Monsoon Rains Lash Gujarat: ગુજરાતમાં ચોમાસાએ ધમાકેદાર અને જોરદાર એન્ટ્રી કરી છે. છેલ્લા ૨૪ કલાક દરમિયાન રાજ્યના ૩૩ જિલ્લાના ૧૭૨ તાલુકાઓમાં મેઘરાજાએ ધબધબાટી બોલાવી દીધી છે. આ દરમિયાન સૌથી વધુ વરસાદ જૂનાગઢ જિલ્લાના માંગરોળમાં ૩૨૧ મિમી (આશરે ૧૨.૬ ઇંચ) નોંધાયો છે. ભારે વરસાદને કારણે રાજ્યના અનેક વિસ્તારોમાં જનજીવન પ્રભાવિત થયું છે, જ્યારે માર્ગ વ્યવસ્થા અને વીજ પુરવઠો ખોરવાયા છે.
Monsoon Rains Lash Gujarat: વરસાદના મુખ્ય આંકડા અને ડેમની સ્થિતિ
- છેલ્લા ૨૪ કલાકનો સરેરાશ વરસાદ: ૨૪.૧૭ મિમી
- સિઝનનો કુલ સરેરાશ વરસાદ: ૭૬.૯૨ મિમી (સિઝનના કુલ સરેરાશ સામે ૮.૪૬ ટકા વરસાદ)
- સરદાર સરોવર ડેમની સ્થિતિ: નર્મદા ડેમ ૬૩.૯૪ ટકા ભરાયો.
- જળાશયોની સ્થિતિ: રાજ્યના ૨૦૬ જળાશયોમાં કુલ ૩૬ ટકા પાણીનો સંગ્રહ થયો છે, જેમાંથી ૨ ડેમ હાઈ એલર્ટ પર અને ૭ ડેમ વોર્નિંગ પર છે.
Monsoon Rains Lash Gujarat: ક્યાં કેટલો વરસાદ નોંધાયો? (મુખ્ય વિસ્તારો)
- જૂનાગઢ: માંગરોળ – ૩૨૧ મિમી, કેશોદ – ૨૭૮ મિમી, માળીયા હાટીના – ૨૩૨ મિમી.
- ગીર સોમનાથ: સુત્રાપાડા – ૩૧૪ મિમી, પાટણ-વેરાવળ – ૨૫૬ મિમી.
- દક્ષિણ ગુજરાત: નવસારીના ચીખલીમાં ૨૦૪ મિમી, વલસાડમાં ૧૭૫ મિમી, ગણદેવીમાં ૧૬૯ મિમી, ડાંગમાં ૧૨૮ મિમી અને તાપીના ડોલવણમાં ૧૧૧ મિમી વરસાદ ખાબક્યો છે.
Monsoon Rains Lash Gujarat: ભારે વરસાદથી ૪૮ રસ્તાઓ બંધ: વાહનવ્યવહાર ખોરવાયો
પાણી ભરાવા, ઓવરટોપિંગ અને રસ્તા ધોવાઈ જવાના કારણે રાજ્યભરમાં કુલ ૪૮ માર્ગો વાહનવ્યવહાર માટે બંધ કરવામાં આવ્યા છે:
- નેશનલ હાઈવે: જામનગરમાં ૧ નેશનલ હાઈવે બંધ.
- સ્ટેટ હાઈવે: કુલ ૪ સ્ટેટ હાઈવે બંધ (ખેડામાં ૧ અને જૂનાગઢમાં ૩).
- પંચાયત હસ્તકના રસ્તા: કુલ ૩૬ માર્ગો બંધ, જેમાં સૌથી વધુ વલસાડમાં ૧૪ અને નવસારીમાં ૧૦ રસ્તા બંધ છે. આ ઉપરાંત જૂનાગઢમાં ૮ અને સુરત, જામનગર, અમરેલીમાં ૧-૧ માર્ગ બંધ છે.
Monsoon Rains Lash Gujarat: ૧૯૫૫ ગામોમાં વીજળી ગુલ, તંત્ર એલર્ટ પર
ભારે વરસાદ અને વાવાઝોડા જેવા માહોલને કારણે રાજ્યના ૧૯૫૫ ગામોમાં વીજ પુરવઠો ખોરવાયો છે, જેને પુનઃસ્થાપિત કરવા વીજ કંપનીઓ યુદ્ધના ધોરણે કામ કરી રહી છે.
જોકે, રાહતના સમાચાર એ છે કે રાજ્યમાં અત્યાર સુધી ક્યાંય સ્થળાંતર કરવાની જરૂર પડી નથી. તેમ છતાં, સંભવિત કટોકટીને પહોંચી વળવા માટે NDRFની ૯ ટીમ અને SDRFની ૨૪ પ્લાટૂન તૈનાત કરી દેવામાં આવી છે. દરિયો તોફાની બનવાની શક્યતા હોવાથી માછીમારોને ૩ જુલાઈથી ૬ જુલાઈ સુધી દરિયો ન ખેડવાની કડક સૂચના આપવામાં આવી છે.
વધુ સમાચાર વાંચવા માટે અંહી ક્લિક કરો: દારૂડિયા પુત્રથી કંટાળી માતા-પિતાએ જ એસિડ પીવડાવી ગળાટૂંપો દઈ પતાવી દીધો!
