Chotila Highway Horror: રાજકોટ-ચોટીલા નેશનલ હાઈવે પર સાંગાણી ગામ પાસે મોડી રાત્રે એક ભયાનક અકસ્માત સર્જાયો હતો. ડામર ભરેલા ટેન્કર અને ખાનગી લક્ઝરી બસ વચ્ચે થયેલી ભીષણ ટક્કર બાદ લાગેલી આગમાં 4 મુસાફરો ભડથું થઈ ગયા છે, જ્યારે 10થી વધુ લોકો ઈજાગ્રસ્ત થયા છે.
Chotila Highway Horror: કેવી રીતે સર્જાયો અકસ્માત?
પ્રાપ્ત વિગતો મુજબ, રાત્રે આશરે 1:30 વાગ્યાના સુમારે હાઈવે પર જઈ રહેલા ડામર ભરેલા ટેન્કરનું ટાયર ફાટતા તેની ગતિ ધીમી પડી હતી. આ દરમિયાન પાછળથી પૂરઝડપે આવી રહેલી ખાનગી ટ્રાવેલ્સની બસ ટેન્કર સાથે ધડાકાભેર અથડાઈ હતી. અથડામણ એટલી જોરદાર હતી કે બસમાં તાત્કાલિક શોર્ટ સર્કિટ થયું અને જોતજોતામાં આખી બસ આગની લપેટમાં આવી ગઈ હતી.
Chotila Highway Horror: જીવ બચાવવા ગરમ ડામરમાં કૂદ્યા મુસાફરો
આગ લાગતા જ બસમાં ચીસાચીસ મચી ગઈ હતી. જીવ બચાવવા માટે મુસાફરોએ બારીના કાચ તોડીને નીચે કૂદકા માર્યા હતા. કમનસીબી એ હતી કે ટેન્કરમાંથી ઢોળાયેલો ગરમ ડામર નીચે રસ્તા પર ફેલાયેલો હતો, જેના કારણે કૂદનારા મુસાફરો ગરમ ડામર પર પડતા ગંભીર રીતે દાઝ્યા હતા અને કેટલાકને ફ્રેક્ચર જેવી ઈજાઓ થઈ હતી.
Chotila Highway Horror: DNA ટેસ્ટથી જ ઓળખ શક્ય
આ ભીષણ આગમાં 4 મુસાફરો એવી રીતે સળગી ગયા છે કે તેમની ઓળખ કરવી અશક્ય બની છે. વહીવટી તંત્રના જણાવ્યા અનુસાર, હવે DNA ટેસ્ટ દ્વારા જ મૃતકોની ઓળખ કરી શકાશે.
BSF જવાનની બહાદુરી
આ અકસ્માતમાં રજા પર આવેલા અને મુસાફરી કરી રહેલા BSF જવાન નરેન્દ્રભાઈ રાઠોડે અદમ્ય સાહસ બતાવ્યું હતું. પોતે દાઝ્યા હોવા છતાં તેમણે બારીનો કાચ તોડીને અન્ય મુસાફરોને બહાર કાઢવામાં મદદ કરી અને અનેક લોકોના જીવ બચાવ્યા હતા.
મુખ્ય ઈજાગ્રસ્તોની યાદી:
- વિધિ પટોડીયા (18 વર્ષ): મેંદરડા, જૂનાગઢ
- નરેન્દ્ર રાઠોડ (50 વર્ષ): લીંબડી, સુરેન્દ્રનગર (BSF જવાન)
- નાગરાજ રાણા (30 વર્ષ): તાલાલા, ગીર સોમનાથ
તંત્રની કામગીરી: ઘટનાની જાણ થતા જ ફાયર ફાઈટર અને સ્થાનિક પોલીસ કાફલો ઘટનાસ્થળે પહોંચી ગયો હતો. ઈજાગ્રસ્તોને તાત્કાલિક ચોટીલા અને ત્યારબાદ વધુ સારવાર માટે રાજકોટ સિવિલ હોસ્પિટલ ખસેડવામાં આવ્યા છે.
હાઈવે સુરક્ષા પર સવાલ
સ્થાનિકો અને પ્રત્યક્ષદર્શીઓના જણાવ્યા મુજબ, હાઈવે પર બંધ પડેલા વાહનો પાછળ રેડિયમ પટ્ટી ન હોવાને કારણે રાત્રિના સમયે આવા અકસ્માતો સર્જાય છે. તંત્ર દ્વારા આ બાબતે કડક કાર્યવાહી કરવામાં આવે તેવી માંગ ઉઠી છે.
વધુ સમાચાર વાંચવા માટે અંહી ક્લિક કરો: અમૂલ દૂધના ભાવમાં લિટરે ₹2નો વધારો, આવતીકાલથી નવા ભાવ લાગુ
