High-Voltage Love Drama: બિહારના છપરા જિલ્લાના ઇનાયતપુર પંચાયતના તકિયા ગામમાં રવિવારે એક યુવતીએ પ્રેમી સાથે લગ્ન કરવાની જીદમાં ૨૦૦ ફૂટ ઊંચા મોબાઈલ ટાવર પર ચઢી જઈ ભારે હોબાળો મચાવ્યો હતો. ઉત્તર પ્રદેશની રહેવાસી આ યુવતી લગભગ ૬ કલાક સુધી ટાવર પર રહી હતી, જેના કારણે સમગ્ર વિસ્તારમાં અફરાતફરીનો માહોલ સર્જાયો હતો.
High-Voltage Love Drama: ઇન્સ્ટાગ્રામ પર શરૂ થઈ હતી લવ સ્ટોરી
યુપીના આઝમગઢની રહેવાસી ૨૮ વર્ષીય અંજલિ રાજભરને ૩ વર્ષ પહેલાં સોશિયલ મીડિયા પ્લેટફોર્મ ઇન્સ્ટાગ્રામ દ્વારા તકિયા ગામના અજય માંઝી સાથે પ્રેમ થયો હતો. અજય દિલ્હીમાં ખાનગી કંપનીમાં નોકરી કરે છે. બંને અવારનવાર દિલ્હી અને અન્ય સ્થળોએ મળતા હતા. અંજલિએ ઇન્સ્ટાગ્રામ પર અજય સાથેના લગ્નના અને સિંદૂર લગાવતા અનેક વીડિયો પણ પોસ્ટ કર્યા હતા.
High-Voltage Love Drama: પરિવારના વિરોધ બાદ ઉગ્ર પગલું
અજયના પરિવારને જ્યારે આ સંબંધની જાણ થઈ ત્યારે તેમણે લગ્નનો સ્પષ્ટ ઈન્કાર કરી દીધો. પરિવારના દબાણમાં આવી અજયે અંજલિ સાથે વાત કરવાનું બંધ કરી દીધું હતું. આથી નારાજ થયેલી અંજલિ શનિવારે આઝમગઢથી સીધી અજયના ઘરે પહોંચી ગઈ હતી. ત્યાં પણ પરિવારજનો ન માનતા રવિવારે સવારે ૮ વાગ્યે તે ગામના મોબાઈલ ટાવર પર ચઢી ગઈ હતી.
High-Voltage Love Drama: ટાવર પરથી રીલ્સ બનાવી અને સુસાઈડ નોટ લખી
ટાવર પર ચઢ્યા બાદ અંજલિએ ઇન્સ્ટાગ્રામ માટે ૩-૪ રીલ્સ બનાવી, જેમાં તેણે ધમકી આપી હતી કે જો અજયના પરિવારજનો તેને નહીં અપનાવે તો તે નીચે કૂદીને જીવ આપી દેશે. ટાવર પર ચઢતા પહેલા તેણે એક સુસાઈડ નોટ પણ લખી હતી, જેમાં તેણે પોતાના સંભવિત મૃત્યુ માટે અજય અને તેના પરિવારને જવાબદાર ઠેરવ્યા હતા.
૬ કલાકનો ડ્રામા અને પોલીસનું રેસ્ક્યુ
આ ઘટનાની જાણ થતાં જ ઘટનાસ્થળે ૫ હજારથી વધુ લોકોની ભીડ ઉમટી પડી હતી. કાળઝાળ ગરમી અને માનસિક તણાવને કારણે અંજલિ ટાવર પર જ બેભાન થઈ ગઈ હતી. પરિસ્થિતિ ગંભીર બનતા દાઉદપુર પોલીસ અને ફાયર બ્રિગેડની ટીમ ઘટનાસ્થળે પહોંચી હતી. અંતે, એક પોલીસકર્મી અને ટાવરકર્મીએ જીવના જોખમે ઉપર ચઢી અંજલિને સુરક્ષિત રીતે નીચે ઉતારી હતી.
પોલીસ કાર્યવાહી: હાલ પોલીસ આ મામલે બંને પક્ષોની પૂછપરછ કરી રહી છે અને આગળની કાયદેસરની કાર્યવાહી હાથ ધરવામાં આવી છે. યુવતીને સુરક્ષિત નીચે ઉતારવા બદલ ગ્રામજનોએ પોલીસની કામગીરીને બિરદાવી હતી.
વધુ સમાચાર વાંચવા માટે અંહી ક્લિક કરો: ગુજરાત મહાનગરપાલિકા ચૂંટણી ગરમીના પારા વચ્ચે લોકશાહીનો ઉત્સાહ, 15 મનપામાં સરેરાશ 53% મતદાન
