Tragedy in Ahmedabad: અમદાવાદના પૂર્વ વિસ્તારમાં આવેલા ગરીબનગર ચાર રસ્તા પાસે મંગળવારે સાંજે એક અત્યંત ગમખ્વાર અને કાળજું કંપાવી મૂકે તેવો અકસ્માત સર્જાયો હતો. એક બેકાબૂ બનેલી લક્ઝુરિયસ ટાટા હેરિયર કારે રસ્તા પરથી પસાર થઈ રહેલા નિર્દોષ વાહનચાલકોને અડફેટે લીધા હતા. આ ગોઝારી ઘટનામાં એક ૧૬ વર્ષીય સગીરનું કમકમાટીભર્યું મોત નીપજ્યું છે, જ્યારે અન્ય ૬ જેટલા લોકો ગંભીર રીતે ઇજાગ્રસ્ત થયા છે. અકસ્માત એટલો ભયાનક હતો કે કારે એક રિક્ષા, ત્રણ એક્ટિવા અને એક બાઇકનો કચ્ચરઘાણ વાળી દીધો હતો અને અંતે નજીકની એક રેસ્ટોરન્ટમાં ઘૂસી ગઈ હતી. સમગ્ર ઘટનાના રૂવાડા ઊભા કરી દેતા સીસીટીવી (CCTV) ફૂટેજ પણ સામે આવ્યા છે.
Tragedy in Ahmedabad: ચાલકને અચાનક ખેંચ (આંચકી) આવતા સર્જાયો કાળમુખો અકસ્માત
પ્રાથમિક તપાસ અને પોલીસ માહિતી અનુસાર, અકસ્માત સર્જનાર ટાટા હેરિયર કારના ચાલક મયંકકુમાર દીપકભાઈ પટેલ (ઉંમર ૪૦ વર્ષ, રહે. શ્રદ્ધા બંગલો, વિરાટનગર રોડ, ઓઢવ) પોતાના પરિવાર સાથે મુસાફરી કરી રહ્યા હતા. કારમાં તેમની સાથે પત્ની ડિમ્પલબેન અને પુત્ર કર્મ પણ સવાર હતા. ગરીબનગર ચાર રસ્તા પાસેથી પસાર થતી વખતે કાર ચલાવી રહેલા મયંકભાઈને અચાનક મેડિકલ ઈમરજન્સીના કારણે ખેંચ (આંચકી) આવી ગઈ હતી. ખેંચ આવવાના કારણે તેમનો સ્ટિયરિંગ પરનો કાબૂ સંપૂર્ણપણે ગુમાવાયો હતો અને પગ એક્સિલેટર પર દબાઈ જતાં કાર સુસવાટા મારતી વાહનો સાથે અથડાવા લાગી હતી.
અકસ્માત બાદ ઘટનાસ્થળે ચીસાચીસ અને ભારે નાસભાગ મચી ગઈ હતી. સ્થાનિક લોકો તાત્કાલિક બચાવ કામગીરી માટે દોડી આવ્યા હતા. ઘટનાની જાણ થતાં જ એચ ડિવિઝન ટ્રાફિક પોલીસ અને ૧૦૮ એમ્બ્યુલન્સનો કાફલો ઘટનાસ્થળે પહોંચી ગયો હતો. ઇજાગ્રસ્તોને લોહીલુહાણ હાલતમાં નજીકની હોસ્પિટલમાં સારવાર અર્થે ખસેડાયા હતા. અકસ્માત સર્જનાર કારચાલક મયંક પટેલને પણ સારવાર માટે હોસ્પિટલમાં દાખલ કરવામાં આવ્યા છે.
Tragedy in Ahmedabad: સ્થાનિકોમાં ભારે રોષ: સ્પીડબ્રેકર બનાવવાની ઉગ્ર માંગ
આ ગમખ્વાર ઘટનાને પગલે ગરીબનગર ચાર રસ્તા પર મોટી સંખ્યામાં લોકોના ટોળેટોળાં એકત્ર થઈ ગયા હતા અને તંત્ર સામે રોષ ઠાલવ્યો હતો. સ્થાનિકોના જણાવ્યા મુજબ, આ ચાર રસ્તા પર અવારનવાર નાના-મોટા અકસ્માતો થતા રહે છે. તેથી વાહનોની ઝડપ પર નિયંત્રણ લાવવા માટે અહીં તાત્કાલિક અસરથી સ્પીડબ્રેકર (બમ્પ્સ) બનાવવામાં આવે તેવી ઉગ્ર માંગ ઉઠી છે.
વધુ સમાચાર વાંચવા માટે અંહી ક્લિક કરો
