Caught Red-Handed: ભાવનગરમાંથી અંધશ્રદ્ધા અને ગેરમાન્યતાનો એક ચોંકાવનારો કિસ્સો સામે આવ્યો છે. વાઈ (એપિલેપ્સી)ની બીમારી કાચબો ખાવાથી મટી જાય છે, તેવી ખોટી માન્યતાના આધારે ભાવનગર એરપોર્ટ પરિસરમાંથી બે કાચબાનો શિકાર કરનારા ચાર પરપ્રાંતીય શ્રમિકોને વન વિભાગે રંગેહાથ ઝડપી લીધા છે. વન વિભાગની ટીમે દરોડો પાડીને એક જીવતો કાચબો બચાવી લીધો છે, જ્યારે કાયદેસરની કડક કાર્યવાહી હાથ ધરી છે.
Caught Red-Handed: બીમારી મટાડવાના બહાને કર્યો શિકાર
ભાવનગર એરપોર્ટ પર છેલ્લા કેટલાક સમયથી કન્સ્ટ્રક્શન પ્રોજેક્ટનું કામ ચાલી રહ્યું છે, જેમાં બિહારના કેટલાક મજૂરો કામ કરે છે. આ પૈકીનો એક શ્રમિક વાઈની બીમારીથી પીડાતો હતો. તેને કોઈએ ભ્રમમાં નાખ્યો હતો કે કાચબો ખાવાથી આ બીમારી મટી જાય છે. આ અંધશ્રદ્ધામાં આવીને મજૂરોએ બે કાચબા પકડ્યા હતા. તેમાંથી એક કાચબાને મારીને તેનું માંસ રાંધીને ખાય તે પહેલા જ વન વિભાગની ટીમ ત્રાટકી હતી.
Caught Red-Handed: FSL અને વેટરનરી ટીમની હાજરીમાં તપાસ
રેન્જ ફોરેસ્ટ ઓફિસર બી.જી. ગલાણીના જણાવ્યા અનુસાર, વન વિભાગને એરપોર્ટ વિસ્તારમાં વન્યજીવનો શિકાર થતો હોવાની ચોક્કસ બાતમી મળી હતી. જેના આધારે વન સ્ટાફે તાત્કાલિક દરોડો પાડ્યો હતો. તપાસ દરમિયાન સ્થળ પરથી એક જીવતો અને એક રાંધેલો કાચબો મળી આવતા વન વિભાગે તાત્કાલિક FSL ટીમ, ફોરેસ્ટ વેટરનરી ઓફિસર અને સરકારી પંચોની હાજરીમાં મુદ્દામાલ કબજે કર્યો હતો.
Caught Red-Handed: બિહારના ૪ શ્રમિકો સામે ગુનો નોંધાયો
વન વિભાગે આ ગુનામાં સામેલ મુખ્ય આરોપી અને મદદગારી કરનારા અન્ય ત્રણ શ્રમિકોની ધરપકડ કરી છે. પકડાયેલા આરોપીઓની ઓળખ: ૧. રવિન પાસવાન ૨. રામ પુકાર પાસવાન ૩. આનંદકુમાર મહંતો ૪. વિજયકુમાર મહંતો તરીકે થઈ છે.
આ તમામ આરોપીઓ વિરૂદ્ધ ‘વન્ય પ્રાણી સંરક્ષણ અધિનિયમ ૧૯૭૨’ (સુધારા અધિનિયમ ૨૦૨૨) ની વિવિધ કડક કલમો હેઠળ ગુનો નોંધી તેમને ભાવનગરની નામદાર કોર્ટમાં રજૂ કરવામાં આવ્યા છે. વન વિભાગે આ કેસની ઊંડાણપૂર્વક તપાસ માટે આરોપીઓના ૩ દિવસના રિમાન્ડની માંગણી કરી છે.
Caught Red-Handed: અંધશ્રદ્ધામાં ન આવવા વન વિભાગની અપીલ
આ ઘટના બાદ વન વિભાગે જાહેર જનતાને કડક અપીલ કરી છે કે કોઈપણ નાગરિકે આવી અંધશ્રદ્ધા કે તબીબી આધાર વગરની ખોટી વાતોમાં દોરવાવું નહીં. વન્ય જીવોનો શિકાર કરવો કે તેમને નુકસાન પહોંચાડવું એ કાયદાકીય રીતે ગંભીર અને બિન-જામીનપાત્ર ગુનો છે. જો ક્યાંય પણ વન્યજીવ જોવા મળે તો તરત જ વન વિભાગનો સંપર્ક કરવો.
વધુ સમાચાર વાંચવા માટે અંહી ક્લિક કરો
