Nepal Flood Tragedy:નેપાળ-તિબેટ સરહદ નજીક આવેલા વિસ્તારોમાં કુદરતનો ભયાનક પ્રકોપ જોવા મળ્યો છે. ભોટેકોશી અને ત્રિશૂલી નદીઓમાં અચાનક આવેલા વિનાશક પૂરે ભારે તબાહી મચાવી છે. આશરે 5,200 મીટરની ઊંચાઈ પર ગ્લેશિયરનો મોટો હિસ્સો તૂટી પડતાં બરફ, ખડકો અને કાંપનો વિશાળ જથ્થો નદીમાં ધસી આવ્યો હતો. તેના કારણે નદીઓમાં પાણીનું સ્તર અચાનક વધી ગયું અને આસપાસના વિસ્તારોમાં ભારે પૂર આવ્યું.
પ્રાથમિક અહેવાલો અનુસાર, આ કુદરતી આફતમાં અત્યાર સુધીમાં 160થી વધુ લોકોનાં મોત થયા છે, જ્યારે 844 લોકો ગુમ થયાના અહેવાલ છે. બચાવ અને રાહત કામગીરી સતત ચાલી રહી છે, પરંતુ અનેક વિસ્તારોમાં માર્ગો અને પુલો ધોવાઈ જતાં કામગીરીમાં મુશ્કેલી પડી રહી છે.
Nepal Flood Tragedy:133 ભારતીય નાગરિકો પણ ગુમ
આ દુર્ઘટનામાં ભારતીય નાગરિકો પણ મોટી સંખ્યામાં અસરગ્રસ્ત થયા છે. ગુમ થયેલા લોકોમાં કૈલાશ માનસરોવર યાત્રાએ ગયેલા શ્રદ્ધાળુઓ અને અન્ય પ્રવાસીઓનો સમાવેશ થાય છે. અહેવાલો મુજબ ઓછામાં ઓછા 133 ભારતીયો ગુમ છે. તેમાંથી 59 જેટલા શ્રદ્ધાળુઓ યાત્રા દરમિયાન સંપર્કવિહોણા બન્યા હોવાની માહિતી સામે આવી છે.
નેપાળના અસરગ્રસ્ત વિસ્તારોમાં મોબાઇલ નેટવર્ક અને સંદેશાવ્યવહારની વ્યવસ્થા ખોરવાઈ જતાં ગુમ થયેલા ભારતીયો અંગે ચોક્કસ માહિતી મેળવવામાં મુશ્કેલી પડી રહી છે.
Nepal Flood Tragedy:ભારતીય દૂતાવાસ અને રાજ્યો સક્રિય
ભારતીય નાગરિકોની મદદ માટે કાઠમંડુ સ્થિત ભારતીય દૂતાવાસ સક્રિય બન્યું છે. સાથે જ તમિલનાડુ, કેરળ, રાજસ્થાન, ઉત્તર પ્રદેશ અને ઓડિશા સહિતના કેટલાક રાજ્યોએ પણ અસરગ્રસ્ત લોકો અને તેમના પરિવારજનો માટે હેલ્પલાઈન શરૂ કરી છે. પરિવારજનોને પોતાના સ્વજનો અંગે માહિતી મેળવવા માટે સત્તાવાર હેલ્પલાઈનનો સંપર્ક કરવા જણાવાયું છે.
Nepal Flood Tragedy:19 પુલ અને 40 કિમી રસ્તાઓ ધોવાયા
રસુવા, નુવાકોટ અને ધાદિંગ જિલ્લાઓમાં પૂરની સૌથી વધુ અસર જોવા મળી છે. પૂરનાં પાણીના પ્રચંડ પ્રવાહમાં 19 પુલ અને આશરે 40 કિલોમીટર રસ્તાઓ ધોવાઈ ગયા છે. અનેક વિસ્તારોનો સંપર્ક તૂટી ગયો છે. આ ઉપરાંત આશરે એક ડઝન હાઇડ્રોપાવર પ્રોજેક્ટ્સને પણ ભારે નુકસાન પહોંચ્યું હોવાના અહેવાલ છે.
ભારતે 10 ટન માનવીય સહાય મોકલી
નેપાળમાં સર્જાયેલા સંકટ વચ્ચે ભારતે તાત્કાલિક મદદનો હાથ લંબાવ્યો છે. ભારતીય વાયુસેનાના વિમાન મારફતે આશરે 10 ટન માનવીય રાહત સામગ્રી અને જરૂરી દવાઓ નેપાળ મોકલવામાં આવી છે. ભારતે નેપાળને તમામ શક્ય સહાય પૂરી પાડવાની ખાતરી આપી છે.
Nepal Flood Tragedy:બિહારમાં પણ હાઈ એલર્ટ
નેપાળમાં ભારે વરસાદ અને પૂર બાદ તેની અસર ભારતના બિહાર સુધી પહોંચવાની શક્યતાને ધ્યાનમાં રાખીને રાજ્યમાં સાવચેતી વધારવામાં આવી છે. ગંડક નદીના જળસ્તર પર સતત નજર રાખવામાં આવી રહી છે. વાલ્મિકીનગર ગંડક બેરાજના તમામ 36 દરવાજા ખોલી દેવામાં આવ્યા છે અને નીચાણવાળા વિસ્તારોમાં એલર્ટ જાહેર કરવામાં આવ્યું છે.
તિબેટમાં પણ ભારે નુકસાન
નેપાળની સાથે ચીનના તિબેટ વિસ્તારમાં પણ આ કુદરતી આપત્તિની અસર પહોંચી છે. અહેવાલો મુજબ ત્યાં 3 લોકોનાં મોત થયા છે અને 265 લોકો ગુમ છે. સરહદ બંને તરફ બચાવ ટીમો દ્વારા ગુમ થયેલા લોકોને શોધવાની કામગીરી હાથ ધરવામાં આવી છે.
આ સમગ્ર ઘટનાએ હિમાલયી વિસ્તારમાં ગ્લેશિયર તૂટવા અને અચાનક પૂરથી સર્જાઈ શકતા જોખમોને ફરી એકવાર ઉજાગર કર્યા છે. હાલ સૌથી મોટી પ્રાથમિકતા ગુમ થયેલા લોકોની શોધ, ફસાયેલા લોકોને સુરક્ષિત બહાર કાઢવા અને અસરગ્રસ્ત વિસ્તારોમાં રાહત સામગ્રી પહોંચાડવાની છે.
આ પણ વાંચો :રાજસ્થાનથી ભગાડીને લાવેલા 19 વર્ષીય યુવતીના રહસ્યમય મોત મામલે પ્રેમી ફરાર
