Energy Crisis: ઈરાન, ઈઝરાયેલ અને અમેરિકા વચ્ચે ચાલી રહેલા યુદ્ધના કારણે વૈશ્વિક સ્તરે ક્રૂડ ઓઈલ અને ગેસની સપ્લાય ચેઈન ખોરવાઈ છે. ઈરાને હોર્મુઝની ખાડી (Strait of Hormuz) માં પરિવહન પર પ્રતિબંધ મૂકતા વિશ્વભરમાં તેલ કટોકટીની આશંકા છે. જોકે, આ મુશ્કેલ સમયમાં ઓસ્ટ્રેલિયા અને કેનેડા એ ભારત તરફ મદદનો હાથ લંબાવ્યો છે.
Energy Crisis: ઓસ્ટ્રેલિયા-કેનેડા વધારાનો ગેસ આપશે
મધ્ય-પૂર્વમાં સર્જાયેલા તણાવને પગલે ભારતમાં ગેસ પુરવઠાની અછત ન સર્જાય તે માટે ઓસ્ટ્રેલિયા અને કેનેડાએ ભારતને વધારાનો ગેસ પૂરો પાડવાની તૈયારી દર્શાવી છે. શનિવારે સરકારી સૂત્રોએ પુષ્ટિ કરી હતી કે ભારતને વૈકલ્પિક ઊર્જા સ્રોતો મારફત મદદ મળી રહી છે, જેથી દેશની ઊર્જા સુરક્ષા વધુ મજબૂત બનશે.
Energy Crisis: હોર્મુઝની ખાડી પર ભારતની નિર્ભરતા ઘટી
ઈરાને હોર્મુઝની ખાડી બંધ કરી હોવા છતાં ભારત પર તેની મોટી અસર નહીં પડે, કારણ કે:
- સીમિત નિર્ભરતા: ભારતની માત્ર 40% ક્રૂડ આયાત હોર્મુઝની ખાડીમાંથી પસાર થાય છે, જ્યારે બાકીની 60% જરૂરિયાત અન્ય સુરક્ષિત માર્ગો પરથી પુરી થાય છે.
- વૈવિધ્યકરણ: ભારતે છેલ્લા 10 વર્ષમાં તેના ક્રૂડ ઓઈલ સ્રોતોમાં મોટો વધારો કર્યો છે. પહેલા ભારત 27 દેશો પર નિર્ભર હતું, જે હવે વધીને 40 દેશો થયા છે.
- વૈશ્વિક ભાગીદારી: ભારત અત્યારે રશિયા, અમેરિકા, પશ્ચિમ આફ્રિકા, મધ્ય એશિયા અને નોન-ગલ્ફ દેશો પાસેથી તેલ અને ગેસ મેળવી રહ્યું છે.
Energy Crisis: પેટ્રોલ-ડીઝલની અછત નહીં સર્જાય
સરકારે ખાતરી આપી છે કે એક જ જળમાર્ગ પર ભારતની નિર્ભરતાનો સમય પૂરો થઈ ગયો છે. અલગ-અલગ ખંડોમાંથી આયાત થતી હોવાથી મધ્ય-પૂર્વના યુદ્ધની ભારતની તેલ સપ્લાય પર ગંભીર અસર નહીં થાય. જોકે, આંતરરાષ્ટ્રીય ભાવ વધારાને કારણે તાજેતરમાં રાંધણ ગેસના ભાવમાં વધારો જોવો પડ્યો છે, પરંતુ સપ્લાયમાં કોઈ વિક્ષેપ નહીં આવે.
ભારત સરકાર સતત નવા ઊર્જા સંસાધનોની શોધ કરી રહી છે જેથી ભવિષ્યમાં પણ કોઈપણ વૈશ્વિક તણાવની અસર દેશના સામાન્ય નાગરિકો પર ન પડે.
