Ahmedabad Shocker: શહેરમાં માનવતા અને માતૃત્વને લજવતો એક કિસ્સો પ્રકાશમાં આવ્યો છે. અમદાવાદના ઇન્દિરા બ્રિજ પાસે આવેલા ભાટ ગામની એક સોસાયટીમાં, બે યુવતીઓ માત્ર બે દિવસના નવજાત શિશુને પાણીપુરીની લારીમાં બિનવારસી હાલતમાં છોડીને રફુચક્કર થઈ ગઈ હતી. બાળકના રડવાનો અવાજ આવતા સ્થાનિકોએ તાત્કાલિક પોલીસને જાણ કરી હતી.
Ahmedabad Shocker: શું હતી સમગ્ર ઘટના?
ગઈકાલે 17 માર્ચની રાત્રે અંદાજે 9:10 વાગ્યે પોલીસ કંટ્રોલ રૂમને મેસેજ મળ્યો હતો કે ભાટ ગામ નજીકની કોઠારી હોસ્પિટલ પાસે એક નાનું બાળક તરછોડાયેલું મળ્યું છે. એરપોર્ટ પોલીસ તાત્કાલિક ઘટનાસ્થળે પહોંચી હતી. તપાસ દરમિયાન જાણવા મળ્યું કે:
- માત્ર બે દિવસનું માસૂમ બાળક જીવિત હાલતમાં હતું.
- તેના શરીર પર માત્ર એક જ કપડું લપેટાયેલું હતું.
- બાળકને તાત્કાલિક સિવિલ હોસ્પિટલના બાળકોના વોર્ડમાં સારવાર અર્થે ખસેડવામાં આવ્યું છે.
Ahmedabad Shocker: CCTV ફૂટેજમાં પાપ ઉઘાડું પડ્યું
પોલીસે આસપાસના સીસીટીવી ફૂટેજ તપાસતા ચોંકાવનારી વિગતો સામે આવી છે:
- રાત્રે 8:41 વાગ્યે: બે યુવતીઓ એક સાંકડી ગલીમાં પ્રવેશતી દેખાય છે. એકના હાથમાં બાળક હતું અને બીજી પાસે બેગ હતી.
- તકની રાહ: બંને યુવતીઓએ ગલીમાં ઊભા રહીને આસપાસ કોઈ જોતું નથી તેની ખાતરી કરી હતી. લોકોની અવરજવર બંધ થવાની તેમણે બે મિનિટ સુધી રાહ જોઈ હતી.
- પાણીપુરીની લારી: સોસાયટીમાં કોઈ ન દેખાતા, બંને યુવતીઓએ ઉતાવળે બાળકને ત્યાં પડેલી એક પાણીપુરીની લારીમાં મૂકી દીધું અને ગણતરીની સેકન્ડોમાં ત્યાંથી ફરાર થઈ ગઈ.
“બાળકને તરછોડવાની આખી પ્રક્રિયા માત્ર 2 મિનિટમાં પૂર્ણ કરી બંને યુવતીઓ અંધારામાં ગાયબ થઈ ગઈ હતી.”
Ahmedabad Shocker:પોલીસ તપાસ તેજ
એરપોર્ટ પોલીસે આ મામલે ગુનો નોંધીને તપાસના ચક્રો ગતિમાન કર્યા છે. સીસીટીવીમાં દેખાતી બંને યુવતીઓ કોણ છે? શું તે બાળકની માતા છે કે અન્ય કોઈ? તે દિશામાં પોલીસે તપાસ શરૂ કરી છે. સોસાયટીના રહીશોમાં આ ઘટનાને લઈને ભારે રોષ અને અરેરાટી જોવા મળી રહી છે.
વધુ સમાચાર વાંચવા માટે નીચે ક્લિક કરો :
અમેરિકાનો ઈરાન પર 2700 કિલોનો બોમ્બમારો, ઇઝરાયલે કહ્યું- ‘નવા સુપ્રીમ લીડરને શોધીને મારીશું’
