Ahmedabad Fake Cosmetic Racket : અમદાવાદ શહેરમાં નકલી કોસ્મેટિક પ્રોડક્ટ્સના વેચાણ સામે પોલીસે મોટી કાર્યવાહી કરી છે. શહેરના બહેરામપુરા વિસ્તારમાં એક નામાંકિત કોસ્મેટિક કંપનીના નામ અને ટ્રેડમાર્કનો કથિત રીતે ગેરકાયદેસર ઉપયોગ કરીને નકલી સાબુ અને ફેસવોશ બનાવવાનું કૌભાંડ ઝડપાયું છે. પોલીસની કાર્યવાહી દરમિયાન કુલ રૂ. 11.68 લાખથી વધુની કિંમતનો મુદ્દામાલ જપ્ત કરવામાં આવ્યો છે. આ મામલે પોલીસે એક શખસની ધરપકડ કરી કાયદેસરની કાર્યવાહી હાથ ધરી છે.
Ahmedabad Fake Cosmetic Racket : બાતમીના આધારે ગોડાઉનમાં દરોડો
મળતી માહિતી મુજબ, પોલીસને બાતમી મળી હતી કે બહેરામપુરા વિસ્તારમાં નામાંકિત કંપનીના નામ અને ટ્રેડમાર્કનો ઉપયોગ કરીને ડુપ્લીકેટ કોસ્મેટિક પ્રોડક્ટ્સ તૈયાર કરવામાં આવી રહી છે. બાતમીના આધારે પોલીસે કંપનીના અધિકારીઓ સાથે મળીને બહેરામપુરાના સિકંદર માર્કેટ રોડ પર આવેલા ભાટી કમ્પાઉન્ડના એક ગોડાઉનમાં દરોડો પાડ્યો હતો.
દરોડા દરમિયાન ગોડાઉનમાંથી મોટી સંખ્યામાં નકલી સાબુ અને ફેસવોશ મળી આવ્યા હતા. પોલીસે તપાસ કરતાં રૂ. 3,89,400ની કિંમતના કુલ 3,894 નંગ ડુપ્લીકેટ સાબુ મળી આવ્યા હતા. આ ઉપરાંત રૂ. 7,78,800ની કિંમતના 6,490 નંગ ડુપ્લીકેટ ફેસવોશ પણ મળી આવ્યા હતા. આમ, બંને પ્રકારના કોસ્મેટિક પ્રોડક્ટ્સની કુલ કિંમત રૂ. 11,68,200 જેટલી થાય છે. પોલીસે આ તમામ મુદ્દામાલ ઉપરાંત કેટલાક ખાલી બોક્સ પણ કબજે કર્યા છે.
Ahmedabad Fake Cosmetic Racket : ‘KISRA’ બ્રાન્ડના સ્ટીકરનો ઉપયોગ
પોલીસના જણાવ્યા મુજબ, આ મામલે દાણીલીમડામાં રહેતા મોહંમદ જુનેદ યુનુસભાઈ પટેલ (ઉં.વ. 45) નામના શખસની ધરપકડ કરવામાં આવી છે. આરોપી કથિત રીતે પોતાની ‘KISRA’ બ્રાન્ડના સ્ટીકરનો ઉપયોગ કરીને નકલી સાબુ અને ફેસવોશનું વેચાણ કરતો હોવાનું સામે આવ્યું છે.
આરોપી અસલી કંપનીના ટ્રેડમાર્ક અને લોગોની નકલ કરીને ગ્રાહકો સુધી ડુપ્લીકેટ પ્રોડક્ટ્સ પહોંચાડતો હોવાનો આક્ષેપ છે. પોલીસે સમગ્ર મામલે વધુ તપાસ શરૂ કરી છે અને નકલી પ્રોડક્ટ્સ ક્યાંથી તૈયાર કરવામાં આવતી હતી તેમજ તેને બજારમાં ક્યાં-ક્યાં સપ્લાય કરવામાં આવતી હતી તે અંગે પણ તપાસ હાથ ધરવામાં આવી છે.
કંપનીના અધિકારીની ફરિયાદ બાદ કાર્યવાહી
આ સમગ્ર મામલે ન્યુ રાણીપના શુકન સિટી ખાતે રહેતા અને પુણે સ્થિત ‘યામી ઘર શોપ પ્રા. લી.’ કંપનીમાં ટ્રેડમાર્ક તથા કોપીરાઈટ પ્રોટેક્શનનું કામ સંભાળતા 30 વર્ષીય જયદીપભાઈ સુભાષભાઈ ભટ્ટીએ પોલીસ ફરિયાદ નોંધાવી હતી.
ફરિયાદ મુજબ, કંપનીના અધિકારીઓને જાણ થઈ હતી કે તેમની કંપનીના બ્રાન્ડ નેમ, લોગો અને ટ્રેડમાર્કની કથિત નકલ કરીને બજારમાં ડુપ્લીકેટ પ્રોડક્ટ્સનું વેચાણ કરવામાં આવી રહ્યું છે. આ માહિતી મળ્યા બાદ કંપનીના અધિકારીઓએ પોલીસનો સંપર્ક કર્યો હતો અને સમગ્ર મામલે ફરિયાદ નોંધાવવામાં આવી હતી.
ગ્રાહકો સાથે છેતરપિંડીનો આક્ષેપ
પોલીસની પ્રાથમિક તપાસમાં આરોપી દ્વારા નામાંકિત કંપનીના નામ અને ટ્રેડમાર્કનો કથિત દુરુપયોગ કરીને નકલી કોસ્મેટિક પ્રોડક્ટ્સ બજારમાં વેચવામાં આવતી હોવાની વિગતો સામે આવી છે. આવા બનાવોમાં ગ્રાહકો અસલી અને નકલી પ્રોડક્ટ વચ્ચેનો તફાવત ઓળખી ન શકે તેવી શક્યતા રહે છે.
હાલ પોલીસે રૂ. 11.68 લાખથી વધુનો મુદ્દામાલ કબજે કરીને આરોપીની ધરપકડ કરી છે. સમગ્ર કૌભાંડમાં અન્ય કોઈ વ્યક્તિ સંડોવાયેલી છે કે નહીં, નકલી પ્રોડક્ટ્સનું ઉત્પાદન ક્યાં થતું હતું અને તેનું માર્કેટિંગ તથા સપ્લાય નેટવર્ક કેટલું વિસ્તરેલું છે તે અંગે પોલીસ દ્વારા વધુ તપાસ કરવામાં આવી રહી છે.
આ પણ વાંચો :બોલિવૂડ અભિનેતા રાજપાલ યાદવ પર આર્થિક સંકટ: ૧૬ કરોડથી વધુના દેવા મામલે બે સંપત્તિઓની હરાજી થશે
