SG Highway Hit-and-Run: અમદાવાદના સૌથી વ્યસ્ત અને પોશ ગણાતા SG હાઇવે પર ફરી એકવાર સ્પીડના શોખીનોએ માસૂમનો ભોગ લીધો છે. પકવાન બ્રિજ પર ૨૦ જૂનની મોડી રાત્રે કાળજું કંપાવી દે તેવી હિટ એન્ડ રનની ઘટના સામે આવી છે. સોલા સાયન્સ સિટી રોડ પર રહેતા ૩૨ વર્ષીય અક્ષય ગજ્જર નામના યુવકને કોઈ અજાણ્યા વાહનચાલકે જોરદાર ટક્કર મારી કચડી નાખ્યો હતો અને અકસ્માત સર્જી ભાગી છૂટ્યો હતો. ગંભીર ઈજાઓના કારણે અક્ષયનું ઘટનાસ્થળે જ કરુણ મોત નીપજ્યું હતું.
SG Highway Hit-and-Run: “બાઇક પર ફાવતું નથી, ઉબેરમાં આવું છું…” માતા સાથે છેલ્લી વાતચીત
પોલીસ તપાસમાં સામે આવેલી વિગતો અનુસાર, સાયન્સ સિટી રોડ પર રહેતો અક્ષય ગજ્જર ગત મોડી રાત્રે તેના મિત્ર સાથે માતા અલકાબેનના ઘરે ગયો હતો. ત્યાંથી તે પોતાના ભાઈનું ‘જાવા’ બાઇક લઈને મોટી બેગ લેવા માટે નીકળ્યો હતો.
રાત્રે બરાબર ૨:૨૩ વાગ્યે અક્ષયે તેની માતા અલકાબેનને ફોન કર્યો હતો અને કહ્યું હતું કે,
“બાઇક પર મોટી બેગ લાવતા ફાવતું નથી, એટલે હું બાઇક મૂકીને ઉબેર (Uber) બંધાવીને બેગ સાથે ઘરે આવું છું.”
માતાને ક્યાં ખબર હતી કે દીકરા સાથેનો આ તેમનો આખરી સંવાદ બની રહેશે. આ ફોન કોલના બરાબર અડધા કલાક પછી, એટલે કે રાત્રે ૩:૦૦ વાગ્યાની આસપાસ પકવાન બ્રિજ પર કાળમુખા વાહને તેને અડફેટે લીધો હતો.
SG Highway Hit-and-Run: સવારે ૬:૦૦ વાગ્યે ફોનની એક ઘંટીએ માતાની દુનિયા ઉજાડી દીધી
રાત્રે દીકરાની રાહ જોઈને બેઠેલા માતા અલકાબેન પર સવારે ૬:૦૦ વાગ્યે પોલીસનો ફોન આવ્યો હતો. પોલીસે અકસ્માતની જાણ કરતા જ પરિવારના પગ નીચેથી જમીન સરકી ગઈ હતી. પરિવાર તાત્કાલિક સોલા સિવિલ હોસ્પિટલ દોડી ગયો હતો, જ્યાં અક્ષયનો લોહીલુહાણ મૃતદેહ જોઈને માતા અને પરિવારજનો પર આભ તૂટી પડ્યું હતું.
પ્રાથમિક તપાસ મુજબ, અકસ્માત એટલો ભયાનક હતો કે અક્ષયને માથાના તેમજ શરીરના અન્ય ભાગોમાં ગંભીર ઈજાઓ થઈ હતી, જેના કારણે તેનું ઘટનાસ્થળે જ દમ તોડી દીધો હતો.
SG Highway Hit-and-Run: અજાણ્યા વાહનચાલક સામે ગુનો: CCTVના આધારે તપાસ તેજ
આ ચકચારી ઘટનાને પગલે SG 2 ટ્રાફિક પોલીસે અજાણ્યા વાહનચાલક વિરૂદ્ધ ગુનો નોંધી આગળની કાયદેસરની કાર્યવાહી હાથ ધરી છે. પકવાન બ્રિજ અને તેની આસપાસના વિસ્તારોમાં લાગેલા સીસીટીવી (CCTV) ફૂટેજ મેળવીને હિટ એન્ડ રન કરીને નાસી છૂટેલા વાહનની ઓળખ મેળવવા પોલીસે તપાસના ચક્રો ગતિમાન કર્યા છે.
વધુ સમાચાર વાંચવા માટે અંહી ક્લિક કરો
“મુસ્લિમોને હિજાબની છૂટ તો હિન્દુઓને રૂમાલ કે કંઠી કેમ નહીં?” વાલીઓનો ઉગ્ર આક્રોશ
