Trump to Iran:અમેરિકાના પ્રમુખ ડોનાલ્ડ ટ્રમ્પે ઈરાન સામે ચાલી રહેલા સૈન્ય અભિયાન વચ્ચે એક મોટું અને આક્રમક નિવેદન આપ્યું છે. ટ્રમ્પે સ્પષ્ટ શબ્દોમાં જણાવ્યું છે કે ઈરાન સાથે હવે ‘બિનશરતી શરણાગતિ’ (Unconditional Surrender) સિવાય બીજી કોઈ પણ પ્રકારની સમજૂતી કે ડીલ કરવામાં આવશે નહીં.
Trump to Iran: “Make Iran Great Again” – ટ્રમ્પનો નવો નારો
ટ્રમ્પે સોશિયલ મીડિયા પર પોસ્ટ કરીને વૈશ્વિક રાજકારણમાં ગરમાવો લાવી દીધો છે. તેમણે લખ્યું કે, “એકવાર ઈરાન શરણાગતિ સ્વીકારે અને ત્યાં એક નવું, સ્વીકાર્ય નેતૃત્વ સત્તા પર આવે, ત્યારબાદ અમેરિકા અને તેના સાથી દેશો ઈરાનને વિનાશમાંથી બહાર લાવવા મદદ કરશે.” તેમણે વધુમાં ઉમેર્યું કે આ સહયોગથી ઈરાનને આર્થિક રીતે મજબૂત બનાવવામાં આવશે અને ઈરાનને ફરીથી મહાન બનાવો એટલે કે “Make Iran Great Again” (MIGA!) ના નારા સાથે તેનું નવનિર્માણ કરાશે.
Trump to Iran:ઈરાનનું સૈન્ય માળખું ભાંગી પડ્યું હોવાનો દાવો
ટ્રમ્પે દાવો કર્યો છે કે અમેરિકા અને ઈઝરાયેલના સંયુક્ત હુમલાઓએ ઈરાનની કમર તોડી નાખી છે:
- ઇન્ફ્રાસ્ટ્રક્ચર તબાહ: ઈરાનની 60% મિસાઈલ પ્રણાલી અને 64% લોન્ચ ઈન્ફ્રાસ્ટ્રક્ચર અત્યાર સુધીમાં નેસ્તનાબૂદ થઈ ચૂક્યું છે.
- ત્વરિત કાર્યવાહી: ટ્રમ્પના મતે, ઈરાનની મિસાઈલ સિસ્ટમ કાર્યરત થાય તેની માત્ર 4 મિનિટમાં જ તેને શોધીને તબાહ કરી દેવામાં આવે છે.
- વાયુ સેનાને નુકસાન: ઈરાનની એર ડિફેન્સ સિસ્ટમ અને વાયુ સેનાનો મોટો હિસ્સો નાશ પામ્યો છે.
‘હવે ઘણું મોડું થઈ ગયું છે’
ઈન્ટર મિયામી સીએફના સન્માન સમારોહમાં ટ્રમ્પે ખુલાસો કર્યો હતો કે ઈરાન હવે સામેથી ફોન કરીને સમજૂતી માટે રસ્તો માંગી રહ્યું છે. જોકે, ટ્રમ્પે તેમને કહી દીધું છે કે હવે સમજૂતી માટે ઘણું મોડું થઈ ગયું છે. અમેરિકા અને ઈઝરાયેલ નિર્ધારિત સમય કરતાં વધુ ઝડપથી દુશ્મનની તાકાતને ખતમ કરી રહ્યા છે.
ટ્રમ્પના આ નિવેદનથી સ્પષ્ટ થાય છે કે તેઓ ઈરાનમાં સંપૂર્ણ સત્તા પરિવર્તન (Regime Change) ઈચ્છી રહ્યા છે અને ત્યાં સુધી યુદ્ધ વિરામ કે કોઈ પણ ડીલના મૂડમાં નથી.
