Chaos at Ahmedabad Holi Party:ગ્રીન પ્લેસ પાર્ટી પ્લોટમાં મિસમેનેજમેન્ટના આક્ષેપ સાથે ખેલૈયાઓ ભભૂક્યા | આયોજકોએ લુખ્ખા તત્વો પર દોષ ઢોળ્યો, બોપલ પોલીસે મામલો થાળે પાડ્યો.
શહેરના પોશ ગણાતા સિંધુભવન રોડ પર ધુળેટીની ઉજવણીના રંગમાં ભંગ પડ્યો છે. ‘બ્રજ વાઇબ્સ’ દ્વારા આયોજિત ધુળેટી પાર્ટીમાં યોગ્ય વ્યવસ્થા ન હોવાના આક્ષેપ સાથે ખેલૈયાઓએ ભારે તોડફોડ મચાવી હતી. ગ્રીન પ્લેસ પાર્ટી પ્લોટમાં યોજાયેલી આ ઇવેન્ટમાં મ્યુઝિક બંધ થઈ જતાં અને પાયાની સુવિધાઓના અભાવે રોષે ભરાયેલા યુવકોએ ડીજે સિસ્ટમ અને ડેકોરેશનના સેટ ઉથલાવી દીધા હતા.
Chaos at Ahmedabad Holi Party: અસુવિધાથી ભભૂક્યો આક્રોશ
ખેલૈયાઓનો આક્ષેપ છે કે આયોજકોએ પાસના નામે મોટી રકમ વસૂલી હતી, પરંતુ તે મુજબની સુવિધાઓ આપવામાં આવી નહોતી. પાર્ટી દરમિયાન અચાનક મ્યુઝિક બંધ થઈ જતાં લોકોનો સંયમ ખૂટ્યો હતો. સોશિયલ મીડિયામાં વાઇરલ થયેલા વીડિયોમાં જોઈ શકાય છે કે કઈ રીતે લોકો મંડપ અને ડીજેના સાધનોમાં તોડફોડ કરી રહ્યા છે.
Chaos at Ahmedabad Holi Party: આયોજકોનો બચાવ: ‘લુખ્ખા તત્વોએ કર્યું તોડફોડ’
બીજી તરફ, ‘બ્રજ વાઇબ્સ’ના આયોજક વીરસિંઘે જણાવ્યું હતું કે, “અમે તમામ વ્યવસ્થા કરી હતી અને ડીજે આર્ટિસ્ટ પણ હાજર હતા. માત્ર થોડા સમય માટે મ્યુઝિક બંધ થયું હતું, જેનો ફાયદો ઉઠાવી ૪-૫ લુખ્ખા તત્વોએ તોડફોડ કરી હોબાળો મચાવ્યો હતો.” આયોજકોએ વધુમાં જણાવ્યું કે તેમની પાસે તોડફોડ કરનારાઓના વીડિયો પુરાવા તરીકે છે.
Chaos at Ahmedabad Holi Party:પોલીસની મધ્યસ્થી અને રિફંડની ખાતરી
ઘટનાની ગંભીરતા જોતા બોપલ પોલીસની ટીમ તાત્કાલિક સ્થળ પર પહોંચી ગઈ હતી. પોલીસે ખેલૈયાઓ અને આયોજકો સાથે વાતચીત કરી મામલો શાંત પાડ્યો હતો. હાલમાં આ અંગે કોઈ સત્તાવાર પોલીસ ફરિયાદ નોંધાઈ નથી, પરંતુ જે લોકો નારાજ છે તેમને રિફંડ આપવાની પ્રક્રિયા આયોજકો દ્વારા શરૂ કરવામાં આવી છે.
