Gujarat Weather Update: રાજ્યમાં ફરી એકવાર વરસાદી માહોલ જામ્યો છે. આજે 10 ઓગસ્ટે અમદાવાદ અને ગાંધીનગર સહિત અનેક વિસ્તારોમાં ઝરમર વરસાદ નોંધાયો છે. દરમિયાન હવામાન વિભાગે આવતીકાલે, 11 ઓગસ્ટે રાજ્યના પાંચ જિલ્લામાં ભારે વરસાદની આગાહી સાથે યલો એલર્ટ જાહેર કર્યું છે. આગામી દિવસોમાં પણ રાજ્યના વિવિધ વિસ્તારોમાં ગાજવીજ અને પવન સાથે વરસાદી ઝાપટાં પડવાની શક્યતા વ્યક્ત કરવામાં આવી છે.
Gujarat Weather Update: 13 ઓગસ્ટ સુધી રાજ્યમાં સારા વરસાદની શક્યતા
હવામાન નિષ્ણાત અંબાલાલ પટેલના જણાવ્યા અનુસાર, આગામી 13 ઓગસ્ટ સુધી ગુજરાતમાં ફરી સારો વરસાદ થવાની શક્યતા છે. મહિસાગર, પંચમહાલ, દાહોદ, છોટાઉદેપુર, વડોદરા, અમદાવાદ, ગાંધીનગર, સાબરકાંઠા, અરવલ્લી અને બનાસકાંઠા સહિતના વિસ્તારોમાં વરસાદ પડી શકે છે. દક્ષિણ ગુજરાત અને સૌરાષ્ટ્રના કેટલાક વિસ્તારોમાં પણ વરસાદી માહોલ રહેવાની સંભાવના છે.
ખાસ કરીને સાબરકાંઠા અને અરવલ્લીના કેટલાક વિસ્તારોમાં વધુ વરસાદ થવાની શક્યતા અંબાલાલ પટેલે વ્યક્ત કરી છે. પાટણ, સમી અને હારીજના કેટલાક વિસ્તારોમાં પણ વરસાદી ઝાપટાં પડવાની આગાહી કરવામાં આવી છે.
Gujarat Weather Update: ઓગસ્ટની શરૂઆતમાં વરસાદ કેમ ઘટ્યો?
અંબાલાલ પટેલના જણાવ્યા અનુસાર, ઓગસ્ટની શરૂઆતમાં વરસાદની ગતિ ધીમી પડવા પાછળ પેસિફિક મહાસાગરમાં સર્જાયેલી હવામાન પ્રણાલી એક કારણ હોવાનું જણાવાયું છે. આ સિસ્ટમ અરબ સાગર અને બંગાળની ખાડીમાંથી ભેજ ખેંચી રહી હોવાથી ગુજરાતમાં સારા વરસાદ માટે જરૂરી ભેજની ઉપલબ્ધતા પર અસર થઈ હતી. હવે આ સિસ્ટમ દક્ષિણ તરફ ખસવાની શક્યતા છે, જેના કારણે વરસાદી પ્રવૃત્તિમાં ફરી વધારો થઈ શકે છે.
Gujarat Weather Update: 14-15 ઓગસ્ટે મોન્સૂન બ્રેકની શક્યતા
13 ઓગસ્ટ બાદ 14 અને 15 ઓગસ્ટ દરમિયાન રાજ્યના કેટલાક વિસ્તારોમાં વરસાદનું પ્રમાણ ઘટવાની અને હવામાનમાં ઉઘાડ નીકળવાની શક્યતા છે. આ સમયગાળા દરમિયાન મોન્સૂન બ્રેક જેવી સ્થિતિ સર્જાઈ શકે છે.
ત્યારબાદ 14 ઓગસ્ટ બાદ બંગાળની ખાડીમાં લો-પ્રેશર સિસ્ટમ સર્જાવાની શક્યતા છે. તેની અસર મુખ્યત્વે પૂર્વ ભારતના વિસ્તારોમાં જોવા મળી શકે છે. જોકે 17, 18 અને 19 ઓગસ્ટ દરમિયાન ગુજરાતના વાતાવરણમાં ફરી પલટો આવવાની શક્યતા છે.
Gujarat Weather Update: 22 ઓગસ્ટ બાદ વરસાદી ઝાપટાં વધશે
આગાહી મુજબ 22 અને 23 ઓગસ્ટથી ગુજરાત, સૌરાષ્ટ્ર અને દક્ષિણ ગુજરાતના કેટલાક વિસ્તારોમાં વરસાદી ઝાપટાંનું પ્રમાણ વધી શકે છે. બંગાળની ખાડીમાં એક પછી એક લો-પ્રેશર સિસ્ટમ સર્જાવાની શક્યતા હોવાથી 25થી 28 ઓગસ્ટ દરમિયાન રાજ્યમાં વરસાદી પ્રવૃત્તિમાં વધુ વધારો થવાની સંભાવના છે.
અંબાલાલ પટેલે સપ્ટેમ્બર મહિનામાં પણ રાજ્યના વિવિધ ભાગોમાં સારા વરસાદની શક્યતા વ્યક્ત કરી છે. સપ્ટેમ્બરની શરૂઆતમાં હવામાનમાં પલટો આવવાની શક્યતા છે અને સમગ્ર મહિના દરમિયાન કેટલાક વિસ્તારોમાં ભારે વરસાદ થઈ શકે છે.
ત્રણ દિવસ ગાજવીજ સાથે વરસાદની શક્યતા
હવામાન વિભાગના જણાવ્યા અનુસાર, આગામી ત્રણ દિવસ રાજ્યમાં ગાજવીજ અને પવન સાથે વરસાદી માહોલ રહી શકે છે. આજે અનેક વિસ્તારોમાં છૂટોછવાયો ઝરમર વરસાદ પડવાની શક્યતા છે. લો-પ્રેશર, સાયક્લોનિક સર્ક્યુલેશન અને મોન્સૂન ટ્રફ જેવી હવામાન પ્રણાલીઓ સક્રિય હોવાથી વરસાદી પ્રવૃત્તિમાં વધારો થવાની શક્યતા છે. માછીમારોને પણ આગામી દિવસોમાં દરિયો ન ખેડવાની સૂચના આપવામાં આવી છે.
રાજ્યમાં સામાન્ય કરતાં 9 ટકા વધુ વરસાદ
રાજ્યમાં અત્યાર સુધીમાં સરેરાશ 491.2 મીમી વરસાદ નોંધાયો છે. સામાન્ય રીતે આ સમયગાળા દરમિયાન 450.5 મીમી વરસાદ થવો જોઈએ. એટલે રાજ્યમાં અત્યાર સુધી સામાન્ય કરતાં આશરે 9 ટકા વધુ વરસાદ નોંધાયો છે. જોકે સૌરાષ્ટ્ર વિસ્તારમાં સામાન્ય કરતાં આશરે 13 ટકા ઓછો વરસાદ નોંધાયો હોવાનું જણાવાયું છે.
આ પણ વાંચો :અમદાવાદમાં દુષ્કર્મના આરોપીએ પોલીસ પર હુમલો કરી ભાગવાનો પ્રયાસ કર્યો, ફાયરિંગમાં પગમાં ગોળી વાગી
