Bomb Threat : ગુજરાતના બે મોટા શહેરો અમદાવાદ અને વડોદરાની મળી કુલ 8 જેટલી પ્રતિષ્ઠિત શાળાઓને આજે સવારે બોમ્બથી ઉડાવી દેવાની ધમકી મળતા સુરક્ષા એજન્સીઓ દોડતી થઈ ગઈ છે. આ ધમકીભર્યા ઈમેઈલમાં દેશના વડાપ્રધાન નરેન્દ્ર મોદી અને ગૃહમંત્રી અમિત શાહને ટાર્ગેટ કરવાની સાથે ભારત વિરોધી ઉશ્કેરણીજનક લખાણ લખવામાં આવ્યું છે.
Bomb Threat : કઈ શાળાઓને મળી ધમકી?
- વડોદરા: ડી.આર. અમીન, ઉર્મિ સ્કૂલ, નાલંદા સ્કૂલ અને બરોડા હાઈસ્કૂલ (બગીખાના).
- અમદાવાદ: DAV ઇન્ટરનેશનલ (મકરબા), એશિયા સ્કૂલ (વસ્ત્રાપુર), A વન સ્કૂલ (સેટેલાઇટ) અને અંકુર ઇન્ટરનેશનલ (કૃષ્ણનગર).
Bomb Threat : ઈમેઈલમાં શું લખ્યું છે?
સૂત્રોના જણાવ્યા અનુસાર, મોકલવામાં આવેલા ઈમેઈલમાં અત્યંત ગંભીર અને રાષ્ટ્રવિરોધી ભાષાનો પ્રયોગ કરવામાં આવ્યો છે:
“ગુજરાત ખાલિસ્તાન બનશે અને હિન્દુસ્તાનના ટુકડા થશે.” સાથે જ વડાપ્રધાન અને ગૃહમંત્રીને ટાર્ગેટ કરવાની ધમકી આપીને ભયનો માહોલ ઉભો કરવાનો પ્રયાસ કરાયો છે.
શાળાઓ ખાલી કરાવાઈ, વાલીઓમાં ફાળ પડી
ધમકી મળતા જ શાળા સંચાલકોએ સતર્કતા દાખવી તાત્કાલિક પોલીસને જાણ કરી હતી.
- બાળકોની સુરક્ષા: વડોદરા અને અમદાવાદની શાળાઓમાંથી બાળકોને તાત્કાલિક રજા આપી સુરક્ષિત રીતે ઘરે મોકલી દેવામાં આવ્યા છે.
- હોસ્ટેલ ખાલી કરાવાઈ: વડોદરાની ઉર્મિ સ્કૂલની હોસ્ટેલને પણ સાવચેતીના ભાગરૂપે ખાલી કરી દેવામાં આવી છે.
- સઘન ચેકિંગ: પોલીસ કાફલો, ફાયર બ્રિગેડ, બોમ્બ ડિસ્પોઝલ સ્ક્વોડ (BDDS) અને ડોગ સ્ક્વોડ ઘટનાસ્થળે પહોંચી ગયા છે અને શાળાના ખૂણેખૂણે તપાસ હાથ ધરી છે.
પોલીસની તપાસ
પ્રાથમિક દ્રષ્ટિએ આ મેઈલ કોઈ આતંકી સંગઠન અથવા અસામાજિક તત્ત્વો દ્વારા રાજ્યની શાંતિ ડહોળવા માટે કરવામાં આવ્યો હોવાનું મનાય છે. સાયબર ક્રાઈમની ટીમ ઈમેઈલના IP એડ્રેસના આધારે મૂળ સુધી પહોંચવા પ્રયાસ કરી રહી છે. અગાઉ પણ ગણતંત્ર દિવસ પૂર્વે આવી ફેક ધમકીઓ મળી હોવાના કિસ્સા બન્યા છે, જે હોક્સ (Hoax) સાબિત થયા હતા, પરંતુ તંત્ર કોઈ જોખમ લેવા માંગતું નથી.
આ પણ વાંચો :અમિત શાહનો રાહુલ ગાંધીને ખુલ્લો પડકાર: ‘ખેડૂતોને ગેરમાર્ગે દોરવાનું બંધ કરો, ભાજપ કોઈપણ મંચ પર ચર્ચા કરવા તૈયાર’
