New Dawn in Keralam: કેરલમ વિધાનસભા ચૂંટણીના પરિણામો બાદ હવે રાજ્યમાં નવી સરકારનો સૂર્યોદય થવા જઈ રહ્યો છે. કોંગ્રેસના નેતૃત્વવાળા યુનાઇટેડ ડેમોક્રેટિક ફ્રન્ટ (UDF) એ રાજ્યની 140 બેઠકોમાંથી 102 બેઠકો પર ઐતિહાસિક અને પ્રચંડ વિજય મેળવ્યો છે. આ ભવ્ય વિજય બાદ, મુખ્યમંત્રી પદ માટે નામાંકિત થયેલા વરિષ્ઠ કોંગ્રેસ નેતા વી.ડી. સતીશન આજે સવારે 10 વાગ્યે તિરુવનંતપુરમના સેન્ટ્રલ સ્ટેડિયમ ખાતે પોતાના મંત્રીમંડળ સાથે પદ અને ગુપ્તતાના શપથ લેશે.
New Dawn in Keralam: શપથગ્રહણમાં કોંગ્રેસના દિગ્ગજો અને વિપક્ષી નેતાઓનો જમાવડો
આ ભવ્ય શપથગ્રહણ સમારોહને રાષ્ટ્રીય સ્તરે શક્તિ પ્રદર્શન તરીકે જોવામાં આવી રહ્યો છે. આ અવસરે કોંગ્રેસ અધ્યક્ષ મલ્લિકાર્જુન ખડગે, લોકસભાના સાંસદ રાહુલ ગાંધી અને પાર્ટીના રાષ્ટ્રીય મહાસચિવ પ્રિયંકા ગાંધી વાડ્રા ખાસ ઉપસ્થિત રહેશે. આ ઉપરાંત કોંગ્રેસ શાસિત રાજ્યો કર્ણાટક, તેલંગાણા અને હિમાચલ પ્રદેશના મુખ્યમંત્રીઓ પણ આ ગૌરવપૂર્ણ ક્ષણના સાક્ષી બનશે. તમિલનાડુના મુખ્યમંત્રી વિજયનને પણ આ કાર્યક્રમ માટે ખાસ આમંત્રણ આપવામાં આવ્યું છે.
New Dawn in Keralam: ગઠબંધનના સમીકરણો સાથે 21 સભ્યોનું ‘પૂર્ણ કેબિનેટ‘
નિયુક્ત મુખ્યમંત્રી વી.ડી. સતીશને રવિવારે રાજ્યપાલ રાજેન્દ્ર આર્લેકર સાથે મુલાકાત કરીને પોતાના સહયોગીઓની અંતિમ યાદી સોંપી દીધી હતી. પ્રાદેશિક અને ગઠબંધનનું સંતુલન જાળવવા માટે 21 સભ્યોના આ મંત્રીમંડળમાં અનુભવી નેતાઓ અને યુવા ચહેરાઓનો અદ્ભુત તાલમેલ રાખવામાં આવ્યો છે. ગઠબંધનની શરતો મુજબ, આ કેબિનેટમાં બે મહિલાઓ અને અનુસૂચિત જાતિ (SC) સમુદાયના બે સભ્યો સહિત 14 નવ-ચૂંટાયેલા સભ્યોને સ્થાન મળ્યું છે.
ગઠબંધનના મુખ્ય સાથી પક્ષ ‘ઇન્ડિયન યુનિયન મુસ્લિમ લીગ’ (IUML)ને પાંચ કેબિનેટ બેઠકો આપવામાં આવી છે. IUMLના પ્રદેશ અધ્યક્ષ સૈયદ સાદિક અલી શિહાબ થંગલે જાહેરાત કરી છે કે પ્રાદેશિક સંતુલન જાળવી રાખવા માટે સરકારનો અડધો કાર્યકાળ પૂરો થયા પછી અનુભવી નેતા પરક્કલ અબ્દુલ્લાને પણ મંત્રીમંડળમાં સામેલ કરવામાં આવશે.
New Dawn in Keralam: ભવ્ય જીત વચ્ચે સતીશનની થોડી નિરાશા
આ ઐતિહાસિક જીત છતાં, નિયુક્ત મુખ્યમંત્રી વી.ડી. સતીશને મંત્રીમંડળમાં કોંગ્રેસને મળેલા મર્યાદિત અવસરો અંગે થોડી નિરાશા વ્યક્ત કરી છે. સૂત્રોના જણાવ્યા અનુસાર, સતીશને એ વાત પર ભાર મૂક્યો હતો કે આ ચૂંટણીમાં કોંગ્રેસે એકલા હાથે 63 બેઠકો પર શાનદાર વિજય મેળવ્યો છે, પરંતુ ગઠબંધનની પ્રતિબદ્ધતાઓ અને સત્તાની વહેંચણીના નિયમોના કારણે પાર્ટીના માત્ર 11 સભ્યોને જ (સતીશન ઉપરાંત 10) મંત્રીમંડળમાં સ્થાન આપી શકાયું છે.
જો કે, આ તમામ રાજકીય સમીકરણો વચ્ચે આ શપથ ગ્રહણ સાથે કેરલમમાં UDF સરકારના એક નવા પ્રગતિશીલ રાજકીય અધ્યાયની શરૂઆત થવા જઈ રહી છે.
વધુ સમાચાર વાંચવા માટે અંહી ક્લિક કરો: ઇન્ડિગો ફ્લાઇટમાં ‘અંધારપટ’ અને અસહ્ય ગરમી વડોદરા-દિલ્હી ફ્લાઇટનું AC-લાઇટો ગુલ થતા મુસાફરો ગૂંગળાયા
