ICC ODI World Cup 2027: ICCએ 2027ના વનડે વર્લ્ડ કપનું શેડ્યૂલ જાહેર કરી દીધું છે. આગામી વર્લ્ડ કપ 2 ઑક્ટોબરથી 21 નવેમ્બર દરમિયાન દક્ષિણ આફ્રિકા, ઝિમ્બાબ્વે અને નામિબિયામાં રમાશે. ટૂર્નામેન્ટમાં પહેલીવાર 14 ટીમો ભાગ લેશે અને કુલ 57 મેચ રમાશે.
વર્લ્ડ કપમાં સૌથી વધુ ચર્ચિત મુકાબલામાં ભારત અને પાકિસ્તાન વચ્ચેની મેચ 10 ઑક્ટોબરે જોહાનિસબર્ગમાં રમાશે. બંને ટીમોને ગ્રુપ-Aમાં સ્થાન મળ્યું છે.
ICC ODI World Cup 2027: ભારતની પ્રથમ મેચ ઑસ્ટ્રેલિયા સામે
ભારતીય ટીમ વર્લ્ડ કપમાં પોતાના અભિયાનની શરૂઆત 7 ઑક્ટોબરે ઑસ્ટ્રેલિયા સામે કરશે. આ મેચ કેપ ટાઉનમાં રમાશે. ત્યારબાદ 10 ઑક્ટોબરે ભારત અને પાકિસ્તાન વચ્ચે મુકાબલો થશે.
ગ્રુપ-Aમાં ભારત, પાકિસ્તાન, ઑસ્ટ્રેલિયા, અફઘાનિસ્તાન અને યજમાન ઝિમ્બાબ્વે ઉપરાંત ક્વોલિફાયર દ્વારા આવનારી એક ટીમનો સમાવેશ થશે.
ગ્રુપ-Bમાં ઇંગ્લેન્ડ, દક્ષિણ આફ્રિકા, શ્રીલંકા, બાંગ્લાદેશ અને ન્યૂઝીલેન્ડ છે. આ ગ્રુપમાં પણ એક ટીમ ક્વોલિફાયર મારફતે આવશે.
ICC ODI World Cup 2027: ભારત-પાકિસ્તાન વચ્ચે 3 વખત મુકાબલો થઈ શકે
2027ના વર્લ્ડ કપના ફોર્મેટને કારણે ભારત અને પાકિસ્તાન એક જ ટૂર્નામેન્ટમાં વધુમાં વધુ ત્રણ વખત સામસામે આવી શકે છે.
- ગ્રુપ સ્ટેજ: બંને ટીમો વચ્ચે 10 ઑક્ટોબરે પ્રથમ મુકાબલો નક્કી છે.
- સુપર-7: જો બંને ટીમો આ તબક્કામાં પહોંચે તો ફરી એક વખત સામસામે આવી શકે છે.
- સેમિફાઇનલ/ફાઇનલ: બંને ટીમો નોકઆઉટ તબક્કામાં પહોંચે અને તેમનું સ્થાન એવું બને તો ત્રીજી વખત પણ મુકાબલો થઈ શકે છે.
ICC ODI World Cup 2027: વર્લ્ડ કપમાં પાકિસ્તાન સામે ભારતનો 100% રેકોર્ડ
મેન્સ વનડે વર્લ્ડ કપમાં ભારત અને પાકિસ્તાન અત્યાર સુધી 8 વખત સામસામે આવ્યા છે અને તમામ 8 મેચમાં ભારતે જીત મેળવી છે. જોકે, બંને ટીમોના તમામ આંતરરાષ્ટ્રીય વર્લ્ડ કપ મુકાબલાઓને જોવામાં આવે તો આંકડા અલગ છે.
2027માં નવું ફોર્મેટ
2027ના વર્લ્ડ કપમાં 14 ટીમો અને 57 મેચ સાથે નવું ફોર્મેટ જોવા મળશે. શરૂઆતમાં રેન્કિંગના આધારે 12મા, 13મા અને 14મા સ્થાને રહેલી ત્રણ ટીમો વચ્ચે સુપર સિરીઝ રમાશે. આ તબક્કામાંથી એક ટીમ આગળના રાઉન્ડમાં જશે.
ત્યારબાદ કુલ 12 ટીમોને બે ગ્રુપમાં વહેંચવામાં આવશે. દરેક ગ્રુપમાં 6 ટીમો હશે અને દરેક ટીમ પોતાના ગ્રુપની બાકીની પાંચ ટીમો સામે રમશે. આ તબક્કામાં કુલ 30 મેચ રમાશે.
બંને ગ્રુપમાંથી ટોચની ત્રણ-ત્રણ ટીમો સુપર-7માં પ્રવેશ કરશે. આ ઉપરાંત બંને ગ્રુપમાં ચોથા સ્થાને રહેલી ટીમોમાંથી સારા રેકોર્ડ ધરાવતી એક ટીમ પણ સુપર-7માં સ્થાન મેળવશે.
સુપર-7માં કુલ 7 ટીમો એકબીજા સામે રમશે અને 21 મેચ બાદ પોઇન્ટ્સ ટેબલની ટોચની ચાર ટીમો સેમિફાઇનલમાં પહોંચશે. પ્રથમ સેમિફાઇનલમાં નંબર-1 ટીમનો સામનો ચોથા ક્રમાંકની ટીમ સામે થશે, જ્યારે બીજા અને ત્રીજા ક્રમાંકની ટીમો બીજી સેમિફાઇનલમાં ટકરાશે. બંને સેમિફાઇનલના વિજેતાઓ ફાઇનલમાં રમશે.
12 સ્થળોએ રમાશે વર્લ્ડ કપ
2027ના વર્લ્ડ કપની મેચો કુલ 12 સ્થળોએ રમાશે. તેમાં દક્ષિણ આફ્રિકાના 8, ઝિમ્બાબ્વેના 3 અને નામિબિયાના 1 સ્થળનો સમાવેશ થાય છે.
નામિબિયા પહેલીવાર મેન્સ સિનિયર વનડે વર્લ્ડ કપની મેચનું આયોજન કરશે. બીજી તરફ દક્ષિણ આફ્રિકા અને ઝિમ્બાબ્વે અગાઉ 2003માં પણ વર્લ્ડ કપની યજમાની કરી ચૂક્યાં છે.
2027નો વર્લ્ડ કપ આફ્રિકામાં 24 વર્ષ બાદ મેન્સ વનડે વર્લ્ડ કપની વાપસી પણ હશે.
આ પણ વાંચો :ICCના 8 મોટા નિયમોમાં ફેરફાર, બેટરે સમય બગાડ્યો તો 5 પેનલ્ટી રન, ડે ટેસ્ટમાં પિંક બોલની એન્ટ્રી
