‘Melodi’ Diplomacy: વડાપ્રધાન નરેન્દ્ર મોદી પોતાના પાંચ દેશોના પ્રવાસના અંતિમ તબક્કામાં મંગળવારે ઈટાલી પહોંચ્યા છે, જ્યાં ઈટાલીના પીએમ જ્યોર્જિયા મેલોનીએ તેમનું ભવ્ય સ્વાગત કર્યું હતું. બંને નેતાઓ વચ્ચેની આ મુલાકાત માત્ર રાજદ્વારી રીતે જ નહીં, પરંતુ સોશિયલ મીડિયા પર પણ ભારે ચર્ચા જગાવી રહી છે. સોશિયલ મીડિયા પર વાઇરલ થઈ રહેલી બંને નેતાઓની મિત્રતા અને તસવીરોએ વૈશ્વિક સ્તરે લોકોનું ધ્યાન ખેંચ્યું છે.
‘Melodi’ Diplomacy: મોદીએ આપી ‘મેલોડી’ ટોફી, મેલોનીએ કહ્યું- થેંક્યુ!
આ મુલાકાતની સૌથી રસપ્રદ ક્ષણ ત્યારે સામે આવી જ્યારે પીએમ મોદીએ ઈટાલીના વડાપ્રધાન જ્યોર્જિયા મેલોનીને ભારતની પ્રખ્યાત ‘મેલોડી’ ટોફી ગિફ્ટ કરી. પીએમ મેલોનીએ સોશિયલ મીડિયા પ્લેટફોર્મ ‘X’ (ટ્વિટર) પર આ વીડિયો પોસ્ટ કરીને ખુશી વ્યક્ત કરી હતી. તેમણે લખ્યું, “વડાપ્રધાન મોદી મારા માટે ગિફ્ટમાં ખૂબ જ સરસ ટોફી લઈને આવ્યા- મેલોડી. ગિફ્ટ માટે થેંક્યુ.”
‘Melodi’ Diplomacy: એક જ કારમાં સવારી અને કોલોસિયમમાં સેલ્ફી
આ સત્તાવાર પ્રવાસ દરમિયાન બંને નેતાઓ વચ્ચે અદભૂત બોન્ડિંગ જોવા મળ્યું હતું. પીએમ મોદી અને જ્યોર્જિયા મેલોનીએ રોમના રસ્તાઓ પર એક જ કારમાં સાથે સવારી કરી હતી. એટલું જ નહીં, તેઓ રોમના અંદાજે 2000 વર્ષ જૂના ઐતિહાસિક કોલોસિયમ (Colosseum)ની મુલાકાતે પણ ગયા હતા, જ્યાં પીએમ મેલોનીએ મોદી સાથે સેલ્ફી શેર કરતા લખ્યું હતું, “વેલકમ માય ફ્રેન્ડ.” અગાઉ બંને નેતાઓએ સાથે ડિનર પણ લીધું હતું અને અનેક મહત્ત્વના મુદ્દાઓ પર અનૌપચારિક વાતચીત કરી હતી.
‘Melodi’ Diplomacy: ભારત-ઈટાલી વચ્ચે ‘સ્પેશિયલ સ્ટ્રેટેજિક પાર્ટનરશીપ’ પર નજર
પીએમ મોદીએ ટ્વિટ કરીને જણાવ્યું કે આગામી ઔપચારિક વાતચીતમાં ભારત-ઈટાલી મિત્રતાને વધુ મજબૂત કરવા અંગે ચર્ચા ચાલુ રહેશે. આ પ્રવાસ દરમિયાન બંને દેશો પોતાના દ્વિપક્ષીય સંબંધોને વધુ મજબૂત બનાવતા તેને ‘સ્પેશિયલ સ્ટ્રેટેજિક પાર્ટનરશીપ’નો દરજ્જો આપવા અંગે ચર્ચા કરી શકે છે. બંને દેશો વચ્ચે હવે વાર્ષિક નિયમિત બેઠકો શરૂ કરવા પર પણ વિચારણા થઈ રહી છે. સંરક્ષણ, ગ્રીન એનર્જી, વિજ્ઞાન અને નવી ટેકનોલોજીના ક્ષેત્રમાં સતત સહયોગ વધી રહ્યો છે.
‘Melodi’ Diplomacy: 14 અબજ યુરોનો વેપાર
છેલ્લા કેટલાક વર્ષોમાં ભારત અને ઈટાલી વચ્ચેના આર્થિક સંબંધોમાં ભારે તેજી આવી છે. હાલમાં બંને દેશો વચ્ચેનો દ્વિપક્ષીય વેપાર 14 અબજ યુરો (આશરે ₹14 લાખ કરોડ) થી વધુનો છે. આગામી સમયમાં બંને દેશો મેન્યુફેક્ચરિંગ, ઓટોમોબાઈલ, મશીનરી, ફાર્મા અને સંરક્ષણ ક્ષેત્રમાં વધુ રોકાણ વધારવા માટે સત્તાવાર મંત્રણા કરશે.
વધુ સમાચાર વાંચવા માટે અંહી ક્લિક કરો
અમદાવાદના અખબારનગરમાં NRI દંપતીના ઘરે લાખોની ચોરી, ઘરકામ કરતી મહિલા શંકાના દાયરામાં
