Food Poisoning Tragedy in Surat: સુરતમાં ફૂડ પોઈઝનિંગની ગંભીર ઘટના સામે આવી છે. વરાછા વિસ્તારમાં એક જ પરિવારના પાંચ સભ્યોની તબિયત અચાનક લથડી પડતાં તેમને સારવાર માટે હોસ્પિટલમાં ખસેડવામાં આવ્યા હતા. આ ઘટનામાં 5 વર્ષની માસૂમ બાળકી આર્યાનું સારવાર દરમિયાન મોત નીપજ્યું છે. જ્યારે બાળકીના માતા-પિતા અને બે પુત્રીઓ હાલ હોસ્પિટલમાં સારવાર હેઠળ છે. પરિવારના જણાવ્યા મુજબ, 15 ઓગસ્ટની રાત્રે વરાછા વિસ્તારમાં આવેલી શીતલ રેસ્ટોરન્ટમાંથી મંગાવવામાં આવેલા કાજુ અને પનીરના પંજાબી શાકનું ભોજન કર્યા બાદ પરિવારના સભ્યોની તબિયત એક પછી એક ખરાબ થવા લાગી હતી.
મળતી માહિતી પ્રમાણે, વરાછાની રણુજાધામ સોસાયટીમાં રહેતા અશોકભાઈ કળસરિયાના પરિવારે 15 ઓગસ્ટની રાત્રે રેસ્ટોરન્ટમાંથી પંજાબી શાક મંગાવ્યું હતું. પરિવારના પાંચેય સભ્યોએ ભોજન લીધા બાદ શરૂઆતમાં કોઈ ગંભીર લક્ષણો જોવા મળ્યા નહોતા. જોકે, બીજા દિવસે વહેલી સવારે પરિવારના કેટલાક સભ્યોને પેટમાં દુખાવો સહિતની તકલીફ શરૂ થઈ હતી.
પરિવારના પિતરાઈ ભાઈ ભાવેશભાઈ કળસરિયાના જણાવ્યા મુજબ, 16 ઓગસ્ટે વહેલી સવારે આશરે 4 વાગ્યે અશોકભાઈ અને તેમની એક દીકરીને પેટમાં અસહ્ય દુખાવો શરૂ થયો હતો. ત્યારબાદ તેમને સ્થાનિક ક્લિનિકમાં સારવાર માટે લઈ જવાયા હતા. દવા અને અન્ય સારવાર આપવામાં આવ્યા બાદ પણ તબિયતમાં સુધારો થયો નહોતો. બપોર બાદ પરિવારના અન્ય સભ્યોની તબિયત પણ લથડતાં પરિસ્થિતિ ગંભીર બની હતી.
પરિવારના પાંચેય સભ્યોને તાત્કાલિક સદવિચાર હોસ્પિટલમાં ખસેડવામાં આવ્યા હતા. હોસ્પિટલમાં તબીબોની ટીમ દ્વારા સારવાર શરૂ કરવામાં આવી હતી. જોકે, 5 વર્ષની બાળકી આર્યાની સ્થિતિ અત્યંત ગંભીર હોવાનું સામે આવ્યું હતું. પરિવારના જણાવ્યા મુજબ, આર્યાને ઈમરજન્સી વિભાગમાં લાવ્યાના આશરે 15થી 20 મિનિટમાં તેનું મોત નીપજ્યું હતું.
હાલ અશોકભાઈ, તેમની પત્ની અને બે પુત્રીઓ હોસ્પિટલમાં સારવાર હેઠળ છે. પરિવારના જણાવ્યા મુજબ, હોસ્પિટલમાં કરવામાં આવેલા તબીબી પરીક્ષણોમાં ચાર દર્દીઓમાં ફૂડ પોઈઝનિંગની અસર જોવા મળી છે. તબીબોની ટીમ દ્વારા તમામ દર્દીઓની સતત દેખરેખ રાખવામાં આવી રહી છે.
Food Poisoning Tragedy in Surat: આરોગ્ય વિભાગની ટીમે રેસ્ટોરન્ટમાં તપાસ હાથ ધરી
ઘટનાની જાણ થતાં સુરત મહાનગરપાલિકાના આરોગ્ય વિભાગની ટીમ પણ તાત્કાલિક હરકતમાં આવી હતી. ફૂડ સેફ્ટી ઓફિસર સેજલ વ્યાસના જણાવ્યા મુજબ, ફૂડ પોઈઝનિંગની માહિતી મળ્યા બાદ ટીમ રેસ્ટોરન્ટ ખાતે પહોંચી હતી. અહીં તપાસ હાથ ધરી ખાદ્ય પદાર્થોના સેમ્પલ લેવામાં આવ્યા છે. રેસ્ટોરન્ટ સામે જરૂરી કાર્યવાહી પણ શરૂ કરવામાં આવી છે.
અધિકારીઓ દ્વારા રેસ્ટોરન્ટ બંધ કરવાની કાર્યવાહી હાથ ધરવામાં આવી હોવાનું જણાવાયું છે. ખાદ્ય પદાર્થોના સેમ્પલને તપાસ માટે મોકલવામાં આવ્યા છે. રિપોર્ટ આવ્યા બાદ જ પરિવારની તબિયત ખરાબ થવાનું ચોક્કસ કારણ જાણી શકાશે.
Food Poisoning Tragedy in Surat: બાળકીના મૃતદેહનું પેનલ પોસ્ટમોર્ટમ
મૃતક બાળકી આર્યાના મૃતદેહને પેનલ પોસ્ટમોર્ટમ માટે મોકલવામાં આવ્યો છે. પોસ્ટમોર્ટમ રિપોર્ટ અને ખાદ્ય પદાર્થોના લેબોરેટરી રિપોર્ટ બાદ ઘટનાની વધુ વિગતો સામે આવવાની શક્યતા છે. તંત્ર દ્વારા સમગ્ર મામલે તપાસ કરવામાં આવી રહી છે.
Food Poisoning Tragedy in Surat: પરિવારની નિષ્પક્ષ તપાસ અને કડક કાર્યવાહીની માગ
માસૂમ બાળકીના મોતથી કળસરિયા પરિવારમાં ભારે આઘાતની લાગણી જોવા મળી રહી છે. પરિવારજનોએ સમગ્ર ઘટનાની નિષ્પક્ષ તપાસ કરવાની માગ કરી છે. સાથે જ જો તપાસમાં રેસ્ટોરન્ટની બેદરકારી અથવા ખાદ્ય પદાર્થની ગુણવત્તામાં ખામી સામે આવે તો જવાબદારો સામે કડક કાર્યવાહી કરવામાં આવે તેવી માગ કરવામાં આવી છે.
હાલ આરોગ્ય વિભાગ દ્વારા સેમ્પલની તપાસ, રેસ્ટોરન્ટની કાર્યવાહી અને હોસ્પિટલના તબીબી રિપોર્ટના આધારે સમગ્ર ઘટનાની હકીકત જાણવા પ્રયાસ કરવામાં આવી રહ્યો છે. તપાસ પૂર્ણ થયા બાદ જ ફૂડ પોઈઝનિંગનું ચોક્કસ કારણ અને જવાબદારી અંગે સ્પષ્ટતા થશે.
વધુ સમાચાર વાંચવા માટે અંહી ક્લિક કરો: અદાણી બાદ ગુજરાત ગેસનો મોટો ઝટકો: CNGના ભાવમાં પ્રતિ કિલો ₹૩.૭૫નો વધારો, નવી કિંમત ₹૮૮.૭૬એ પહોંચી
