Tragedy near Dhoraji: રાજકોટ જિલ્લાના ધોરાજી પંથકમાં આજે એક મોટી દુર્ઘટના સર્જાઈ છે. ધાંગધ્રાથી ધોરાજી તરફ આવી રહેલી એક ખાનગી ટ્રાવેલ્સની બસની એક્સલ અચાનક ભાંગી પડતા ડ્રાઈવરે સ્ટિયરિંગ પરથી કાબૂ ગુમાવ્યો હતો, જેને પગલે બસે ત્રણ પલટી ખાઈને માર્ગ પર ફંગોળાઈ ગઈ હતી. આ અકસ્માતમાં બસમાં સવાર 22 મુસાફરો ઘાયલ થયા છે, જે પૈકી 4 ની હાલત અત્યંત નાજુક હોવાનું જાણવા મળ્યું છે.
Tragedy near Dhoraji:એક્સલ તૂટતા જ સર્જાયો ધડાકો, ચીસાચીસથી હાઈવે ગુંજી ઉઠ્યો
મળતી માહિતી મુજબ, મુસાફરો પોતાના સ્વજનના ફૂલ પધરાવીને રાધનપુર બાજુથી પરત ફરી રહ્યા હતા ત્યારે ધોરાજીની ‘ડ્રીમ્સ સ્કૂલ’ પાસે બસની એક્સલ તૂટવાનો ભયાનક ધડાકો થયો હતો. જોતજોતામાં બસ ડ્રાઈવરના કાબૂ બહાર ગઈ હતી અને બે થી ત્રણ પલ્ટીઓ ખાઈને રસ્તા કિનારે ઝાડવામાં ફસાઈ ગઈ હતી. અકસ્માત સર્જાતા જ મુસાફરોમાં મરણચીસો ફાટી નીકળી હતી. સ્થાનિક લોકોએ તાત્કાલિક ઘટનાસ્થળે પહોંચી બચાવ કામગીરી શરૂ કરી હતી.
Tragedy near Dhoraji: હોસ્પિટલમાં દોડધામ: 4 ગંભીર ઈજાગ્રસ્તો જૂનાગઢ રિફર
અકસ્માતમાં ઘાયલ થયેલા તમામ 22 મુસાફરોને તાત્કાલિક ધોરાજીની સિવિલ હોસ્પિટલ ખાતે ખસેડવામાં આવ્યા હતા.
- કુલ ઈજાગ્રસ્ત: 22 મુસાફરો (મહિલાઓ, પુરુષો અને વૃદ્ધો)
- ગંભીર હાલત: 4 મુસાફરો (વધુ સારવાર માટે જૂનાગઢ હોસ્પિટલ ખસેડાયા)
Tragedy near Dhoraji:પૂર્વ ધારાસભ્ય અને પોલીસ કાફલો દોડી આવ્યો
અકસ્માતની જાણ થતા જ પૂર્વ ધારાસભ્ય લલિત વસોયા સિવિલ હોસ્પિટલ પહોંચ્યા હતા અને ઈજાગ્રસ્તોની મુલાકાત લીધી હતી. તેમણે જણાવ્યું હતું કે, હોસ્પિટલનો સ્ટાફ પૂરતી તત્પરતાથી સારવાર કરી રહ્યો છે અને સ્થાનિક સામાજિક સંસ્થાઓ પણ મદદમાં જોડાઈ છે. બીજી તરફ, એસ.પી. અને પી.આઈ. સહિતનો પોલીસ કાફલો ઘટનાસ્થળે પહોંચી અકસ્માત અંગેની વધુ તપાસ હાથ ધરી છે.
મુસાફરોની આપવીતી: “અમે તો સૂતા હતા અને અચાનક…”
બસમાં સવાર શારદાબેને જણાવ્યું કે, “અમે કાકાના ફૂલ પધરાવીને આવતા હતા અને બધા સૂતા હતા. અચાનક શું થયું તેની ખબર જ ન પડી અને ગાડી ત્રણ પલ્ટી ખાઈને ઝાડ સાથે અથડાઈ ગઈ.” અન્ય એક મુસાફર કરનભાઈએ જણાવ્યું કે, મોટો ધડાકો થયો અને ગાડી ડ્રાઈવરના કાબૂમાં રહી નહોતી.
વધુ સમાચાર વાંચવા માટે અંહી ક્લિક કરો : મિડલ ઈસ્ટમાં મહાયુદ્ધના મંડાણ? અમેરિકા-ઇઝરાયલનો ઈરાનના ન્યુક્લિયર પ્લાન્ટ પર ભીષણ હુમલો
