NEET Paper Leak Scam: દેશમાં આગામી ૨૧ જૂને યોજાનારી NEET-UG ની ફરીથી પરીક્ષા (રી-એક્ઝામ) ની સુરક્ષા અને નિષ્પક્ષતા જાળવી રાખવા માટે ભારત સરકારે એક મોટો અને અભૂતપૂર્વ નિર્ણય લીધો છે. સરકારે ભારતમાં લોકપ્રિય મેસેજિંગ એપ ટેલિગ્રામ (Telegram) ના ઉપયોગ પર અસ્થાયી પ્રતિબંધ લાદવાનો આદેશ જારી કર્યો છે. નેશનલ ટેસ્ટિંગ એજન્સી (NTA) દ્વારા મંગળવારે એક સત્તાવાર પ્રેસ રિલીઝ જારી કરીને આ ચોંકાવનારી માહિતી આપવામાં આવી છે.
NEET Paper Leak Scam: IT એક્ટની કલમ 69A હેઠળ લેવાયો નિર્ણય
NTAના જણાવ્યા અનુસાર, ઇલેક્ટ્રોનિક્સ અને સૂચના પ્રૌદ્યોગિકી મંત્રાલય (MeitY) એ સૂચના પ્રૌદ્યોગિકી કાયદો (IT Act), ૨૦૦૦ ની કલમ ૬૯A હેઠળ ટેલિગ્રામ પર આ પ્રતિબંધ લગાવ્યો છે. આ પ્લેટફોર્મ-સ્તરીય પ્રતિબંધ ૨૨ જૂન ૨૦૨૬ સુધી ભારતમાં અમલી રહેશે. આ ઉપરાંત, ટેલિગ્રામના ‘મેસેજ એડિટ ફીચર’ પર પણ ૩૦ જૂન સુધી રોક લગાવી દેવામાં આવી છે. એટલે કે, ભારતમાં યુઝર્સ પહેલાથી મોકલેલા મેસેજને એડિટ કરી શકશે નહીં.
NEET Paper Leak Scam: એડિટ ફીચરથી રચાતું હતું ‘નકલી પેપર લીક’નું ષડયંત્ર
NTA એ ખુલાસો કર્યો છે કે કેટલાક તત્વો ટેલિગ્રામના એડિટ ફીચરનો દુરુપયોગ કરીને પરીક્ષાના પેપર લીક થયાના નકલી પુરાવા ઊભા કરતા હતા. આ ફીચરની મદદથી પરીક્ષા પૂરી થયા પછી જૂના મેસેજમાં પ્રશ્નપત્રની ફાઇલ ઉમેરી દેવામાં આવતી હતી, જેથી એવું દેખાય કે પેપર પરીક્ષા પહેલાં જ લીક થઈ ગયું હતું. આ પ્રકારની અફવાઓ અને ડિજિટલ છેતરપિંડી રોકવા માટે આ આકરો નિર્ણય અંતિમ વિકલ્પ તરીકે લેવાયો છે.
NEET Paper Leak Scam: NTAની પ્રેસ રિલીઝની મુખ્ય બાબતો:
- I4C દ્વારા ચેનલો બંધ કરાઈ: ગૃહ મંત્રાલય હેઠળ કાર્યરત ભારતીય સાયબર અપરાધ સમન્વય કેન્દ્ર (I4C) એ NTA અને રાજ્ય પોલીસના ઇનપુટ્સના આધારે ગેરમાર્ગે દોરતી અસંખ્ય ટેલિગ્રામ ચેનલો, ગ્રુપ્સ અને બોટ્સને ડિલીટ કરી દીધા છે.
- પેપર લીકના નામે લાખોની ઠગાઈ: ટેલિગ્રામ પર “PAPER LEAKED NEET”, “Re-NEET 2026” અને “NEET MAFIA” જેવા નામોથી ફેક ચેનલો ચલાવીને પરીક્ષાર્થીઓ અને વાલીઓ પાસેથી હજારો અને લાખો રૂપિયા પડાવવામાં આવી રહ્યા હતા.
- સામાન્ય યુઝર્સની અસુવિધા બદલ ખેદ: NTA એ સ્વીકાર્યું છે કે આ પ્રતિબંધથી અભ્યાસ, નોકરી કે અંગત કામ માટે ટેલિગ્રામ વાપરતા લાખો સામાન્ય લોકોને મુશ્કેલી પડશે, પરંતુ પરીક્ષાની પવિત્રતા માટે આ અસ્થાયી પગલું અનિવાર્ય હતું.
NEET Paper Leak Scam: ગુજરાત અને બિહારમાં પોલીસ એક્શન: અમદાવાદ ક્રાઇમ બ્રાન્ચને મોટી સફળતા
આ આંતરરાજ્ય સાયબર છેતરપિંડીના નેટવર્ક વિરૂદ્ધ બિહાર અને ગુજરાત પોલીસે પણ સપાટો બોલાવ્યો છે. અમદાવાદ સાયબર ક્રાઇમ બ્રાન્ચે અલગ-અલગ રાજ્યોમાં ઓપરેશન પાર પાડીને ૩ મુખ્ય સાયબર ઠગોની ધરપકડ કરી છે:
૧. સુમેરસિંગ મીણા (રહે. રાજસ્થાન) – ટેલિગ્રામ પર ચેનલો બનાવી પેપર વેચવાનો ધંધો કરતો હતો. ૨. આકાશ મીણા (રહે. રાજસ્થાન) – ટેલિગ્રામ ચેનલો દ્વારા છેતરપિંડીમાં સામેલ. ૩. નવીન યાદવ (રહે. બિહાર) – પરીક્ષા ફીના રિફંડના નામે ઓનલાઇન ઠગાઈ કરતો હતો.
૨૧.૫ કરોડના ટ્રાન્જેક્શનનો પર્દાફાશ
અમદાવાદ સાયબર ક્રાઇમ બ્રાન્ચની તપાસમાં બહાર આવ્યું છે કે આ ગેંગે ૧ હજારથી વધુ વિદ્યાર્થીઓ અને વાલીઓનો સંપર્ક કરી રી-નીટના પેપરની લાલચ આપી પૈસા પડાવ્યા હતા. ગેમિંગ વેબસાઇટના નકલી બેંક ખાતાઓનો ઉપયોગ કરીને આ ગેંગે આશરે ૨૧.૫ કરોડ રૂપિયાના વ્યવહારો (ટ્રાન્જેક્શન) કર્યા હોવાનું ખુલ્યું છે, જેમાંથી ૧.૫૦ કરોડનો સીધો ખેલ પકડાયો છે.
૨૧ જૂને રી-એક્ઝામ: નિયમો અને સમયમાં ફેરફાર
પેપર લીક વિવાદ બાદ રદ થયેલી NEET UG 2026 ની પરીક્ષા ૨૧ જૂને પોતાના નિર્ધારિત સમયે જ યોજાશે. NTA એ આ વખતે પરીક્ષા પદ્ધતિમાં મહત્વના ફેરફાર કર્યા છે:
- સમયમાં વધારો: પરીક્ષાનો સમય હવે ૧૮૦ મિનિટ (૩ કલાક) થી વધારીને ૧૯૫ મિનિટ (૩ કલાક અને ૧૫ મિનિટ) કરવામાં આવ્યો છે.
- રફ વર્ક માટે વધુ જગ્યા: વિદ્યાર્થીઓની સુવિધા માટે આન્સર શીટમાં રફ વર્ક કરવા માટેની જગ્યા પણ વધારી દેવામાં આવી છે.
NTAની અપીલ: એજન્સીએ વિદ્યાર્થીઓ અને વાલીઓને સોશિયલ મીડિયાની અપ્રમાણિત અફવાઓ પર વિશ્વાસ ન કરવા અને માત્ર સત્તાવાર વેબસાઇટ પર જ નજર રાખવા જણાવ્યું છે. જો કોઈ આવી છેતરપિંડીનો પ્રયાસ કરે તો તુરંત જ રાષ્ટ્રીય સાયબર અપરાધ હેલ્પલાઇન નંબર 1930 પર જાણ કરવી.
વધુ સમાચાર વાંચવા માટે અંહી ક્લિક કરો
સાયબર ગુનેગાર જેલના સળિયા પાછળ, સોનગઢ પોલીસ મથકનો વોન્ટેડ આરોપી યાસિર શેખ વ્યારાથી દબોચાયો
