Surat Scam Alert: શહેરમાં હાલ કોમર્શિયલ ગેસ સિલિન્ડરની સર્જાયેલી અછતનો ફાયદો ઉઠાવી, હોટેલ અને રેસ્ટોરન્ટ સંચાલકોને શિકાર બનાવતા એક શાતિર ઠગને સરથાણા પોલીસે ઝડપી પાડ્યો છે. સોશિયલ મીડિયાના માધ્યમથી ડેટા મેળવી ‘સસ્તા ગેસ’ની જાળ બિછાવનાર કેવલ માવજીભાઈ તેજાણી હવે પોલીસના સકંજામાં છે.
Surat Scam Alert: સોશિયલ મીડિયાની રીલ્સ બની હતી હથિયાર
પકડાયેલ આરોપી કેવલ તેજાણી અત્યંત મગજશક્તિ ધરાવતો ગુનેગાર છે. તેની મોડસ ઓપરેન્ડી (ગુનો કરવાની રીત) જાણીને પોલીસ પણ ચોંકી ઉઠી હતી:
- ડેટા કલેક્શન: આરોપી ઇન્સ્ટાગ્રામ અને ફેસબુક પર ખાણી-પીણીની હોટેલોની ‘રીલ્સ’ જોતો હતો.
- ટાર્ગેટ: રીલ્સમાં દેખાતા હોટેલના બોર્ડ કે બેનર પરથી માલિકોના મોબાઈલ નંબર મેળવી લેતો હતો.
- લાલચ: ગેસની અછતનો લાભ લઈ તે સંચાલકોને ફોન કરી ‘હું તમને સસ્તામાં ગેસ સિલિન્ડર બુક કરી આપીશ’ તેવી લાલચ આપતો હતો.
Surat Scam Alert: ઓનલાઇન પેમેન્ટ મેળવી થઈ જતો રફુચક્કર
જ્યારે કોઈ હોટેલ સંચાલક તેની વાતોમાં આવી જતું, ત્યારે આરોપી ભરોસો જીતવા માટે ઓનલાઇન બુકિંગના બહાને સ્કેનર (QR Code) મોકલતો હતો. એકવાર નાણાં ખાતામાં ટ્રાન્સફર થઈ ગયા બાદ, તે ગેસના બાટલા આપવાને બદલે પોતાનો ફોન બંધ કરી સંપર્ક તોડી નાખતો હતો.
Surat Scam Alert: પોલીસે આ રીતે દબોચ્યો
સરથાણા પોલીસ સ્ટેશનના પીઆઈ ડી.એસ. કોરાટના માર્ગદર્શન હેઠળ સર્વેલન્સ સ્ટાફે તપાસના ચક્રો ગતિમાન કર્યા હતા. ટેકનિકલ સર્વેલન્સ અને હ્યુમન ઇન્ટેલિજન્સની મદદથી વોચ ગોઠવી, પોલીસે આરોપીને ખોડીયારનગર રોડ પરથી ઝડપી પાડ્યો હતો.
પોલીસની અપીલ: કોઈપણ અજાણી વ્યક્તિ સાથે સોશિયલ મીડિયા કે ફોન પર નાણાકીય વ્યવહાર કરતા પહેલા તેની ખરાઈ કરવી અત્યંત જરૂરી છે. ગેસ સિલિન્ડર જેવી આવશ્યક ચીજવસ્તુઓ હંમેશા અધિકૃત એજન્સી પાસેથી જ મેળવવી.
વધુ સમાચાર વાંચવા માટે અંહી ક્લિક કરો
