Middle-East Crisis: મિડલ-ઈસ્ટમાં અમેરિકા અને ઈરાન વચ્ચેનો સંઘર્ષ હવે સંપૂર્ણ યુદ્ધ જેવી સ્થિતિમાં પહોંચી ગયો છે. અમેરિકા દ્વારા ઈરાનના લગભગ 140 સૈન્ય ઠેકાણાઓ પર કરાયેલા ભીષણ બોમ્બમારાના જવાબમાં ઈરાને રવિવારે વળતો પ્રહાર કરતા પાંચ દેશો—જોર્ડન, કુવૈત, બહેરીન, કતાર અને UAEમાં આવેલા અમેરિકી સૈન્ય મથકોને નિશાન બનાવ્યા છે.
Middle-East Crisis: હુમલાની ઘટનાક્રમ: 5 દેશોમાં એકસાથે એક્શન
અમેરિકી સેન્ટ્રલ કમાન્ડ (CENTCOM) ના જણાવ્યા અનુસાર, આ સંઘર્ષની શરૂઆત હોર્મુઝ સ્ટ્રેટમાં સાયપ્રસના ધ્વજવાળા એક કન્ટેનર જહાજ પર ઈરાનના હુમલા બાદ થઈ હતી. આ હુમલામાં જહાજને ભારે નુકસાન થયું હતું અને એક ક્રૂ મેમ્બર ગુમ થયો હતો. જેના જવાબમાં અમેરિકાએ ઈરાનના 140 જેટલા સૈન્ય ઠેકાણાઓને નિશાન બનાવી બોમ્બમારો કર્યો હતો.
ઈરાને આ હુમલાનો જવાબ આપતા:
- જોર્ડન: પ્રિન્સ હસન એરબેઝ પર ત્રણ બેલિસ્ટિક મિસાઈલો છોડી, જેમાં કમાન્ડ સેન્ટર અને ડ્રોન હેંગરને નિશાન બનાવાયા.
- બહેરીન, કુવૈત, કતાર અને UAE: આ દેશોમાં આવેલા અમેરિકી સૈન્ય સંચાર કેન્દ્રો, પેટ્રિયટ એર ડિફેન્સ સિસ્ટમ અને રડાર સાઇટ્સ પર ડ્રોન અને મિસાઈલોથી હુમલા કર્યા.
- ઓમાન: ઓમાનના મુસંદમ અને દુક્મ બંદરગાહ પર પણ ઈરાની ડ્રોન હુમલાના અહેવાલ છે.
Middle-East Crisis: હોર્મુઝ સ્ટ્રેટ બંધ કરવાની જાહેરાત
ઈરાને આગામી આદેશ સુધી વૈશ્વિક તેલ સપ્લાય માટે અત્યંત મહત્વપૂર્ણ ગણાતા ‘હોર્મુઝ સ્ટ્રેટ’ને બંધ કરવાની જાહેરાત કરી છે. ઈરાનનું કહેવું છે કે હવે અહીં જહાજોની અવરજવર માટેના તમામ નિર્ણયો ઈરાન અને ઓમાન પરસ્પર ચર્ચા કરીને જ લેશે. ઉલ્લેખનીય છે કે વિશ્વનું 20% ક્રૂડ ઓઈલ આ જ માર્ગેથી પસાર થાય છે, જેથી આ નિર્ણય વૈશ્વિક અર્થતંત્ર પર મોટી અસર કરી શકે છે.
Middle-East Crisis: તણાવ વધારતા 4 મુખ્ય અપડેટ્સ:
- બદલાની ભાવના: નવા સુપ્રીમ લીડર મુજતબા ખામેનેઈએ પોતાના પિતા અને યુદ્ધમાં માર્યા ગયેલા લોકોના મોતનો બદલો લેવાની જાહેરાત કરી છે.
- પરમાણુ કાર્યક્રમ: CNNના અહેવાલ મુજબ, સેટેલાઇટ તસવીરોમાં ઈરાન ફરીથી પારચિન સહિતની ન્યુક્લિયર સાઇટ્સનું નિર્માણ કરતું જોવા મળ્યું છે.
- અમેરિકા-ઈરાન ટકરાવ: ઈરાની વિદેશ મંત્રી અબ્બાસ અરાઘચીએ અમેરિકા પર કરાર તોડવાનો આરોપ લગાવ્યો છે.
- ટ્રમ્પની ચેતવણી: ડોનાલ્ડ ટ્રમ્પે ઈરાનને ખુલ્લી ચેતવણી આપતા કહ્યું છે કે જો ઈરાન હુમલા કરશે, તો અમેરિકા હજારો મિસાઈલોનો મારો ચલાવશે.
હાલમાં સમગ્ર મિડલ-ઈસ્ટમાં યુદ્ધના વાદળો છવાયેલા છે અને આંતરરાષ્ટ્રીય સ્તરે શાંતિ સ્થાપવા માટે ભારે દબાણ વધી રહ્યું છે.
વધુ સમાચાર વાંચવા માટે અંહી ક્લિક કરો
