Assault in Bhavnagar: ભાવનગર તાલુકાના કોબડી ગામે કૌટુંબિક અને સામાજિક વિવાદમાં લોહિયાળ હુમલો થવાની ચોંકાવનારી ઘટના સામે આવી છે. ભાઈની સગાઈ (વેવિશાળ) તૂટી જવાની દાજ રાખીને એક મહિલા સહિત ચાર ઈસમોએ હથિયારો સાથે ઘરમાં ઘૂસી દંપતી અને તેમની પુત્રી પર લાકડી તથા ધોકા વડે નિર્મમ હુમલો કર્યો હતો. આ હિંસક હુમલામાં આખા પરિવારને ગંભીર ઈજાઓ પહોંચી છે, જે અંગે વરતેજ પોલીસ મથકમાં ગુનો નોંધાયો છે.
Assault in Bhavnagar: સગાઈ તૂટતાં અદાવત રાખી હુમલો કર્યો
મળતી વિગતો મુજબ, મૂળ નવા રતનપર ગામના વતની અને હાલ કોબડી ગામે રહેતા ભાનુબેન ગોરધનભાઈ વેગડના ભાઈ લાલજીભાઈની સગાઈ ક.પરા ખાતે થઈ હતી. કોઈ કારણોસર આ સગાઈ તૂટી ગઈ હતી. સગાઈ તૂટી જતાં સામા પક્ષે ભારે અદાવત રાખી હતી. આ જ આક્રોશમાં ગોપાલ, હાર્દિક, અનીતાબેન અને ચિરાગ નામના ચાર શખ્સો બે મોટરસાયકલ પર સવાર થઈને હથિયારો સાથે ભાનુબેનના ઘરે ધસી આવ્યા હતા.
Assault in Bhavnagar: પરિવાર બચાવવા વચ્ચે પડ્યો તો ધોકાવાળી કરી
ઘરે આવીને આ ચારેય શખ્સોએ અચાનક ગાળો ભાંડી હુમલો કરી દીધો હતો. હુમલાખોર ગોપાલે ભાનુબેનને માથાના ભાગે લાકડીનો ફટકો મારી લોહીલુહાણ કરી દીધા હતા. પત્નીને બચાવવા માટે જ્યારે પતિ ગોરધનભાઈ વચ્ચે પડ્યા, ત્યારે હાર્દિક ઉર્ફે ભોલાએ લાકડાના ધોકાનો આકરો ઘા ઝીંકી તેમને પણ ઈજા પહોંચાડી હતી. આટલેથી ન અટકતા, નરાધમોએ તેમની દીકરી રવિનાબેનને પણ લાકડીઓ વડે બેરહેમીથી ફટકારી હતી અને સમગ્ર પરિવારને જાનથી મારી નાખવાની ધમકી આપી ફરાર થઈ ગયા હતા.
Assault in Bhavnagar: વરતેજ પોલીસ મથકે ગુનો દાખલ
આ હિંસક બનાવને પગલે સમગ્ર પંથકમાં ચકચાર મચી ગઈ છે. ભોગ બનનાર ભાનુબેન વેગડે આ મામલે વરતેજ પોલીસ મથકમાં એક મહિલા સહિત ચારેય હુમલાખોરો વિરુદ્ધ નામજોગ ફરિયાદ નોંધાવી છે. પોલીસે ગુનો નોંધીને ફરાર આરોપીઓને ઝડપી પાડવા માટે ચક્રો ગતિમાન કર્યા છે.
વધુ સમાચાર વાંચવા માટે અંહી ક્લિક કરો
ગોલ્ડ સ્મગલિંગની સુપર મોડસ ઓપરેન્ડી, વિમાનના શૌચાલયમાં કાળી ટેપમાં છુપાવેલા ૨૪ સોનાના બિસ્કિટ જપ્ત.
