Workers Protests: શહેરના નરોડા-મેમ્કો વિસ્તારમાં આવેલી જાણીતી ખાનગી કંપની લુબી (Lubi Pumps) માં પગાર વધારા અને ઓવરટાઇમના મુદ્દે મોટો હોબાળો મચ્યો છે. સરકારના ધારા-ધોરણ મુજબ વેતન ન મળતા રોષે ભરાયેલા 500થી વધારે કર્મચારીઓ કંપની પરિસરમાં જ સામૂહિક હડતાલ પર ઉતરી ગયા છે. આ અચાનક થયેલી હડતાલના કારણે હાલ પૂરતું કારખાનાનું કામકાજ સંપૂર્ણપણે ઠપ થઈ ગયું છે.
Workers Protests: રૂ. 18,000 સુધીના પગાર વધારાની માંગ સાથે હોબાળો
મળતી વિગતો અનુસાર, લુબી કંપનીના કામદારો દ્વારા અગાઉ પણ મેનેજમેન્ટને પગાર વધારા અને ઓવરટાઇમના યોગ્ય વળતર બાબતે રજૂઆતો કરવામાં આવી હતી. જોકે, લાંબા સમયથી કંપની પ્રશાસન દ્વારા કોઈ સકારાત્મક નિર્ણય ન લેવાતા કર્મચારીઓની ધીરજ ખૂટી હતી. કામદારોની મુખ્ય માંગ છે કે સરકારી ધારા-ધોરણો અનુસાર તેમનો પગાર વધારીને 18,000 રૂપિયા સુધી કરવામાં આવે. વારંવારની રજૂઆતો છતાં કોઈ ઉકેલ ન આવતા આજે મોટી સંખ્યામાં કર્મચારીઓ એકઠા થયા હતા અને કંપની કેમ્પસમાં જ ધરણા પર બેસી ગયા હતા.
Workers Protests: કંપનીએ મેઈન ગેટ બંધ કરી કર્મચારીઓને બહાર આવતા રોક્યા
કર્મચારીઓએ કંપનીની અંદર જ વિરોધ પ્રદર્શન અને હોબાળો શરૂ કરી દેતા પરિસ્થિતિ તંગ બની હતી. લુબી કંપનીના સત્તાધીશો દ્વારા તાત્કાલિક અસરથી કારખાનાના તમામ મુખ્ય દરવાજા (મેઈન ગેટ) બંધ કરી દેવામાં આવ્યા છે. સૂત્રોના જણાવ્યા અનુસાર, હડતાલ પર ઉતરેલા કર્મચારીઓ બહાર ન આવી શકે તે માટે કંપની દ્વારા તેમને પરિસરની અંદર જ રોકી રાખવામાં આવ્યા છે. હાલમાં કંપનીના ગેટ બહાર ચુસ્ત માહોલ જોવા મળી રહ્યો છે અને આ મામલે મેનેજમેન્ટ દ્વારા હજુ સુધી કોઈ સત્તાવાર સ્પષ્ટતા સામે આવી નથી.
વધુ સમાચાર વાંચવા માટે અંહી ક્લિક કરો
IPL 2026 અમદાવાદના નરેન્દ્ર મોદી સ્ટેડિયમમાં રમાશે ગ્રાન્ડ ફિનાલે, પ્લેઓફનું શેડ્યૂલ જાહેર
