OPERATION MULE HUNT 2.0: ગુજરાતમાં સાયબર ક્રાઇમની પ્રવૃત્તિઓ આચરતા તત્વો સામે પાટણ પોલીસે લાલ આંખ કરી છે. પાટણ સાયબર ક્રાઇમ પોલીસ મથક દ્વારા હાથ ધરવામાં આવેલા ખાસ ‘ઓપરેશન મ્યુલ Hunt 2.0’ અંતર્ગત દેશવ્યાપી નેટવર્ક ધરાવતા રૂપિયા 398 કરોડના બહુચર્ચિત સાઇબર ક્રાઈમ ફ્રોડ રેકેટનો પર્દાફાશ કરવામાં આવ્યો છે. આ કૌભાંડના તાર પાટણ જિલ્લાની હારીજ નાગરિક સહકારી બેંક લિમિટેડ સાથે જોડાયેલા હોવાનું સામે આવ્યું છે.
OPERATION MULE HUNT 2.0: બેંક ખાતાઓમાં શંકાસ્પદ વ્યવહારો થતા ભાંડો ફૂટ્યો
મળતી માહિતી અનુસાર, હારીજ નાગરિક સહકારી બેંકની હારીજ શાખામાં ખોલાવવામાં આવેલા કેટલાક બેંક ખાતાઓમાં ટૂંકા સમયમાં કરોડો રૂપિયાના શંકાસ્પદ અને અસામાન્ય નાણાકીય વ્યવહારો (ટ્રાન્ઝેક્શન) થતા પોલીસ તંત્ર એલર્ટ થયું હતું. આ ખાતાઓ અંગે તપાસ કરતા માલૂમ પડ્યું હતું કે, આ એકાઉન્ટ્સ બાબતે દેશના જુદા-જુદા રાજ્યોમાંથી સાયબર ફ્રોડની અનેક ફરિયાદો ઓનલાઇન પોર્ટલ પર નોંધાઈ ચૂકી હતી. જેના આધારે પાટણ સાયબર ક્રાઇમની ટીમે ટેકનિકલ એનાલિસિસની મદદથી ઊંડાણપૂર્વકની તપાસ હાથ ધરી હતી.
OPERATION MULE HUNT 2.0: લોભ-લાલચ આપી બનાવાતા હતા ‘મ્યુલ એકાઉન્ટ્સ’
પોલીસ તપાસમાં આ સાયબર ઠગોની ચોંકાવનારી મોડસ ઓપરેન્ડી સામે આવી છે. આ ટોળકી સામાન્ય કે મધ્યમ વર્ગના લોકોને રોકડ રકમ, આકર્ષક કમિશન અથવા માસિક ફિક્સ ભાડું આપવાની લાલચ આપી તેમના નામે બેંકમાં ખાતાઓ ખોલાવતી હતી. આ પ્રકારના ખાતાઓને સાયબર ક્રાઇમની ભાષામાં ‘મ્યુલ એકાઉન્ટ્સ’ કહેવામાં આવે છે. આ કૌભાંડમાં કુલ આવા 13 જેટલા મ્યુલ એકાઉન્ટ્સનો ઉપયોગ કરવામાં આવ્યો હતો, જેમાંથી ટૂંકા ગાળામાં જ રૂપિયા 398 કરોડ જેવા ગેરકાયદેસર અને કાળા નાણાંની હેરફેર કરવામાં આવી હતી.
ઓનલાઇન જુગાર અને સટ્ટાબાજીનું કનેક્શન
પોલીસના જણાવ્યા અનુસાર, દેશભરના ભોગ બનનારા લોકો પાસેથી સાયબર ફ્રોડ, ઓનલાઇન જુગાર (Gambling) અને ક્રિકેટ સટ્ટા જેવી ગેરકાયદેસર અને ગુનાહિત પ્રવૃત્તિઓ કરાવીને કરોડો રૂપિયા પડાવવામાં આવતા હતા. આ ગુનાહિત કમાણી સગેવગે કરવા માટે હારીજની બેંકના આ 13 ખાતાઓનો ઉપયોગ મુખ્ય રૂટ તરીકે કરવામાં આવતો હતો.
14 સાયબર ઠગો જેલભેગા, 6 ની શોધખોળ ચાલુ
પાટણ સાયબર ક્રાઇમ પોલીસે આ ઓપરેશન અંતર્ગત કાયદેસરની કાર્યવાહી કરીને આ આખા રેકેટનું સંચાલન કરતા અને કમિશન પર ખાતા મેળવતા 14 જેટલા સાયબર આરોપીઓને ઝડપી લીધા છે. પકડાયેલા આરોપીઓની પૂછપરછમાં અન્ય કેટલાક મોટા માથાઓના નામ પણ સામે આવ્યા છે. આ ગુનામાં સીધી કે આડકતરી રીતે સંડોવાયેલા અન્ય 6 ફરાર ઈસમોને પકડવા માટે પોલીસે અલગ-અલગ ટીમો બનાવીને તજવીજ હાથ ધરી છે. આ નેટવર્ક આંતરરાષ્ટ્રીય સ્તરે જોડાયેલું છે કે કેમ તે દિશામાં પણ પોલીસે તપાસના ચક્રો ગતિમાન કર્યા છે.
આ પણ વાંચો :3 મહિનાથી પગાર ન મળતા આશા વર્કરોનો હલ્લાબોલ, ‘તેલનો ડબ્બો પણ નથી આવતો’ કહી ઉગ્ર આંદોલનની ચીમકી
