Grand Celebrations in Ahmedabad: અષાઢી બીજના પાવન પર્વે યોજાનારી ૧૪૯મી શ્રી જગન્નાથજી રથયાત્રાને લઈને ભગવાનના મોસાળ ગણાતા સરસપુર વિસ્તારમાં અત્યારથી જ દિવાળી જેવો માહોલ અને અદભુત ઉત્સાહ જોવા મળી રહ્યો છે. આ વર્ષની રથયાત્રા શ્રદ્ધાળુઓ માટે ભક્તિના બેવડા આનંદ સમાન બની રહેશે. કારણ કે, લગભગ ૨૫ વર્ષના લાંબા સમયગાળા બાદ સરસપુરના પ્રાચીન રણછોડરાયજી મંદિર એટલે કે ભગવાનના ‘જૂના મોસાળ’માં મામેરાની ઐતિહાસિક પરંપરા ફરી જીવંત થવા જઈ રહી છે. આ નૂતન નિર્ણયને પગલે આ વર્ષે ભગવાન જગન્નાથજીના એક નહીં પરંતુ બે-બે મામેરા યોજાશે.
Grand Celebrations in Ahmedabad: 25 વર્ષ બાદ કેમ જીવંત થઈ પરંપરા?
વર્ષો પહેલાં જગ્યાના અભાવે અને અનિવાર્ય કારણોસર જૂના મોસાળમાં મામેરાની આ પરંપરા બંધ કરવી પડી હતી. જો કે, આ વર્ષે મંદિર ટ્રસ્ટ દ્વારા આ સદીઓ જૂની ધાર્મિક પરંપરાને પુનઃ જીવંત કરવાનો હર્ષોલ્લાસભેર નિર્ણય લેવામાં આવ્યો છે. દર વર્ષે નિયમિત યજમાન દ્વારા કરવામાં આવતા પરંપરાગત મામેરા ઉપરાંત, હવે આ વર્ષે પ્રાચીન રણછોડરાયજી મંદિર તરફથી અલગથી વિશેષ મામેરું ભગવાનને અર્પણ કરવામાં આવશે.
Grand Celebrations in Ahmedabad: 11 અને 12 જુલાઈએ મામેરાના દિવ્ય દર્શન
સરસપુરના પ્રાચીન મોસાળમાં આગામી ૧૧ અને ૧૨ જુલાઈના રોજ ભાવિક ભક્તો માટે આ ઐતિહાસિક અને અલૌકિક મામેરાના દર્શનનું ભવ્ય આયોજન કરવામાં આવ્યું છે. અમદાવાદના જાણીતા અને કુશળ કારીગરો દ્વારા ભગવાન માટે વિશેષ ભેટ-સોગાદો અને આભૂષણો ખાસ ઓર્ડર આપીને તૈયાર કરાવવામાં આવી રહ્યા છે, જેમાં:
- ભગવાન જગન્નાથજી માટે: ચાંદીની વાંસળી અને આકર્ષક ચાંદીનું સુદર્શન ચક્ર.
- ભાઈ બળદેવજી માટે: તેમના પ્રતીક સમાન ચાંદીનું ભવ્ય હળ.
- બહેન સુભદ્રાજી માટે: સોના-ચાંદીના કિંમતી આભૂષણો, રેશમી વસ્ત્રો અને વિશેષ શણગાર.
Grand Celebrations in Ahmedabad: ૧૬ જુલાઈએ મહાપ્રસાદનું ભવ્ય આયોજન
રથયાત્રાના પાવન દિવસે એટલે કે ૧૬ જુલાઈના રોજ જ્યારે ભગવાન જગન્નાથજી, ભાઈ બળદેવજી અને બહેન સુભદ્રાજી સાથે નગરચર્યાએ નીકળીને સરસપુર (મોસાળ) પધારશે, ત્યારે ભક્તો માટે મહાપ્રસાદનું પણ વિશાળ આયોજન કરવામાં આવ્યું છે. આ ધાર્મિક મહોત્સવમાં દેશભરમાંથી અનેક સાધુ-સંતો, મહંતો અને રાજકીય તેમજ સામાજિક અગ્રણીઓ ઉપસ્થિત રહેશે. મંદિર ટ્રસ્ટ દ્વારા દેશ-વિદેશના તમામ ભાવિકોને આ પાવન અને ઐતિહાસિક પ્રસંગના સાક્ષી બનવા તથા દર્શન-પ્રસાદનો લાભ લેવા ભાવભર્યું આમંત્રણ પાઠવવામાં આવ્યું છે.
વધુ સમાચાર વાંચવા માટે અંહી ક્લિક કરો
