Tragedy in Vadodara: સંસ્કારી નગરી વડોદરાના લક્ષ્મીપુરા વિસ્તારમાંથી એક અત્યંત હૃદયદ્રાવક અને ચોંકાવનારી દુર્ઘટના સામે આવી છે. લક્ષ્મીપુરામાં આવેલા રડીયાત બા નગરમાં ફેબ્રિકેશન કામગીરી દરમિયાન અચાનક એક ઓક્સિજન સિલિન્ડર પ્રચંડ ધડાકા સાથે ફાટ્યો હતો. આ ભયાનક બ્લાસ્ટમાં એક યુવકનું કમકમાટીભર્યું મોત નીપજ્યું છે, જ્યારે ધડાકાની તીવ્રતાના કારણે એક આખી દીવાલ પણ ધરાશાયી થઈ ગઈ છે. આ અચાનક સર્જાયેલી આફતને પગલે સ્થાનિક રહીશોમાં ભારે ફફડાટ અને અરેરાટી વ્યાપી ગઈ છે.
Tragedy in Vadodara: સારવાર મળે તે પહેલાં જ યુવકે દમ તોડ્યો
મળતી માહિતી અનુસાર, રડીયાત બા નગરમાં ફેબ્રિકેશનનું કામ ચાલી રહ્યું હતું ત્યારે અચાનક ઓક્સિજન સિલિન્ડરમાં બ્લાસ્ટ થયો હતો. આ પ્રચંડ ધડાકાની ચપેટમાં આવતા ત્યાં કામ કરી રહેલો મુકેશગીરી નામનો યુવક ગંભીર રીતે ઘવાયો હતો. લોહીલુહાણ હાલતમાં તેને તાત્કાલિક સારવાર અર્થે નજીકની ગોત્રી હોસ્પિટલમાં ખસેડવામાં આવ્યો હતો. પરંતુ કમનસીબે તેનો ઘા એટલો ઊંડો હતો કે તબીબો સારવાર શરૂ કરે તે પહેલાં જ તેણે દમ તોડી દીધો હતો.
Tragedy in Vadodara: બ્લાસ્ટ એટલો પ્રચંડ હતો કે આખી દીવાલ ધરાશાયી થઈ
આ અકસ્માત કેટલો ભયાનક હતો તેનો અંદાજ એ વાત પરથી લગાવી શકાય છે કે સિલિન્ડર ફાટવાનો અવાજ ઘણો દૂર સુધી સંભળાયો હતો અને આસપાસના વિસ્તારમાં અફરાતફરી મચી ગઈ હતી. પોલીસના જણાવ્યા અનુસાર, બ્લાસ્ટના પ્રેશરના કારણે ઘટનાસ્થળની એક દીવાલ પણ પત્તાના મહેલની જેમ ધરાશાયી થઈ ગઈ હતી.
પોલીસ અને FSLની ટીમ ઘટનાસ્થળે દોડી ગઈ
ઘટનાની ગંભીરતાને જોતાં જ લક્ષ્મીપુરા પોલીસ અને એફએસએલ (FSL) ની ટીમ તાત્કાલિક ઘટનાસ્થળે દોડી આવી હતી. પોલીસે આખી ઘટના અંગે અકસ્માત મોતનો ગુનો નોંધીને વિગતવાર તપાસ શરૂ કરી છે. ઓક્સિજન સિલિન્ડરમાં બ્લાસ્ટ કયા કારણોસર થયો, ગેસ લીકેજ હતો કે કોઈ અન્ય ખામી, તે અંગે એફએસએલની મદદથી ઝીણવટભરી તપાસ હાથ ધરવામાં આવી છે. હાલમાં આ કાળમુખી દુર્ઘટનાને કારણે સ્થાનિક વિસ્તારમાં ભારે દહેશત અને શોકનો માહોલ જોવા મળી રહ્યો છે.
વધુ સમાચાર માટે અંહી ક્લિક કરો: ભારત પર મોટું સંકટ મે-જુલાઈમાં સક્રિય થશે ‘સુપર અલ નીનો’, નબળા ચોમાસા અને ભીષણ દુષ્કાળની આશંકા!
