Gujarat Rains: ગુજરાતમાં ચોમાસાની તોફાની પધરામણી વચ્ચે મેઘરાજાએ ત્રાહીમામ પોકાવ્યો છે. આજે સવારે 6 વાગ્યાથી રાત્રિના 8 વાગ્યા સુધીમાં રાજ્યના 261 તાલુકાઓમાં મેઘો મન મૂકીને વરસ્યો છે. અનરાધાર વરસાદના કારણે અનેક વિસ્તારોમાં જનજીવન સંપૂર્ણપણે અસ્તવ્યસ્ત થઈ ગયું છે. સ્થિતિની ગંભીરતા જોતા હવામાન વિભાગે રાત્રિના 10 વાગ્યા સુધી રાજ્યના 10 જિલ્લામાં ‘રેડ એલર્ટ’ જાહેર કર્યું છે.
Gujarat Rains: ક્યાં કેટલો વરસાદ ખાબક્યો? (આંકડાકીય ઝાંખી)
- સૌથી વધુ વરસાદ: પાટણના સાંતલપુરમાં 14 ઈંચ અને રાધનપુર તાલુકામાં 10 ઈંચ વરસાદ નોંધાયો છે.
- વાવ-થરાદના દિયોદરમાં 9 ઈંચ અને ભાભર તાલુકામાં 8 ઈંચ વરસાદ વરસ્યો છે.
- રાજ્યના 30 તાલુકાઓમાં 3 થી 7 ઈંચ અને 110 તાલુકાઓમાં 1 થી 2 ઈંચ વરસાદ ખાબક્યો છે.
- ભારે પાણી ભરાવાની સ્થિતિને કારણે શેત્રુંજી ડેમના 20 દરવાજા 1 ફૂટ ખોલવામાં આવ્યા છે.
Gujarat Rains: પૂર અને દુર્ઘટનાઓ: 8 લોકોના મોત, હજારોનું રેસ્ક્યુ
ભારે વરસાદ અને પૂરની આફતને કારણે અત્યાર સુધીમાં સમગ્ર રાજ્યમાંથી 40,500 લોકોનું સુરક્ષિત સ્થળાંતર કરવામાં આવ્યું છે, જ્યારે 6,367 લોકોનું રેસ્ક્યુ કરાયું છે. જોકે, આ કુદરતી આફતમાં માનવ જાનહાનિ પણ થઈ છે:
- સુરત અને નવસારી: પૂરના પાણીમાં તણાઈ જવાથી સુરતમાં 2 અને નવસારીમાં 4 લોકોના મૃતદેહ મળી આવ્યા છે.
- અમરેલી: અઢી વર્ષની બાળકી અને એક ખેત મજૂરનું મોત નીપજ્યું છે.
- રાજકોટ (ગોંડલ-જેતપુર): ગોંડલ-જેતપુર નેશનલ હાઇવે પર ગુરુકુલ પાસે વિરપુર જતા રસ્તે સવારે ઘોડાપૂરમાં એક કાર તણાઈ હતી. લગભગ 12 કલાકની ભારે જહેમત બાદ કાર 200 મીટર દૂરથી મળી આવી છે, પરંતુ કારચાલકનો હજુ સુધી કોઈ પત્તો લાગ્યો નથી. તંત્ર દ્વારા તેની શોધખોળ ચાલુ છે.
Gujarat Rains: આગામી 3 કલાક ભારે: કયા જિલ્લામાં કયું એલર્ટ?
હવામાન વિભાગની ચેતવણી અનુસાર, આગામી થોડા કલાકો અત્યંત સંવેદનશીલ છે:
- રેડ એલર્ટ (10 જિલ્લા): બનાસકાંઠા, પાટણ, કચ્છ, મોરબી, સુરેન્દ્રનગર, સાબરકાંઠા, મહેસાણા, અમદાવાદ, ગાંધીનગર અને ખેડા.
- ઓરેન્જ એલર્ટ: ભાવનગર, બોટાદ, દ્વારકા, અમરેલી, રાજકોટ, જામનગર, આણંદ, વડોદરા, પંચમહાલ, મહીસાગર, ભરૂચ, સુરત, નવસારી, વલસાડ વગેરે.
- યલો એલર્ટ: દાહોદ, છોટાઉદેપુર, નર્મદા, તાપી, ડાંગ, પોરબંદર, જૂનાગઢ, ગીર સોમનાથ વગેરે.
તંત્ર દ્વારા નાગરિકોને અત્યંત જરૂર ન હોય તો ઘરની બહાર ન નીકળવા અને સુરક્ષિત સ્થળે રહેવાની અપીલ કરવામાં આવી છે.
વધુ સમાચાર વાંચવા માટે અંહી ક્લિક કરો
