Justice Delivered After Five Years: વર્ષ ૨૦૨૧માં સમગ્ર ગુજરાતમાં ચકચાર મચાવનાર કરજણના ચકચારી સ્વીટી પટેલ હત્યા કેસમાં વડોદરાની કરજણ કોર્ટે મોટો અને ઐતિહાસિક ચુકાદો આપ્યો છે. કોર્ટે મુખ્ય આરોપી અને હત્યા કરનાર તત્કાલીન પોલીસ ઇન્સ્પેક્ટર (PI) એ.એ. દેસાઈને દોષિત ઠેરવીને આજીવન કેદની સજા ફટકારી છે. જ્યારે હત્યાના કાવતરામાં અને પુરાવાનો નાશ કરવામાં સાથ આપનાર સહ-આરોપી કિરીટસિંહ જાડેજાને કોર્ટે ૫ વર્ષની કેદની સજા સંભળાવી છે.
Justice Delivered After Five Years: શું હતી સમગ્ર ઘટના? (પ્રેમ, લગ્ન અને વિવાદ)
મૂળ ઉમરેઠના પણસોરાની વતની ૩૭ વર્ષીય સ્વીટી મહેન્દ્ર પટેલના જીવનમાં અનેક ઉતાર-ચઢાવ આવ્યા હતા:
- પ્રથમ લગ્ન: સ્વીટીએ કોલેજના સમયના મિત્ર હેતસ મહેશ પંડ્યા સાથે પ્રેમ લગ્ન કર્યા હતા. તેમને બે દીકરા (રિધમ અને પ્રનિલ) થયા હતા. જોકે, કૌટુંબિક અણબનાવોને કારણે વર્ષ ૨૦૧૪માં બંનેએ પરસ્પર સહમતિથી છૂટાછેડા લીધા હતા.
- પીઆઈ અજય દેસાઈ સાથે ગાંધર્વ વિવાહ: વર્ષ ૨૦૧૫માં એક સ્કૂલના કાર્યક્રમ દરમિયાન સ્વીટીની મુલાકાત અમદાવાદ રૂલર એલઆઈબી (LIB) ના તત્કાલીન PSI અજય અમૃત દેસાઈ સાથે થઈ હતી. પ્રેમ સંબંધ બંધાતા બંનેએ ૨૦૧૬માં રૂપાલના એક મંદિરમાં ગાંધર્વ વિવાહ કર્યા હતા.
- બીજા લગ્નને કારણે વિવાદ: સ્વીટી સાથે મંદિરમાં લગ્ન કર્યા બાદ, અજય દેસાઈએ વર્ષ ૨૦૧૭માં પોતાના જ સમાજની અન્ય યુવતી સાથે સામાજિક ધોરણે બીજા લગ્ન કર્યા હતા. એક તરફ અજયની સામાજિક પત્ની હતી અને બીજી તરફ સ્વીટી, જેને કારણે બંને વચ્ચે અવારનવાર ઝઘડાઓ થવા લાગ્યા હતા.
- ત્રીજા સંતાનનો જન્મ: અણબનાવો વચ્ચે સ્વીટી ગર્ભવતી બની અને વર્ષ ૨૦૧૯માં તેણે અજય દેસાઈના પુત્રને જન્મ આપ્યો હતો. આમ, સ્વીટી ત્રણ સંતાનોની માતા બની હતી (પહેલા બે સંતાન પ્રથમ પતિથી અને ત્રીજો પુત્ર અજય દેસાઈથી).
Justice Delivered After Five Years: હત્યાનું કાવતરું અને ઘટનાની રાત્રિ
અજય દેસાઈ અને સ્વીટી કરજણની પ્રયોશા સોસાયટીના એક બંગલામાં રહેતા હતા, જ્યારે અજયની બીજી પત્ની વડોદરા રહેતી હતી. એક જ શહેરમાં બંને પત્નીઓ હોવાને કારણે અને સ્વીટી સાથેના રોજના ઝઘડાઓથી કંટાળીને અજય દેસાઈએ સ્વીટીને કાયમ માટે પોતાના માર્ગમાંથી હટાવવાનો ખતરનાક પ્લાન ઘડ્યો હતો.
- ગળું દબાવીને હત્યા: ૪ જૂન ૨૦૨૧ની રાત્રે લગ્નસંબંધોને લઈને સ્વીટી અને અજય દેસાઈ વચ્ચે મોટો ઝઘડો થયો હતો. રાત્રે ૧૨:૩૦ વાગ્યાના સુમારે પીઆઈ અજય દેસાઈએ સ્વીટીનું ગળું દબાવીને નિર્દયતાપૂર્વક હત્યા કરી નાખી હતી.
- લાશનો નિકાલ: બીજા દિવસે સવારે જાણે કંઈ જ બન્યું ન હોય તેમ, સવારે ૧૦:૪૫ વાગ્યે અજયે પોતાની કાળા રંગની કંપાસ જીપ ઘરમાં લાવીને સ્વીટીની લાશ તેમાં મૂકી દીધી હતી.
Justice Delivered After Five Years: લાશ સળગાવી અને પુરાવાનો નાશ
પત્નીની હત્યા કર્યા બાદ પીઆઈ અજય દેસાઈએ કોંગ્રેસમાંથી વિધાનસભાની ચૂંટણી લડી ચૂકેલા કિરીટસિંહ જાડેજાની મદદ લીધી હતી. સાંજે ૪ વાગ્યે તેઓ કારને કરજણથી આમોદ અને વાગરા થઈને દહેજ હાઈવે પર અટાલી લઈ ગયા હતા. ત્યાં એક અવાવરૂ હોટલની પાછળ સ્વીટીની લાશને સળગાવીને તેના પુરાવાનો નાશ કરવામાં આવ્યો હતો.
વડોદરાની કરજણ કોર્ટે ઉપરોક્ત તમામ પુરાવાઓ અને દસ્તાવેજોને આધારે તત્કાલીન પીઆઈ અજય દેસાઈને આજીવન કેદની સજા ફટકારીને ન્યાય કર્યો છે.
વધુ સમાચાર વાંચવા માટે અંહી ક્લિક કરો
