Tragedy In Ahmedabad: શહેરમાં ફરી એકવાર કારમાંથી શંકાસ્પદ હાલતમાં લાશ મળી આવવાનો કિસ્સો સામે આવ્યો છે. અમદાવાદના હાર્દ સમાન નવરંગપુરા વિસ્તારમાં સિટી ગોલ્ડ થિયેટરની પાછળ, મેટ્રો બ્રિજના પિલર નીચે પાર્ક કરેલી એક વાદળી રંગની કારમાંથી એક યુવકનો મૃતદેહ મળી આવતા ચકચાર મચી ગઈ છે. ચોંકાવનારી વાત એ છે કે આ ઘટના નવરંગપુરા પોલીસ સ્ટેશનથી માત્ર 200 મીટરના અંતરે જ બની છે.
Tragedy In Ahmedabad: કારમાં પેટ્રોલ પૂરું થઈ ગયું હતું, દારૂની બોટલ પણ મળી
પોલીસની પ્રાથમિક તપાસમાં સામે આવ્યું છે કે મૃતક યુવક પાસેથી એક આઈડી કાર્ડ મળી આવ્યું છે, જેમાં તેનું નામ વિકાસ લખેલું છે અને તે નવરંગપુરા વિસ્તારનો જ રહેવાસી હોવાનું જાણવા મળ્યું છે. ગાડીની તલાશી લેતા અંદરથી દારૂની એક બોટલ પણ મળી આવી છે.
એવી શંકા સેવાઈ રહી છે કે યુવક નશાની હાલતમાં હતો અને કારનું પેટ્રોલ પૂરું થઈ જતાં તેણે મેટ્રો પિલર નીચે જ ગાડી ઊભી રાખી દીધી હતી. ત્યારબાદ તે કારમાં જ સૂઈ ગયો હતો, જ્યાં ગૂંગળામણ અથવા અન્ય કોઈ કારણોસર તેનું મોત નીપજ્યું હોઈ શકે છે.
Tragedy In Ahmedabad: શરીર પર ઇજાના કોઈ નિશાન નહીં, FSLની મદદ લેવાઈ
ઘટનાની જાણ થતાં જ નવરંગપુરા પોલીસનો કાફલો ઘટનાસ્થળે દોડી ગયો હતો. પ્રાથમિક તપાસમાં યુવકના શરીર પર ઈજાના કોઈ દેખીતા નિશાન મળી આવ્યા નથી. આ ઘટના હત્યા છે કે કુદરતી મોત, તે રહસ્ય ઉકેલવા માટે પોલીસે FSL (Forensic Science Laboratory) ની ટીમને પણ સ્થળ પર બોલાવીને ઝીણવટભરી તપાસ શરૂ કરી છે.
PM રિપોર્ટ બાદ જ સત્ય બહાર આવશે: પોલીસે યુવકના મૃતદેહને પોસ્ટમોર્ટમ (PM) માટે હોસ્પિટલ ખસેડ્યો છે. પોલીસ અધિકારીઓના જણાવ્યા અનુસાર, પોસ્ટમોર્ટમનો વિગતવાર રિપોર્ટ આવ્યા બાદ જ મોતનું ચોક્કસ અને સાચું કારણ જાણી શકાશે.
Tragedy In Ahmedabad: અગાઉ પણ આવા કિસ્સા બની ચૂક્યા છે
અમદાવાદમાં કારની અંદર જ મોત થયું હોય તેવી આ કોઈ પહેલી ઘટના નથી. આ અગાઉ પણ સરખેજ અને સોલા વિસ્તારમાંથી આ જ પ્રકારે બંધ ગાડીઓમાંથી શંકાસ્પદ હાલતમાં લાશ મળી આવવાના કિસ્સા પ્રકાશમાં આવી ચૂક્યા છે, જે બંધ કારમાં એસી (AC) ચાલુ રાખીને સૂઈ જવાથી થતા કાર્બન મોનોક્સાઈડના ઝેર તરફ પણ ઈશારો કરે છે. હાલમાં નવરંગપુરા પોલીસે આ મામલે અકસ્માત મોતનો ગુનો નોંધી વધુ તપાસ હાથ ધરી છે.
વધુ સમાચાર વાંચવા માટે અંહી ક્લિક કરો
ઓલપાડના કીમામલી નજીક કુરિયરના ટેમ્પોમાં ભીષણ આગ, ચાલક રસ્તો ભૂલતા સર્જાઈ ઘટના
