ગુજરાતમાં બુટલેગરો દારુનું વેંચાણ કરવા માટે અલગ અલગ પેંતરા અજમાવતા હોય છે, તે વચ્ચે બુટલેગરોના દારુ ઘૂસાડવાના નવા પેંતરાનો પર્દાફાશ થયો છે. આ નવી મોડસ ઓપરેન્ડી મુજબ, પાર્કિગમાં પાર્ક કરેલ ગાડીઓની અંદર દારૂનું વેચાણ કરાતું હોવાનું સામે આવ્યું છે. અમદાવાદ શહેરના નવરંગપુરામાં આવેલા AMC મલ્ટિલેવલ પાર્કિંગના ભોંયરામાંથી બિનવારસી હાલતમાં પડેલી 5 વૈભવી ગાડીમાંથી દારૂ-બીયરની ૧૦૦૦થી વધુ બોટલો પકડાઈ છે. બુટલેગર કુંતલ ભટ્ટ, મુત્લીફ કાળીયો અને આશિષકુમાર પરમારે 5 ગાડીમાં દારૂ ભરીને નવરંગપુરા મલ્ટિલેવલ પાર્કિંગમાં મુકી રાખી હોવાની પોલીસને બાતમી મળી હતી. જેને ધ્યાને રાખીને પોલીસે દરોડા પાડીને ભોંયરામાંથી પાર્ક કરેલી 5 ગાડીઓ ઝબ્બે કરી હતી. જેમાંથી દારૂની 918 બોટલ અને બીયરના 96 ટીન મળ્યા હતા. આમ દારૂ-બિયરનો જથ્થો તેમજ 5 કાર મળીને કુલ રૂ.76.33 લાખની કિંમતનો મુદ્દામાલ કબજે કરવામાં આવ્યો હતો. હાલમાં આ મામલે તપાસનો ધમધમાટ ચાલુ છે.
