Cervical Cancer Mission: ગુજરાત સરકાર દ્વારા સર્વાઇકલ કેન્સર (ગર્ભાશયના મુખનું કેન્સર) મુક્ત રાજ્ય બનાવવાના સંકલ્પ સાથે શરૂ કરવામાં આવેલા રસીકરણ અભિયાનમાં રાજ્યએ એક મહત્વપૂર્ણ પડાવ પાર કર્યો છે. અત્યાર સુધીમાં રાજ્યની 5,14,566 દીકરીઓને હ્યુમન પેપિલોમા વાયરસ (HPV) વેક્સિનનો પ્રથમ ડોઝ આપી સુરક્ષિત કરવામાં આવી છે. જોકે, આ આંકડાઓમાં એક ચોંકાવનારી વિગત એ સામે આવી છે કે અમદાવાદ સ્માર્ટ સિટી રસીકરણની ઝડપમાં દાહોદ જેવા જિલ્લાઓ કરતા પણ પાછળ ત્રીજા ક્રમે છે.
Cervical Cancer Mission: રસીકરણ અભિયાનની મુખ્ય વિગતો:
- કુલ લક્ષ્યાંક: રાજ્યમાં 14 વર્ષ પૂર્ણ કરનાર કુલ 5,62,324 પાત્ર દીકરીઓમાંથી અત્યાર સુધીમાં 5 લાખથી વધુ દીકરીઓને આવરી લેવામાં આવી છે.
- અમદાવાદની નબળી કામગીરી: અમદાવાદ કોર્પોરેશન વિસ્તારમાં 48,443 પાત્ર દીકરીઓ છે, જેની સામે માત્ર 22,813 (47%) દીકરીઓનું જ રસીકરણ થયું છે, જે ચિંતાનો વિષય છે.
- મફત સુરક્ષા કવચ: બજારમાં આ વેક્સિનના એક ડોઝની કિંમત અંદાજે ₹3,000 હોય છે. પરંતુ સામાન્ય પરિવારો પર આર્થિક બોજ ન પડે તે માટે સરકારે ₹150 કરોડના બજેટ સાથે આ રસી તદ્દન વિનામૂલ્યે ઉપલબ્ધ કરાવી છે.
- રસી ક્યાં મળશે?: રાજ્યની તમામ સરકારી મેડિકલ કોલેજો, જિલ્લા અને સબ ડિસ્ટ્રિક્ટ હોસ્પિટલો તેમજ તમામ CHC અને PHC સેન્ટરો પર આ રસી ઉપલબ્ધ છે.
Cervical Cancer Mission: આરોગ્ય મંત્રીનો વાલીઓને અનુરોધ:
આરોગ્ય મંત્રીએ અભિયાનની સમીક્ષા કરતા સ્પષ્ટ કર્યું છે કે આ રસી સંપૂર્ણપણે સુરક્ષિત છે અને અત્યાર સુધી લાખો ડોઝ આપવા છતાં ગંભીર આડઅસરનો એક પણ કિસ્સો નોંધાયો નથી. તેમણે વાલીઓને અપીલ કરી છે કે કોઈપણ ડર રાખ્યા વગર 14 વર્ષની તમામ દીકરીઓને આ રસી અપાવીને કેન્સર સામે રક્ષણ અપાવવું જોઈએ.
વધુ સમાચાર વાંચવા માટે અંહી ક્લિક કરો
