Ahmedabad: ‘તમે ટ્રાફિક નિયમ તોડ્યો છે’ ઈ-ચલણના નામે છેતરપિંડીથી ચેતજો!

June 30, 2025

Ahmedabad: ઈ-ચલણ સ્કેમથી સતર્ક રહો,નકલી લિન્ક પરથી થાય છે બેન્ક એકાઉન્ટ ખાલી

ઓનલાઈન ચિટિંગ કરતાં ગઠિયાઓ જૂની-નવી પઘ્ધતિઓ અપનાવીને સતત સક્રિય રહે છે.બે વર્ષ અગાઉ અઢળક લોકોને ટ્રાફિક નિયમ તોડવામાં આવ્યો છે તેવી નોટિસ મોકલીને દંડ ભરવા માટે લિન્ક મોકલવામાં આવતી હતી.છેલ્લા થોડા સમયથી ફરી વખત ટ્રાફિક નિયમભંગ કર્યાની નોટિસ સાથે લિન્ક મોકલાય છે.આ લિન્કથી ટ્રાફિક પોલીસ કે વાહન પરિવહન વિભાગ જેવી જ નકલી વેબસાઈટ કે એપ્લિકેશન ખુલે તેમાં દર્શાવેલી બેન્ક ખાતાં તેને સંલગ્ન વિગતો લખવામાં આવતાં જ બેન્ક ખાતું હેક કરીને પૈસા સેરવી લેવામાં આવતાં હોવાથી ઘટનાઓ બની રહી છે.નિયમ તોડ્યો ન હોય તો પણ ઈ-ચલણ નોટિસ મોકલીને ઠગાઈ કરતાં સાયબર ગઠિયાઓ સામે સતર્કતા માટે યુ.આર.એલ.ને ઘ્યાનપૂર્વક સમજવા અને ચકાસવા જરૂરી બન્યાં છે.

Ahmedabad:ટ્રાફિક પોલીસ કે પરિવહન વિભાગ જેવી જ નકલી વેબસાઈટ કે એપ્લિકેશનની લિન્ક મોકલી બેન્ક ખાતું હેક કરીને ઠગાઈ

ઈ-ચલણ સ્કેમ અંતર્ગત પહેલાં તો ટેક્સ્ટ મેસેજ કે ઈ-મેઈલ કરીને તમે ટ્રાફિક નિયમનું ઉલ્લંઘન કર્યું છે અને તમારે દંડ ભરવો પડશે તેવી જાણ કરવામાં આવે છે.પોલીસ જેવો લોગો સાથેના આ મેસેજમાં આપેલી લિન્ક ઉપર દંડની રકમ ભરવા માટે તાકીદ કરવામાં આવે છે.આરટીઓ કે ટ્રાફિક પોલીસની ઈ-પરિવહન વેબસાઈટ જેવી જ એપ્લિકેશન હોય તેવી લિન્ક મોકલવામાં આવે છે.આ લિન્ક ઉપર ક્લિક કરતાં જ ઈ-પરિવહન જેવી નકલી એપ્લિકેશન તમારા મોબાઈલ ફોન ઉપર ડાઉનલોડ કરવા જણાવાય છે.

Ahmedabad:નાગરિકોને સતર્ક રહેવા તાકીદ

એપ્લિકેશન ડાઉનલોડ કરવા માટે લિન્ક ઉપર ક્લિક કર્યા પછી તેમાં જન્મતારીખ,પાન કાર્ડ નંબર,આધાર કાર્ડ,ડેબીટ કાર્ડ,ક્રેડીટ કાર્ડ,બેન્ક એકાઉન્ટ વિગતો માગવામાં આવે છે.ઓટીપી,સીસીવી અને એમ પીન મેળવી લઈને પણ છેતરપિંડી કરવામાં આવે છે.આ પ્રકારની લિન્ક આવે તો ઘ્યાનપૂર્વક તેમાં દર્શાવેલા સરકારી વેબસાઈટના સ્પેલિંગને ઘ્યાનપૂર્વક તપાસતાં જ ઠગાઈનો મેસેજ હોવાનું જણાઈ આવે છે.પોલીસ ઉપરાંત બેન્કો પણ નાગરિકોને સતર્ક રહેવા તાકીદ કરે છે કે,આવી લિન્ક ઉપર ક્લિક કરવાથી બેન્ક એકાઉન્ટ હેક કરીને પૈસા ચોરી લેવાય તેવી શક્યતા વધી જાય છે.

કેન્દ્ર સરકારે જાહેર કરી એડવાઇઝરી:

કેન્દ્ર સરકારે સત્તાવાર એડવાઈઝરી જાહેર કરી છે તેમાં જણાવાયું છે કે,ટ્રાફિક ઓથોરિટી તરફથી જ આવ્યા હોય તેવા નકલી મેસેજ કે ઈ-મેઈલ સાથે મોકલાતી લિન્કથી ટ્રાફિક ઓથોરિટી જેવી જ બનાવટી વેબસાઈટ ખુલે છે.અથવા તો સાયબર ગઠિયાઓ બનાવેલી ટ્રાફિક ઓથોરિટી જેવી બનાવટી મોબાઈલ એપ્લિકેશન ખુલે છે.આવી બનાવટી એપ્લિકેશન કે વેબસાઈટથી ઈ-ચલણના નામે તમારી બેન્કની વિગતો જાણીને બેન્ક એકાઉન્ટસમાંથી પૈસા સેરવી લેવામાં આવે છે.

સરકારી વેબસાઈટ ખોલતાં એચટીટીપીએસ લખાણ જોવા મળે છે તે સિક્યોર્ડ હોય છે અને છેતરપિંડીની સંભાવના રહેતી નથી.આથી,ઈ-ચલાણ કે અન્ય કોઈપણ પ્રકારની સરકારી વેબસાઈટ કે એપ્લિકેશનના નામે ઠગાઈનો પ્રયાસ થાય ત્યારે રાૉજથ// લખાણ છે કે કેમ તેની ખરાઈ કરવી જરૂરી છે.સાયબર સુરક્ષા વિભાગના સૂત્રો કહે છે કે,આવી નકલી વેબસાઈટ કે એપ્લિકેશન ઉપર સતત કાર્યવાહી થતી રહે છે.પરંતુ,સમયાંતરે ગઠિયાઓ વાહન નંબરની વિગતો મેળવી લઈને ફરી સક્રિય બને છે તે માટે પ્રજાજનોની સતર્કતા પણ જરૂરી છે.

Ahmedabad:ગુજરાત પોલીસે આપી સલાહ

બીજી તરફ,ગૂગલ સર્ચ ઉપરથી હેલ્પલાઈન નંબરની આદત ઘણાંખરાં લોકોને હોય છે.તાજેતરમાં જ ગુજરાત પોલીસે જાહેર કરેલી એડવાઈઝરીમાં ગૂગલ સર્ચ ઉપર નકલી હેલ્પલાઈન નંબર મુકીને લોકોની છેતરપિંડી કરવામાં આવતી હોવાનું જણાવાયું છે.આ સંજોગોમાં થર્ડ પાર્ટી વેબસાઈટ ઉપર વિશ્વાસ ન કરવા,અજાણી લિન્ક ઉપર ક્લિક નહીં કરવા અને કોઈપણ એપ્લિકેશન ડાઉનલોડ કરતાં પહેલાં પૂરતી ચકાસણી કરવાની સલાહ પણ ગુજરાત પોલીસ દ્વારા આપવામાં આવે છે.ઓનલાઈન સર્ચ દરમિયાન શંકાસ્પદ ગતિવિધી જણાય તો સાયબર હેલ્પલાઈન નંબર 1930 ઉપર સંપર્ક કરવો હિતાવહ છે.