Monsoon Fury in Gujarat: ગુજરાતમાં મેઘરાજાએ સર્વત્ર રૌદ્ર સ્વરૂપ ધારણ કર્યું છે, ખાસ કરીને દક્ષિણ ગુજરાતમાં મેઘતાંડવ જોવા મળી રહ્યું છે. છેલ્લા ૨૪ કલાકમાં રાજ્યના ૧૧૯ તાલુકાઓમાં ભારેથી અતિભારે વરસાદ વરસ્યો છે, જેમાં નવસારીના ખેરગામમાં સૌથી વધુ ૧૬ ઇંચ અને વલસાડના ઉમરગામમાં ૩૬ ઇંચ જેટલો આફતરૂપ વરસાદ ખાબકતા જળબંબાકાર જેવી સ્થિતિ સર્જાઈ છે. વલસાડમાં ૨૪ વર્ષનો રેકોર્ડ તૂટ્યો છે.
Monsoon Fury in Gujarat: નવસારી અને સુરતમાં પૂરની સ્થિતિ, ૩,૦૦૦થી વધુ લોકોનું રેસ્ક્યૂ
ભારે વરસાદના કારણે નવસારીની પૂર્ણા નદી ૨૪ ફૂટની ભયજનક સપાટી વટાવીને વહી રહી છે, જેના કારણે શહેરનો ૩૦ ટકા વિસ્તાર પાણીમાં ગરકાવ થઈ ગયો છે. અંબિકા અને કાવેરી નદીઓ પણ ભયજનક સપાટી કુદાવી ચૂકી છે. તંત્ર દ્વારા અત્યાર સુધીમાં નવસારીમાંથી ૩,૦૦૦ અને વલસાડમાંથી ૧,૨૦0 તેમજ સુરતમાંથી ૧,૫૦૦થી વધુ લોકોને રેસ્ક્યૂ કરીને સુરક્ષિત સ્થળોએ ખસેડવામાં આવ્યા છે. વાંસદામાં બાઈક પાણીના તેજ વહેણમાં તણાવાથી બે યુવાનોના કમકમાટીભર્યા મોત નીપજ્યા છે.
સુરત શહેરમાં માત્ર એક જ મહિનામાં ૫૦ ઇંચ વરસાદ નોંધાઈ ચૂક્યો છે. સારોલી, સણિયા હેમદ અને વેલંજા જેવા નીચાણવાળા વિસ્તારોમાં ૧૦ થી ૧૫ ફૂટ પાણી ભરાઈ જતાં મકાનો અને દુકાનો જળમગ્ન બન્યા છે. વાહનવ્યવહાર ઠપ્પ થઈ ગયો છે અને ૧,૧૦૦ જેટલા રસ્તાઓ બંધ કરવા પડ્યા છે.
Monsoon Fury in Gujarat: મુખ્યમંત્રીની ઈમરજન્સી બેઠક અને PM મોદીની નજર
પરિસ્થિતિની ગંભીરતાને જોઈને મુખ્યમંત્રી ભૂપેન્દ્ર પટેલે SEOC ખાતે ઉચ્ચસ્તરીય બેઠક યોજી રાહત અને બચાવ કામગીરીની સમીક્ષા કરી હતી. મંત્રીઓ અને વરિષ્ઠ સચિવોને ગ્રાઉન્ડ ઝીરો પર ઉતારી દેવામાં આવ્યા છે. બીજી તરફ, વડાપ્રધાન નરેન્દ્ર મોદીએ પણ મુખ્યમંત્રી સાથે ટેલિફોનિક વાતચીત કરી સ્થિતિની માહિતી મેળવીને કેન્દ્ર સરકાર તરફથી તમામ સહાયની ખાતરી આપી છે. રાજ્યમાં NDRF અને SDRFની ટીમો પૂરજોશમાં કામ કરી રહી છે અને જરૂર પડ્યે એરલિફ્ટ માટેનું આગોતરું આયોજન પણ કરાયું છે.
Monsoon Fury in Gujarat: ૬ જિલ્લામાં શાળાઓ-કોલેજો બંધ અને રેડ એલર્ટ
વિદ્યાર્થીઓની સલામતીને પ્રાથમિકતા આપીને તંત્ર દ્વારા અમદાવાદ, ગાંધીનગર, સુરત, વલસાડ, મહીસાગર અને નવસારી જિલ્લામાં ૨૪ જુલાઈના રોજ તમામ શાળાઓ, આંગણવાડીઓ અને કોલેજોમાં રજા જાહેર કરવામાં આવી છે.
હવામાન વિભાગની આગાહી મુજબ, આજે ૧૧ જિલ્લાઓમાં અત્યંત ભારે વરસાદને લઈને ‘રેડ એલર્ટ’ આપવામાં આવ્યું છે, જ્યારે આગામી ૩ કલાક દરમિયાન પણ વીજળીના કડાકા-ભડાકા અને ભારે પવન (૪૧ થી ૬૧ કિમી પ્રતિ કલાકની ઝડપ) સાથે વરસાદ ખાબકવાની પૂરી સંભાવના છે. પશ્ચિમ રેલવે દ્વારા મુસાફરોની સહાય માટે રેલવે સ્ટેશનો પર હેલ્પ ડેસ્ક પણ શરૂ કરવામાં આવ્યા છે.
વધુ સમાચાર વાંચવા માટે અંહી ક્લિક કરો
