Vadodara news:સંસ્કારી નગરી વડોદરાના દાંડિયાબજાર વિસ્તારમાં ગત રાત્રે એક ચોંકાવનારી ઘટના સામે આવી છે. GST ભવનમાં ફરજ બજાવતા એક સિક્યુરિટી ગાર્ડે દારૂના નશામાં પોતાની લાયસન્સવાળી બંદૂકમાંથી હવામાં ફાયરિંગ કરતા સમગ્ર વિસ્તારમાં ચકચાર મચી ગઈ હતી. નવદુર્ગા મંદિર પાસે બનેલી આ ઘટનાને કારણે દર્શન કરવા આવેલા શ્રદ્ધાળુઓના જીવ તાળવે ચોંટ્યા હતા.
Vadodara news: નવદુર્ગા મંદિર પાસે નશામાં ગોળીબાર
મળતી માહિતી મુજબ, આરોપી નરેન્દ્રસિંહ રાજ (રહે. જંબુસર) વડોદરાના કુબેર ભવન ખાતે GST સેવા કેન્દ્રમાં સિક્યુરિટી ગાર્ડ તરીકે નોકરી કરે છે. ગત રાત્રે નોકરી પૂરી કરી જમવા જતી વખતે તેણે નશાની હાલતમાં પોતાની એકનાળી બંદૂક કાઢી હવામાં ફાયરિંગ કર્યું હતું.
Vadodara news: જાગૃત મહિલા પર હુમલાનો પ્રયાસ
ઘટનાને નજરે જોનાર સ્થાનિક મનીષાબેન કહારે જણાવ્યું કે, “અમે મંદિરમાં દર્શન કરતા હતા ત્યારે અચાનક ગાર્ડે બંદૂક કાઢી ફાયરિંગ શરૂ કર્યું. મેં તાત્કાલિક 112 પર પોલીસને જાણ કરી તો નશામાં ધૂત ગાર્ડે મારા પર પણ હુમલો કરવાનો પ્રયાસ કર્યો હતો.” નજરે જોનારાઓના મતે ગાર્ડે ત્રણ રાઉન્ડ ફાયરિંગ કર્યું હતું, જોકે પોલીસ તપાસમાં એક રાઉન્ડની વાત સામે આવી છે.
રાવપુરા પોલીસની કાર્યવાહી: આરોપી જેલના સળિયા પાછળ
ઘટનાની જાણ થતા જ રાવપુરા પોલીસ એક્શનમાં આવી હતી અને આરોપી નરેન્દ્રસિંહની ધરપકડ કરી લીધી છે. પોલીસે તેની પાસેથી:
- પરવાનાવાળી એકનાળી બંદૂક (યુ.એસ. 107 બી)
- જીવતા કારતૂસ
- બ્લેન્ક કારતૂસ જપ્ત કર્યા છે.
પોલીસે આરોપી વિરુદ્ધ પ્રોહિબિશન (દારૂબંધી ભંગ) અને જાહેરનામાના ભંગના બે અલગ-અલગ ગુના નોંધી વધુ તપાસ હાથ ધરી છે.
આ પણ વાંચો :બનાસકાંઠામાં મધરાતે કાળમુખી આગ: રાજસ્થાનથી આવતી લક્ઝરી બસ બની અગનગોળો, 1 મુસાફરનું કરૂણ મોત
