IRCTC Upgrade: ભારતીય રેલવે દ્વારા લાખો મુસાફરોની સુવિધા માટે IRCTCની વેબસાઇટનું નવું અને સુધારેલું ‘બીટા વર્ઝન’ ૧૫ જુલાઈ, ૨૦૨૬ની રાત્રે લોન્ચ કરી દેવામાં આવ્યું છે. દાયકાઓ જૂની સિસ્ટમને આધુનિક બનાવીને મુસાફરોને ઝડપી અને મુશ્કેલીમુક્ત અનુભવ આપવાનો રેલવેનો મુખ્ય ઉદ્દેશ્ય છે.
IRCTC Upgrade: નવી વેબસાઇટના મુખ્ય આકર્ષણો:
- કેપ્ચાની ઝંઝટમાંથી મુક્તિ: લોગિન કે બુકિંગ દરમિયાન મુસાફરોને પરેશાન કરતા કેપ્ચા હવે નહીં જોવા મળે. સાથે જ, વધારાના ગ્રાફિક્સ અને પોપ-અપ્સ હટાવી દેવાયા છે, જેથી સાઇટ વધુ ક્લીન લાગશે.
- એકસાથે તમામ ક્લાસની ઉપલબ્ધતા: હવે મુસાફરોને સ્લીપર, ૩-એસી કે ૨-એસી માટે અલગ-અલગ સર્ચ કરવાની જરૂર નથી. એક જ સ્ક્રીન પર તમામ શ્રેણીઓની સીટની ઉપલબ્ધતા દેખાશે.
- ફાસ્ટર ચેકઆઉટ: બુકિંગની પ્રક્રિયામાં જે સ્ટેપ્સ હતા તેની સંખ્યા ઘટાડવામાં આવી છે, જેથી ટિકિટ બુકિંગમાં લાગતો સમય નોંધપાત્ર રીતે ઘટશે.
- ઈઝીયર રિપીટ બુકિંગ: વારંવાર મુસાફરી કરતા મુસાફરો માટે નામ, ઉંમર જેવી વિગતો ઓટો-સેવ રહેશે, જેથી ફરીથી માહિતી ભરવી નહીં પડે.
IRCTC Upgrade: શા માટે આ ફેરફાર જરૂરી હતો?
વર્ષ ૨૦૦૨માં શરૂ થયેલી IRCTC વેબસાઇટ પર હાલ દરરોજ સરેરાશ ૧૪.૫ લાખ ટિકિટ બુક થાય છે. આટલા વિશાળ ટ્રાફિકને વધુ ઝડપથી અને અવરોધ વિના હેન્ડલ કરવા માટે બેકએન્ડ પેસેન્જર રિઝર્વેશન એન્જિનનું અપગ્રેડેશન જરૂરી હતું. રેલવેનો આ પ્રોજેક્ટ એટલો પડકારજનક હતો કે ટિકિટ બુકિંગની લાઈવ સેવા બંધ કર્યા વિના તેને અપગ્રેડ કરવામાં આવી રહી છે.
IRCTC Upgrade: કેવી રીતે એક્સેસ કરવું?
મુસાફરો IRCTC બીટા પોર્ટલ પર જઈને આ નવી સુવિધાઓનો અનુભવ લઈ શકે છે. હાલમાં જૂની વેબસાઇટ પરથી પણ નવી વેબસાઇટ પર જવાની સીધી લિંક આપવામાં આવી છે.
મુસાફરોને ખાસ અપીલ
રેલવે તંત્ર ઈચ્છે છે કે મુસાફરો આ નવા પોર્ટલનો ઉપયોગ કરે અને હોમપેજ પર આપેલ ‘ફીડબેક’ વિકલ્પ દ્વારા પોતાનો પ્રતિભાવ આપે. જો કોઈ મુસાફરને સીટ જોવામાં કે પેમેન્ટ કરવામાં કોઈ મુશ્કેલી નડે, તો તે સ્ક્રીનશોટ સાથે રિપોર્ટ કરી શકે છે, જેથી ફાઇનલ રોલઆઉટ પહેલાં તેમાં જરૂરી સુધારા કરી શકાય.
આગામી થોડા અઠવાડિયામાં આ સંપૂર્ણ સિસ્ટમ કાર્યરત થઈ જશે, ત્યાં સુધી મુસાફરો બીટા વર્ઝન અને જૂના પોર્ટલ બંનેનો ઉપયોગ કરી શકશે.
આ પણ વાંચો :સુરતના હીરા ઉદ્યોગપતિ ધીરૂ રામાણીનું આફ્રિકાના માલીમાં અપહરણ: ૧૦૦ કરોડની ખંડણીની માંગથી ખળભળાટ
