વડોદરા:
Gas Cylinder Theft in Vadodara: શહેરમાં સામાન્ય ચોરીઓ સાથે હવે ગેસ સિલિન્ડરની ચોરી કરનારી ગેંગ પણ સક્રિય થઈ હોય તેવું લાગી રહ્યું છે. વડોદરાના બાજવા વિસ્તારમાં ધોળા દિવસે ગેસ સિલિન્ડરની ચોરી થવાનો એક ચોંકાવનારો કિસ્સો પ્રકાશમાં આવ્યો છે. ગેસ એજન્સીની બહાર ઉભેલા ટેમ્પામાંથી બે બાઈક સવાર ગઠિયાઓ નજર ચૂકવીને સિલિન્ડર ચોરીને રફુચક્કર થઈ ગયા હતા. આ સમગ્ર ઘટનાના સીસીટીવી (CCTV) ફૂટેજ સોશિયલ મીડિયા પર વાયરલ થતાં સમગ્ર પંથકમાં ચર્ચાનો વિષય બન્યો છે.
Gas Cylinder Theft in Vadodara: તક મળતા જ ટેમ્પામાંથી સિલિન્ડર ઉઠાવી લીધું
મળતી માહિતી મુજબ, આ ઘટના બાજવા વિસ્તારમાં આવેલી ઉપાધ્યાય ગેસ એજન્સીની બહાર બની હતી. એજન્સીની બહાર સિલિન્ડરથી ભરેલો એક ટેમ્પો ઊભો હતો. વાયરલ થયેલા સીસીટીવી વીડિયોમાં સ્પષ્ટ જોઈ શકાય છે કે, એક મોટરસાયકલ પર બે અજાણ્યા યુવકો ત્યાં આવી પહોંચે છે. તેઓ પહેલાં તો ટેમ્પાની આસપાસ ઊભા રહી રેકી કરે છે અને જેવી તક મળે છે કે તરત જ બેમાંથી એક યુવક ટેમ્પામાં હાથ નાખીને ગેસ સિલિન્ડર ઉઠાવી લે છે. સિલિન્ડર બાઈક પર ગોઠવીને બંને ગણતરીની સેકન્ડોમાં ત્યાંથી ફરાર થઈ જાય છે.
Gas Cylinder Theft in Vadodara: પોલીસ સીસીટીવીના આધારે તપાસમાં જોતરાઈ
ધોળા દિવસે એજન્સીની બહારથી જ સિલિન્ડરની ચોરી થતાં ગેસ એજન્સીના સંચાલકો પણ ચોંકી ઉઠ્યા હતા. આ ઘટના અંગે તાત્કાલિક સ્થાનિક પોલીસને જાણ કરવામાં આવી હતી. પોલીસે ઘટનાસ્થળે પહોંચીને સીસીટીવી ફૂટેજ કબજે કર્યા છે અને તેના આધારે બંને તસ્કરોની ઓળખ મેળવવાની તજવીજ હાથ ધરી છે.
પોલીસ તપાસ: પોલીસ હવે એ દિશામાં પણ તપાસ કરી રહી છે કે આ બંને યુવકો માત્ર આ એક જ ચોરીમાં સામેલ છે કે પછી તેઓ લાંબા સમયથી આ વિસ્તારમાં આ પ્રકારની ચોરીના કરતૂતો આચરી રહ્યા છે.
સ્થાનિક વેપારીઓ અને રહીશોમાં ચર્ચા છે કે ધોળા દિવસે આ પ્રકારે ચોરી કરનારા તત્વોમાં પોલીસનો કોઈ ડર રહ્યો નથી, ત્યારે પોલીસ આ ગઠિયાઓને ક્યારે ઝડપી પાડે છે તે જોવું રહ્યું.
વધુ સમાચાર વાંચવા માટે અંહી ક્લિક કરો: ગુજરાત ATS અને કોસ્ટ ગાર્ડનું મેગા ઓપરેશન કચ્છના દરિયામાંથી ₹1180 કરોડનું કોકેઈન ઝડપાયું, 3 ડ્રગ માફિયાની ધરપકડ
