Shocking Video from Rajkot: રંગીલા રાજકોટમાં કાયદો અને વ્યવસ્થા જાળવવાની જવાબદારી જેમના શિરે છે, તેવા પોલીસ તંત્રની વધુ એક દાદાગીરી સામે આવી છે. શહેરના હાર્દ સમાન કોટેચા ચોક નજીક ટ્રાફિક પોલીસ અને સામાન્ય નાગરિક વચ્ચે થયેલી તકરારે હિંસક વળાંક લીધો હતો. ટ્રાફિક પોલીસ સાથે રહેલા એક શખ્સે જાહેરમાં કાર ચાલકને લાફા મારી દેતા લોકોમાં ભારે રોષ જોવા મળી રહ્યો છે.
Shocking Video from Rajkot: લોક ખોલવાની બાબતે મામલો બિચક્યો
મળતી વિગતો મુજબ, કોટેચા ચોક નજીક પાર્ક કરેલી એક કારને ટ્રાફિક પોલીસ દ્વારા વ્હીલ લોક મારવામાં આવ્યું હતું. કાર ચાલક ત્યાં પહોંચતા તેમણે પોલીસને વિનંતી કરી હતી કે ગાડીનું લોક ખોલી આપો. આ સામાન્ય વાતચીત દરમિયાન પોલીસ અને કાર ચાલક વચ્ચે કોઈ કારણોસર ઉગ્ર બોલાચાલી થઈ હતી.
જાહેરમાં મારપીટ: આ બોલાચાલી એટલી હદે વધી ગઈ કે ટ્રાફિક પોલીસની સાથે રહેલા એક ખાનગી યુવકે કાયદો હાથમાં લીધો હતો અને કાર ચાલકને જાહેરમાં જ ફડાકા ઝીંકી દીધા હતા. પોલીસની હાજરીમાં જ સામાન્ય નાગરિક પર થયેલા આ હુમલાને જોઈ આસપાસના લોકો પણ અવાક રહી ગયા હતા.
Shocking Video from Rajkot: મહિલાઓ સાથે પણ પોલીસની ઉદ્ધતાઈ
આ ઘટના સમયે કાર ચાલક સાથે તેમના પરિવારની મહિલા સભ્યો પણ હાજર હતી. આક્ષેપ કરવામાં આવ્યો છે કે જ્યારે મહિલાઓએ આ વર્તનનો વિરોધ કર્યો, ત્યારે ત્યાં હાજર મહિલા પોલીસે પણ તેમની સાથે અત્યંત ઉદ્ધતાઈભર્યું વર્તન કર્યું હતું. પોલીસ દ્વારા કરવામાં આવેલા આ પ્રકારના અણછાજતા વર્તનથી મહિલાઓ અને પરિવારના સભ્યો માનસિક રીતે હેરાન પરેશાન થઈ ગયા હતા.
Shocking Video from Rajkot: ખાખીની છબી ખરડાઈ
રાજકોટમાં ટ્રાફિક પોલીસ કે તેમની સાથે રહેલા ટોઈંગ સ્ટાફ દ્વારા દાદાગીરી કરવાની આ કોઈ પહેલી ઘટના નથી. અવારનવાર સામાન્ય જનતા સાથે પોલીસની ઉદ્ધતાઈના વીડિયો અને ફરિયાદો સામે આવતી રહે છે. દંડ વસૂલવાની પ્રક્રિયાના નામે નાગરિકો સાથે અમાનવીય વ્યવહાર અને મારપીટની આવી ઘટનાઓ પોલીસ તંત્રની છબી ખરડી રહી છે.
સ્થાનિકોની માંગ છે કે, જાહેરમાં નાગરિક પર હાથ ઉપાડનારા શખ્સ અને તેની સામે મૂકપ્રેક્ષક બનીને ઉભેલા પોલીસકર્મીઓ સામે કડક તપાસ કરવામાં આવે અને જવાબદારો સામે પગલાં લેવામાં આવે. હાલ આ ઘટનાના વીડિયો સોશિયલ મીડિયા પર વાયરલ થતાં શહેરભરમાં ટ્રાફિક પોલીસની આ ‘દાદાગીરી’ ચર્ચાનો વિષય બની છે.
વધુ સમાચાર વાંચવા માટે અંહી ક્લિક કરો: ગોંડલમાં કાળમુખો અકસ્માત, ઓઈલ મિલમાં ખોળ સાફ કરતી વખતે મશીનમાં કપડાં ભરાતા ૫૫ વર્ષીય મહિલા શ્રમિકનું કરુણ મોત, સમગ્ર ઘટના CCTVમાં કેદ
