NEET 2026: મેડિકલમાં પ્રવેશ માટેની પ્રતિષ્ઠિત NEET (UG) 2026 પરીક્ષા રવિવારે દેશભરમાં યોજાઈ હતી. જોકે, સુરતમાં એક પરીક્ષા કેન્દ્ર પર ચુસ્ત ડ્રેસ કોડના અમલીકરણ દરમિયાન ભારે હંગામો જોવા મળ્યો હતો. કેન્દ્ર પર સુરક્ષાના નિયમો મુજબ એક વિદ્યાર્થીનીને તેની કંઠી ઉતારવા જણાવતા વિવાદ સર્જાયો હતો. આ દરમિયાન વિદ્યાર્થીની રડી પડી હતી અને તેણે વિનંતી કરી હતી કે “એક્ઝામમાં મોડું થાય છે,” જ્યારે હાજર અન્ય લોકોએ વાલીઓને ટોક્યા હતા કે તમે દીકરીની પરીક્ષા બગાડી રહ્યા છો.
NEET 2026: ગુજરાતમાં 85,000 થી વધુ વિદ્યાર્થીઓ મેદાનમાં
નેશનલ ટેસ્ટિંગ એજન્સી (NTA) દ્વારા આયોજિત આ પરીક્ષામાં દેશભરમાંથી 23 લાખથી વધુ ઉમેદવારોએ નોંધણી કરાવી છે. ગુજરાતમાં અમદાવાદ, સુરત, રાજકોટ અને વડોદરા સહિત 31 શહેરોમાં પરીક્ષા કેન્દ્રો ફાળવવામાં આવ્યા હતા, જ્યાં 85,000 થી વધુ વિદ્યાર્થીઓએ ભવિષ્યના ડૉક્ટર બનવા માટે કસોટી આપી હતી. એકલા અમદાવાદ અને ગાંધીનગરમાંથી જ 12,000 જેટલા વિદ્યાર્થીઓ હાજર રહ્યા હતા.
NEET 2026: તાપમાં વિદ્યાર્થીઓ અને વાલીઓની કસોટી
બપોરે 2 થી 5 વાગ્યા સુધી ચાલેલી આ પરીક્ષા માટે કેન્દ્રો પર સવારે 11 વાગ્યાથી જ પ્રવેશ શરૂ કરી દેવામાં આવ્યો હતો. 1:30 વાગ્યા બાદ કોઈને પણ પ્રવેશ ન આપવાની કડક સૂચનાને પગલે કેન્દ્રો પર સવારથી જ લાંબી કતારો જોવા મળી હતી. આકરા ઉનાળાના તાપમાં વિદ્યાર્થીઓની સાથે બહાર બેઠેલા વાલીઓની પણ ભારે કસોટી થઈ હતી.
NEET 2026: આજનો ‘પરીક્ષા રવિવાર’
આજે માત્ર NEET જ નહીં, પરંતુ અન્ય મહત્વની સ્પર્ધાત્મક પરીક્ષાઓનો પણ ત્રિવેણી સંગમ જોવા મળ્યો હતો:
- NEET-UG: બપોરે 2 થી 5 વાગ્યા સુધી.
- TAT-1 (પ્રિલિમ્સ): ધોરણ 9 અને 10 ના શિક્ષકો માટે બપોરે 3 થી 6 વાગ્યા સુધી.
- GPSC: વિવિધ પદો માટે સવારે 11 થી 1 વાગ્યા સુધી.
NEET 2026: સુરતની ઘટના અને કડક નિયમો
NEET પરીક્ષામાં કોઈપણ પ્રકારની ગેરરીતિ રોકવા માટે NTA દ્વારા દાગીના, મેટલની વસ્તુઓ અને ચોક્કસ પ્રકારના કપડાં પર પ્રતિબંધ હોય છે. સુરતમાં કંઠી ઉતારવા બાબતે થયેલો હોબાળો આ જ કડક નિયમોનું પરિણામ હતો. વાલીઓએ ધાર્મિક લાગણી દુભાતી હોવાની દલીલ કરી હતી, જ્યારે તંત્રએ નિયમોનું પાલન કરાવવા પર ભાર મૂક્યો હતો.
પરીક્ષાની આંકડાકીય વિગત:
| વિગત | માહિતી |
| કુલ ઉમેદવારો (ભારત) | 23 લાખથી વધુ |
| ગુજરાતના ઉમેદવારો | 85,000 થી વધુ |
| પરીક્ષાના શહેરો (ગુજરાત) | 31 શહેરો |
| સમય મર્યાદા | બપોરે 2:00 થી સાંજે 5:00 |
| રિપોર્ટિંગ ટાઈમ | સવારે 11:00 થી 1:30 વાગ્યા સુધી |
વધુ સમાચાર વાંચવા માટે અંહી ક્લિક કરો
