Ahmedabad Airport Shocker: અમદાવાદના સરદાર વલ્લભભાઈ પટેલ ઇન્ટરનેશનલ (SVPI) એરપોર્ટ પર કસ્ટમ્સ વિભાગના એર ઇન્ટેલિજન્સ યુનિટ (AIU) એ એક ગુપ્ત બાતમીના આધારે સોનાની દાણચોરીના મોટા રેકેટનો પર્દાફાશ કર્યો છે. સ્મગલરોએ અપનાવેલી એક એકથી ચઢીયાતી નવી મોડસ ઓપરેન્ડી જોઈને કસ્ટમ્સના ઉચ્ચ અધિકારીઓ પણ માથું ખંજવાળતા થઈ ગયા છે. ૧૨ જૂનના રોજ દુબઈથી અમદાવાદ આવેલી એક ફ્લાઈટના ટોઇલેટમાંથી કસ્ટમ્સ વિભાગે અંદાજે ₹૪.૨૬ કરોડની કિંમતનું ૨૪ કેરેટનું સોનું જપ્ત કર્યું છે.
Ahmedabad Airport Shocker: ટોઇલેટના સ્પીકર બોક્સમાંથી મળ્યા પાઉચ
મળતી વિગતો મુજબ, દુબઈથી અમદાવાદ પહોંચેલી ઈન્ડિગોની ફ્લાઈટ નંબર 6E-1478 માં સોનાની દાણચોરી થઈ હોવાની ચોક્કસ માહિતી કસ્ટમ્સને મળી હતી. કસ્ટમ અધિકારીઓએ એરક્રાફ્ટ એન્જિનિયરોની મદદ લઈને વિમાનની અંદર ઝીણવટભરી તપાસ હાથ ધરી હતી. આ દરમિયાન વિમાનના આગળના લેવેટરી (ટોઇલેટ) માં આવેલા સ્પીકર બોક્સની અંદર કાળા પ્લાસ્ટિકની ટેપથી લપેટેલા બે શંકાસ્પદ પાઉચ મળી આવ્યા હતા.
Ahmedabad Airport Shocker: અઢી કિલોથી વધુ વજનના ૨૪ સોનાના બિસ્કિટ
કસ્ટમ્સ વિભાગે આ પાઉચ ખોલીને તપાસ કરતા તેમાંથી 999.0 શુદ્ધતા ધરાવતા વિદેશી મૂળના ૨૪ સોનાના બિસ્કિટ મળી આવ્યા હતા. આ જપ્ત કરાયેલા સોનાનું કુલ વજન ૨,૭૯૯.૩ ગ્રામ (આશરે ૨.૮ કિલો) જેટલું થાય છે, જેની સ્થાનિક બજારમાં કિંમત ₹૪,૨૬,૮૯,૩૨૫/- આંકવામાં આવી છે. કસ્ટમ્સ એક્ટ, 1962 ના ઉલ્લંઘન બદલ અને આ સોના પર કોઈએ કાયદેસરનો દાવો ન કરતા, હાલમાં આ જથ્થો ‘લાવારિસ’ (દાવા વગરનો) ગણીને જપ્ત કરાયો છે અને વિમાનના સીસીટીવી ફૂટેજના આધારે સોનું છુપાવનારની શોધખોળ શરૂ કરાઈ છે.
Ahmedabad Airport Shocker: અમદાવાદ એરપોર્ટ બન્યું સ્મગલરોનું હોટસ્પોટ
અમદાવાદ એરપોર્ટ પર છેલ્લા કેટલાક દિવસોથી સોનાની તસ્કરીના કિસ્સાઓ ચિંતાજનક રીતે વધ્યા છે. હજુ ગઈકાલે જ (૧૧ જૂન) વેરાવળના એક મુસાફર પાસેથી ₹૬૦ લાખની કિંમતના સોનાના હૂક મળી આવ્યા હતા. આ ઉપરાંત, તાજેતરમાં જ કુઆલાલમ્પુરથી આવેલી એક મહિલા મુસાફરની શંકાસ્પદ હિલચાલ જોઈ તેની તપાસ કરાતા, તેના ગુપ્ત ભાગમાંથી કાળી ટેપથી વીંટાળેલી કેપ્સ્યુલ સ્વરૂપે ₹૮૩.૨૯ લાખની કિંમતની પ્રવાહી કેમિકલયુક્ત સોનાની પેસ્ટ મળી આવી હતી.
વધુ સમાચાર વાંચવા માટે અંહી ક્લિક કરો
