે.
- સ્થળ: ચેહર ફાર્મ, દંતાલી ગામની સીમ, સાંતેજ પોલીસ સ્ટેશન હદ વિસ્તાર (કલોલ ડિવિઝન).
- જપ્ત કરાયેલ મુદ્દામાલ: કુલ રૂ. 12.83 લાખથી વધુની કિંમતનો મુદ્દામાલ, જેમાં 258 ગેસ સિલિન્ડર, એક આઇશર ટેમ્પો, એક પીકઅપ ડાલુ, બે ઇલેક્ટ્રિક મોટર પંપ અને હીટિંગ ગનનો સમાવેશ થાય છે.
- અધિકારીઓની ઉપસ્થિતિ: પુરવઠા અધિકારી અને તોલમાપ વિભાગના અધિકારીઓની ખાસ ઉપસ્થિતિમાં આ રેડ અને કાર્યવાહી કરવામાં આવી હતી.
Crackdown on Crime: કઈ રીતે ચાલતું હતું કૌભાંડ?
પોલીસ તપાસમાં સામે આવ્યું છે કે દંતાલી ગામની સીમમાં આવેલા ચેહર ફાર્મ પરના એક શેડમાં કોઈપણ પ્રકારની મંજૂરી કે સુરક્ષા વ્યવસ્થા વિના ગેરકાયદે ગેસ રિફિલિંગનું કામ ધમધમી રહ્યું હતું.
- આ ગેંગ અલગ-અલગ વ્યાપારી અને ઘરેલુ કંપનીના 19 કિલો તથા 14.2 કિલોના મોટા એલપીજી સિલિન્ડરમાંથી ગેસ ખેંચીને તેને નાના 5 કિલોના સિલિન્ડરમાં ગેરકાયદેસર રીતે ટ્રાન્સફર કરતી હતી.
- ગેસ ભરાયા બાદ ગ્રાહકોને છેતરવા માટે નાના સિલિન્ડર પર ડુપ્લિકેટ સીલ અને કેપ લગાવી દેવામાં આવતી હતી અને ત્યારબાદ તેને બજારમાં વેચાણ અર્થે મોકલી આપવામાં આવતા હતા.
Crackdown on Crime: ટળી મોટી દુર્ઘટના
આ ફેક્ટરી જે વિસ્તારમાં ધમધમી રહી હતી તે ખેતી અને રહેણાંક વિસ્તારની નજીક હતો. વળી, કોઈપણ પ્રકારના ફાયર સેફટી કે સાવચેતીના સાધનો વગર અત્યંત જોખમી રીતે ગેસ ટ્રાન્સફર કરવામાં આવતો હોવાથી ગમે ત્યારે મોટી આગ કે વિસ્ફોટ થવાની સંભાવના હતી. સાંતેજ પોલીસની સમયસરની સચોટ બાતમી અને દરોડાના કારણે વિસ્તારમાં એક મોટી સંભવિત હોનારત ટળી ગઈ હોવાનો હાશકારો અનુભવાઈ રહ્યો છે.
Crackdown on Crime: પોલીસનું નિવેદન
ઘટના અંગે વધુ માહિતી આપતા કલોલ ડિવિઝનના ડીવાયએસપી આર.એમ. સરોદે દ્વારા સમગ્ર પ્રકરણ પર નજર રાખવામાં આવી રહી છે. હાલ સાંતેજ પોલીસે ગુનો નોંધીને ઝડપાયેલા આરોપીઓની સઘન પૂછપરછ શરૂ કરી છે અને આ રેકેટના મુખ્ય સૂત્રધાર તથા તેમાં સંડોવાયેલા અન્ય શખ્સો સુધી પહોંચવા માટે વધુ તપાસ હાથ ધરી છે.
વધુ સમાચાર વાંચવા માટે અંહી ક્લિક કરો: ૧૫ ઓગસ્ટ ૧૯૪૭: આઝાદીની પહેલી સવારે કેવું હતું અમદાવાદ?
