બેંગ્લોરનો ૧૧૨ રને ભવ્ય વિજય, રાજસ્થાન માત્ર ૫૯ રનમાં ઓલઆઉટ!
બેંગ્લોર – ૧૭૧/૫, રાજસ્થાન – ૫૯/૧૦
જયપુર ખાતે રમાયેલી આઈપીએલ ૨૦૨૩ની ૬૦મી મેચમાં રોયલ ચેલેન્જર્સ બેંગ્લોરના બોલર્સના ભવંડર સામે રાજસ્થાન ક્યાંય ખોવાઈ ગયું છે. આ મેચમાં રાજસ્થાન માત્ર ૫૯ રનના સ્કોરે ઓલ આઉટ થઇ ગયું છે અને બેંગલોરે ૧૧૨ રને ભવ્ય વિજય હાંસલ કર્યો છે. આ મેચમાં રોયલ ચેલેન્જર્સ બેંગલોરે ટોસ જીતીને પ્રથમ બેટિંગ કરવાનો નિર્ણય કર્યો હતો. જેમાં આરસીબી તરફથી ડુપ્લેસીએ ૫૫ રન, મેક્સવેલે ૫૪ રન અને અનુજ રાવતે ૨૯ રન ફટકાર્યા હતા. આમ બેંગ્લોરે ૨૦ ઓવરમાં ૫ વિકેટના ભોગે ૧૭૧ રન ફટકાર્યા હતા. જોકે, ત્યારબાદ ૧૭૨ રનના લક્ષ્યનો પીછો કરવા ઉતરેલી રાજસ્થાનની ટીમે બેટિંગમાં કંગાળ પ્રદર્શન કર્યું હતું. આ મેચમાં બેંગ્લોરના બોલર્સે રાજસ્થાનના બેટ્સમેનોને થોડીક પણ ફાવટ થવા દીધી નહોતી. રાજસ્થાનની ટીમ ૧૦.૩ ઓવરમાં માત્ર ૫૯ રનના સ્કોરે પેવેલિયન પરત ફરી ચૂકી હતી. આમ હોમગ્રાઉન્ડમાં કારમો પરાજય થતા રાજસ્થાનના દર્શકોમાં પણ ભારે નિરાશા જોવા મળી હતી. રાજસ્થાન તરફથી ઝેમ્પાએ અને આસિફે ૨-૨ વિકેટ ઝડપી હતી. જ્યારે બેંગ્લોર તરફથી પાર્નેલે ૩ અને બ્રેસવેલ-કરન શર્માએ ૨-૨ વિકેટ ઝડપી હતી. આમ આ મેચમાં જીતની સાથે આરસીબીની નેગેટીવ રનરેટ હવે પોઝીટીવમાં બદલાઈ ચૂકી છે. આરસીબી હજુ પણ પ્લેઓફમાં પ્રવેશવાની દાવેદાર છે. જયારે રાજસ્થાન માટે હવે રસ્તો મુશ્કેલ છે.
