Shocking Cruelty: શહેરના જામનગર રોડ પર આવેલા ઘંટેશ્વર વિસ્તારમાં એક ચોંકાવનારી ઘટના સામે આવી છે, જ્યાં પાડોશમાં રહેતા પિતા-પુત્રએ અબોલ શ્વાન પર અત્યંત નિર્દયતાથી હુમલો કર્યો હતો. શ્વાન ભસતું હોવાની સામાન્ય બાબતે ઉશ્કેરાયેલા પિતા-પુત્રએ માનવતા નેવે મૂકીને લાકડી અને પાઈપ વડે હુમલો કરતા સમગ્ર પંથકમાં રોષ જોવા મળી રહ્યો છે.
Shocking Cruelty: શું છે સમગ્ર ઘટના?
ઘંટેશ્વરના કલ્યાણ પાર્ક શેરી નંબર-4માં રહેતા ક્રિષ્નાબેન પરમાર છેલ્લા અઢી વર્ષથી એક શ્વાન પાળી રહ્યા છે. ગઈકાલે તેમનું શ્વાન ઘરના ડેલા પાસે બાંધેલું હતું, ત્યારે જ પાડોશમાં રહેતા મહેન્દ્રસિંહ જાડેજા અને તેમનો પુત્ર અભિરાજસિંહ અચાનક લાકડી અને પાઈપ લઈને ધસી આવ્યા હતા.
Shocking Cruelty: 21 સેકન્ડનો અત્યાચાર
સીસીટીવી કેમેરામાં કેદ થયેલા દ્રશ્યો મુજબ, પિતા-પુત્રની જોડીએ માત્ર 21 સેકન્ડમાં અબોલ જીવ પર 26 જેટલા ફટકા ઝીંક્યા હતા. શ્વાન જીવ બચાવવા તરફડિયાં મારી રહ્યું હતું છતાં હુમલાખોરોએ તેના પર સહેજ પણ દયા બતાવી નહોતી.
બચાવવા ગયેલી મહિલા સાથે પણ ગેરવર્તન
શ્વાનનો અવાજ સાંભળી માલિક ક્રિષ્નાબેન જ્યારે બચાવવા માટે વચ્ચે પડ્યા, ત્યારે હુમલાખોરોએ તેમને પણ ધક્કો મારી માર મારવાનો અને ડરાવવાનો પ્રયાસ કર્યો હતો. આ હુમલામાં શ્વાન ગંભીર રીતે ઇજાગ્રસ્ત થયું છે અને તેને સારવાર હેઠળ ખસેડવામાં આવ્યું છે.
“જો કોઈ અબોલ જીવને સાચવી ન શકીએ તો કાંઈ નહીં, પણ કોઈને આ રીતે મારવાનો કોઈને અધિકાર નથી.” > — ક્રિષ્નાબેન પરમાર (શ્વાનના માલિક)
પોલીસ કાર્યવાહીની માંગ
આ અમાનવીય ઘટનાના સીસીટીવી ફૂટેજ વાયરલ થતા લોકોમાં ભારે આક્રોશ ફેલાયો છે. ક્રિષ્નાબેને આ મામલે યુનિવર્સિટી પોલીસ સ્ટેશનમાં ફરિયાદ નોંધાવવાની તજવીજ હાથ ધરી છે. પ્રાણીપ્રેમીઓ અને સ્થાનિકો દ્વારા માગ કરવામાં આવી છે કે આ ક્રૂર હુમલાખોરો વિરુદ્ધ કડક કાયદેસરની કાર્યવાહી કરવામાં આવે.
વધુ સમાચાર વાંચવા માટે અંહી ક્લિક કરો: કોણ કરી રહ્યું છે દુનિયાના શ્રેષ્ઠ મગજોનો શિકાર? અમેરિકા-ચીનના 20 ટોચના વૈજ્ઞાનિકો ગાયબ કે મૃત, વૈશ્વિક ફફડાટ
