Commonwealth Games:કોમનવેલ્થ ગેમ્સમાં ભારતીય ખેલાડીઓનો શાનદાર દેખાવ યથાવત રહ્યો છે. સોમવારે ભારતને વધુ એક ગૌરવપૂર્ણ ક્ષણ ત્યારે મળી જ્યારે હરિયાણાની પેરા એથ્લેટ શર્મિલા ધનખડે મહિલાઓની પેરા શોટ પુટ F57 સ્પર્ધામાં 9.81 મીટરનો સિઝનનો શ્રેષ્ઠ થ્રો કરીને ગોલ્ડ મેડલ જીત્યો. આ વર્તમાન કોમનવેલ્થ ગેમ્સમાં ભારતનો બીજો ગોલ્ડ મેડલ છે. આ જ સ્પર્ધામાં ભારતની શિલ્પા કે. શાયલાએ બ્રોન્ઝ મેડલ મેળવી ભારતની સિદ્ધિને વધુ ભવ્ય બનાવી.
ભારતના કુલ મેડલની સંખ્યા હવે 10 પર પહોંચી છે અને મેડલ ટેલીમાં ટીમ આઠમા સ્થાને છે. ઓસ્ટ્રેલિયા 26 ગોલ્ડ સહિત કુલ 59 મેડલ સાથે પ્રથમ સ્થાને યથાવત છે.
Commonwealth Games:સંઘર્ષમાંથી સફળતાની શિખરે પહોંચી શર્મિલા
શર્મિલા ધનખડની સફળતા માત્ર ગોલ્ડ મેડલ પૂરતી સીમિત નથી, પરંતુ સંઘર્ષ અને આત્મવિશ્વાસની પ્રેરણાદાયી કહાની પણ છે. હરિયાણાના મહેન્દ્રગઢ જિલ્લાના ચિત્રૌલી ગામની રહેવાસી શર્મિલા બે વર્ષની ઉંમરે પોલિયોથી પ્રભાવિત થયા હતા. પરિવારની આર્થિક પરિસ્થિતિ નબળી હતી, પિતા નાના ખેડૂત અને માતા દૃષ્ટિહીન હોવાથી યોગ્ય સારવાર પણ મળી શકી નહોતી.
માત્ર 34 વર્ષની ઉંમરે તેમણે પેરા એથ્લેટિક્સમાં કારકિર્દીની શરૂઆત કરી. વર્ષ 2023માં તાલીમ માટે જરૂરી ખર્ચ ઉઠાવવા પરિવારને પોતાનું ઘર પણ વેચવું પડ્યું અને ભાડાના મકાનમાં રહેવું પડ્યું. છતાં તેમણે હિંમત ન હારી અને આજે દેશ માટે ગોલ્ડ મેડલ જીતીને લાખો લોકોને પ્રેરણા આપી છે.
Commonwealth Games:બીજા લગ્ન બાદ બદલાયું જીવન
26 વર્ષની ઉંમરે પ્રથમ પતિએ તેમને ઘરેથી કાઢી મૂક્યા હતા. બે દીકરીઓ સાથે તેઓ પિયર પરત ફર્યા. ત્યારબાદ 28 વર્ષની ઉંમરે અજીત સાથે બીજા લગ્ન કર્યા. અજીતે જ તેમને પેરા એથ્લેટિક્સમાં કારકિર્દી બનાવવા પ્રોત્સાહન આપ્યું અને દરેક મુશ્કેલીમાં સાથ આપ્યો. આજે શર્મિલાની સફળતા પાછળ તેમના પતિનો મહત્વનો ફાળો માનવામાં આવે છે.
Commonwealth Games:નાટકીય ઘટનાક્રમ બાદ શિલ્પાને મળ્યો બ્રોન્ઝ
મહિલાઓની શોટ પુટ F57 સ્પર્ધામાં શિલ્પા શાયલાએ શરૂઆતમાં 7.26 મીટરના વ્યક્તિગત શ્રેષ્ઠ થ્રો છતાં ચોથું સ્થાન મેળવ્યું હતું. જોકે ભારતની વાંધા અરજી બાદ નાઇજીરીયાની ખેલાડીનો થ્રો ફાઉલ જાહેર થતાં સુધારેલા પરિણામોમાં શિલ્પાને બ્રોન્ઝ મેડલ આપવામાં આવ્યો. મેડલ મળતા જ શિલ્પા ભાવુક બની ગઈ અને શર્મિલા સાથે પોતાની ખુશી વહેંચી.
Commonwealth Games:સર્વેશ કુશારેનો ઐતિહાસિક સિલ્વર
પુરુષ હાઈ જમ્પમાં ભારતના સર્વેશ કુશારેએ 2.25 મીટરનો સફળ કૂદકો લગાવી સિલ્વર મેડલ જીત્યો. જોકે 2.28 મીટરની ઊંચાઈ પાર કરવાની ત્રણેય કોશિશ નિષ્ફળ રહી. જમૈકાના રોમેન બેકફોર્ડે ગોલ્ડ જીત્યો જ્યારે ઇંગ્લેન્ડના કિમાની જેકે બ્રોન્ઝ મેડલ મેળવ્યો.
આ સાથે સર્વેશ કોમનવેલ્થ ગેમ્સમાં હાઈ જમ્પમાં સિલ્વર જીતનાર પ્રથમ ભારતીય ખેલાડી બન્યા. થોડા દિવસો પહેલાં જ તેમણે મોનાકો ડાયમંડ લીગમાં 2.26 મીટરના કૂદકા સાથે બ્રોન્ઝ મેડલ જીત્યો હતો અને ડાયમંડ લીગમાં પોડિયમ પર પહોંચનાર પ્રથમ ભારતીય હાઈ જમ્પર બન્યા હતા.
ખેતરમાં બનાવેલી લેન્ડિંગ પિટથી આંતરરાષ્ટ્રીય મંચ સુધી
મહારાષ્ટ્રના નાસિક જિલ્લાના દેવગામ ગામના રહેવાસી સર્વેશ કુશારેનો સફર પણ પ્રેરણાદાયી છે. ખેડૂત પિતાએ મકાઈના છોતરાં, કપાસ અને ખેતીના અવશેષોથી ખેતરમાં જ અસ્થાયી લેન્ડિંગ પિટ બનાવી હતી જેથી સર્વેશ હાઈ જમ્પની પ્રેક્ટિસ કરી શકે. મર્યાદિત સાધનો વચ્ચે શરૂ થયેલી આ સફર આજે કોમનવેલ્થ ગેમ્સના સિલ્વર મેડલ સુધી પહોંચી છે.
ભારતીય ખેલાડીઓના આ ઉત્કૃષ્ટ પ્રદર્શનથી દેશનું ગૌરવ વધ્યું છે. ખાસ કરીને શર્મિલા ધનખડ અને સર્વેશ કુશારેની સંઘર્ષભરી સફર યુવા ખેલાડીઓ માટે પ્રેરણાનું જીવંત ઉદાહરણ બની છે.
આ પણ વાંચો :₹10 અને ₹20ની 200 કરોડ પ્લાસ્ટિક નોટો આવશે, ફાટશે નહીં અને પાણીથી સુરક્ષિત રહેશે, કાગળની કરન્સી ચાલુ રહેશે
