UK Settlement Policy Backlash: યુકે સરકાર દ્વારા પ્રસ્તાવિત નવી ઈમિગ્રેશન અને સેટલમેન્ટ નીતિ સામે બ્રિટનમાં ટ્રેડ યુનિયનોએ ઉગ્ર મોરચો માંડ્યો છે અને વિરોધ પ્રદર્શનો તેજ કર્યા છે. બ્રાઇટનમાં આયોજિત ટ્રેડ્સ યુનિયન કોંગ્રેસની મહત્વની બેઠકમાં સરકારની આ કડક સેટલમેન્ટ નીતિને તાત્કાલિક પાછી ખેંચવાની માંગ કરતો પ્રસ્તાવ પસાર કરવામાં આવ્યો છે.
UK Settlement Policy Backlash: સેટલમેન્ટ સમયગાળો પાંચથી વધારીને દસ અને પંદર વર્ષ કરવાની દરખાસ્ત
બ્રિટિશ સરકારના નવા પ્રસ્તાવ મુજબ સામાન્ય કામદારો માટે સેટલમેન્ટ મેળવવાનો સમયગાળો હાલના પાંચ વર્ષથી વધારીને સીધો દસ વર્ષ સુધી થઈ શકે છે. આ ઉપરાંત, ઓછા અથવા મધ્યમ કૌશલ્યવાળી નોકરીઓ કરતા સ્થળાંતરિત વિદેશી કામદારો માટે આ રાહ વધીને ૧૫ વર્ષ સુધી પહોંચી જવાની જોગવાઈ રાખવામાં આવી છે. યુનિયનોનું કહેવું છે કે લાંબા સમય સુધી નોકરીદાતા આધારિત વિઝા પર રહેવાના કારણે કામદારોનું શોષણ વધશે અને તેઓ પોતાના હક માટે અવાજ ઉઠાવતા ડરશે.
UK Settlement Policy Backlash: સોશિયલ કેર સેક્ટરમાં સ્ટાફની અછત વધુ ગંભીર બનવાની ભીતિ
બ્રિટનના સામાજિક સંભાળ (સોશિયલ કેર) ક્ષેત્રમાં હજારો વિદેશી કામદારો ફરજ બજાવી રહ્યા છે, જેઓ આ કડક નિયમોથી સીધા પ્રભાવિત થશે. ટ્રેડ યુનિયનોએ ગંભીર ચેતવણી આપી છે કે જો આ નિયમો લાગુ થશે તો અનુભવી અને કુશળ કેર વર્કરો યુકે છોડવા મજબૂર બનશે. તેના પરિણામે બ્રિટનમાં પહેલેથી ચાલી રહેલી કર્મચારીઓની અછત વધુ વિકટ અને ગંભીર રૂપ ધારણ કરશે.
UK Settlement Policy Backlash: સરકાર દ્વારા પ્રતિભાવોનો અભ્યાસ શરૂ
ટ્રેડ યુનિયનો, વિદેશી કર્મચારીઓ અને વિવિધ સંગઠનો દ્વારા રસ્તા પર ઉતરીને પ્લેકાર્ડ્સ સાથે દેખાવો કરવામાં આવી રહ્યા છે. આ ઉગ્ર આક્રોશ વચ્ચે બ્રિટિશ સરકારે સ્પષ્ટતા કરી છે કે આ નીતિ અંગે પરામર્શ પ્રક્રિયા ચાલી રહી છે અને વિવિધ પક્ષો તરફથી મળેલા પ્રતિભાવો તથા સૂચનોનો ઝીણવટભરો અભ્યાસ કર્યા બાદ જ અંતિમ નિર્ણય લેવામાં આવશે.
વધુ સમાચાર વાંચવા માટે અંહી ક્લિક કરો
