Cough Syrup Scandal: નશાકારક દવાઓના દુરુપયોગને રોકવા માટે ખોરાક અને ઔષધ નિયમન તંત્ર (FDCA) એ વડોદરામાં મોટી કાર્યવાહી કરી છે. ભાયલી વિસ્તારમાં આવેલી ‘મે. હેમ કેર ફાર્મા’ દ્વારા હજારોની સંખ્યામાં નશાકારક કફ સીરપનો ગેરકાયદે નિકાલ કરવામાં આવતો હોવાનું બહાર આવતા તંત્રએ આ પેઢીનો હોલસેલ પરવાનો કાયમી ધોરણે રદ કરી દીધો છે.
Cough Syrup Scandal: હજારો બોટલનો હિસાબ ગાયબ
તપાસ દરમિયાન સામે આવ્યું છે કે, પરવાનેદાર પ્રતિક નરેન્દ્રકુમાર બારોટે છેલ્લા ત્રણ મહિનામાં અમદાવાદની પવન એજન્સી પાસેથી કોડીન (Codeine) ઘટક ધરાવતી કફ સીરપની 8,530 બોટલો ખરીદી હતી. જ્યારે તંત્રએ દરોડા પાડ્યા ત્યારે પેઢી પર કોઈ જ સ્ટોક ઉપલબ્ધ નહોતો. જેમાંથી 980 બોટલો કોઈ પણ બિલ કે પ્રિસ્ક્રિપ્શન વગર અજાણ્યા લોકોને વેચી દેવામાં આવી હોવાનું સાબિત થયું છે.
Cough Syrup Scandal: યુવાધન માટે ખતરનાક ‘નશો’
કોડીનયુક્ત કફ સીરપનો નશા તરીકે ઉપયોગ કરવો અત્યંત જીવલેણ સાબિત થઈ શકે છે. નિષ્ણાતોના મતે, આના ઓવરડોઝથી ગંભીર ડિપ્રેશન, શ્વાસમાં તકલીફ અને વ્યક્તિ કોમામાં સરી પડવાની શક્યતા રહે છે. તે હૃદયના ધબકારા ધીમા પાડે છે, જેનાથી હાર્ટ અટેકનું જોખમ વધી જાય છે. આર્થિક લાભ માટે આ ફાર્મા પેઢીએ સમાજના યુવાધનને જોખમમાં મૂકવાનું કૃત્ય કર્યું છે.
Cough Syrup Scandal: તંત્રની કડક કાર્યવાહી
પેઢી દ્વારા ડ્રગ્સ એન્ડ કોસ્મેટિક્સ એક્ટ-1940ના નિયમોના ઉલ્લંઘન બદલ કારણદર્શક નોટિસ ફટકારવામાં આવી હતી. જોકે, પેઢીનો ખુલાસો સંતોષકારક ન જણાતા મદદનીશ કમિશનર ડૉ. એ.એચ. ઝાલા અને ઔષધ નિરીક્ષક એચ.એમ. જેપાલ દ્વારા તાત્કાલિક અસરથી પેઢીના તમામ પરવાના (20B, 21B અને 20G) રદ કરવામાં આવ્યા છે.
નાગરિકોને અપીલ
તંત્રએ તમામ મેડિકલ સ્ટોર અને ફાર્માસિસ્ટોને કાયદાની મર્યાદામાં રહી વ્યવસાય કરવા કડક સૂચના આપી છે. સાથે જ જનતાને અપીલ કરી છે કે જો ક્યાંય પણ આવી નશીલી દવાઓનું ગેરકાયદે વેચાણ થતું હોય તો તેની બાતમી તંત્રને આપવી, જેથી યુવાધનને બચાવી શકાય.
વધુ સમાચાર વાંચવા માટે અંહી ક્લિક કરો
