Gujarat Rajya Sabha Polls: ગુજરાતમાં આગામી સમયમાં યોજાનારી રાજ્યસભાની 4 સીટો માટે સત્તાધારી પક્ષ ભાજપ (BJP) દ્વારા પોતાના ઉમેદવારોના નામોની સત્તાવાર જાહેરાત કરી દેવામાં આવી છે. આ યાદીમાં પ્રાદેશિક સંતુલન જાળવતા સૌરાષ્ટ્રમાંથી બે અને ઉત્તર તથા મધ્ય ગુજરાતમાંથી એક-એક ચહેરાને તક આપવામાં આવી છે. ઉમેદવારોના નામ જાહેર થતાં જ ભાજપે પોતાની રાજકીય વ્યૂહરચના તેજ કરી દીધી છે.
Gujarat Rajya Sabha Polls: મુખ્યમંત્રી નિવાસ્થાને હાઈલેવલ બેઠક, ધારાસભ્યોને આદેશ
ચૂંટણીલક્ષી આયોજન માટે મુખ્યમંત્રીના ગાંધીનગર સ્થિત નિવાસસ્થાને એક મહત્વપૂર્ણ બેઠક યોજાવા જઈ રહી છે. આ બેઠકમાં ભાજપ પ્રદેશ અધ્યક્ષ જગદીશ વિશ્વકર્મા પણ ખાસ ઉપસ્થિત રહેશે, જેમાં ચૂંટણીની વ્યુહરચના અને આયોજન અંગે ચર્ચા થશે. આ દરમિયાન પક્ષ દ્વારા ભાજપના તમામ ધારાસભ્યોને હાલ ગાંધીનગર નહીં છોડવા માટે કડક સૂચના આપવામાં આવી છે.
Gujarat Rajya Sabha Polls: ચૂંટણીનું ટાઈમલાઈન અને રાજકીય ગણિત
- ફોર્મ ભરવાની તારીખ: સોમવાર, 8 જૂન ના રોજ તમામ ચારેય ઉમેદવારો વિજય મુહૂર્તમાં પોતાના ઉમેદવારી પત્રો દાખલ કરશે.
- મતદાનની તારીખ: 18 જૂન ના રોજ મતદાન પ્રક્રિયા હાથ ધરાશે.
વિધાનસભાનું સંખ્યાબળ: ગુજરાત વિધાનસભામાં હાલ ભાજપ પાસે 161 ધારાસભ્યોનું પ્રચંડ બહુમત છે, જ્યારે વિપક્ષ કોંગ્રેસ પાસે માત્ર 12 ધારાસભ્યો જ છે. આ આંકડાકીય સમીકરણો જોતાં ચૂંટણીનું ગણિત સંપૂર્ણપણે ભાજપના પક્ષમાં છે અને આ ચારેય બેઠકો પર ભાજપના ઉમેદવારો બિનહરીફ ચૂંટાઈ આવે તેવી પૂરેપૂરી શક્યતા છે.
Gujarat Rajya Sabha Polls: જાણો કોણ છે આ ઉમેદવારો? (પ્રોફાઈલ હાઈલાઈટ્સ)
ભાજપે આ વખતે સંગઠન અને પાયાના કાર્યકરોને મહત્વ આપ્યું છે, જેમાં બે ચહેરાઓ વિશેની વિશેષ વિગતો આ મુજબ છે:
- જીતેન્દ્ર કણઝારીયા: તેઓ સૌરાષ્ટ્રના જાણીતા પૂર્વ ધારાસભ્ય મેઘજી કણઝારીયાના પુત્ર છે. પિતાના રાજકીય વારસા અને સંગઠનમાં તેમની મજબૂત પકડને ધ્યાને રાખીને ભાજપે તેમને રાજ્યસભાની ટિકિટ આપી છે.
- રાજુ શુક્લ: ભૂતકાળમાં સક્રિય પત્રકારત્વ સાથે સંકળાયેલા રાજુ શુક્લના નામની જાહેરાત આશ્ચર્યજનક રહી છે. નોંધનીય છે કે, હજુ એક મહિના પહેલાં જ તેમણે બાયપાસ સર્જરી કરાવી છે, છતાં પક્ષે તેમના સમર્પણને ધ્યાનમાં રાખીને સંસદના ઉચ્ચ ગૃહ માટે પસંદ કર્યા છે.
રાજકીય વિશ્લેષકોના મતે: ભાજપે આ ઉમેદવારી દ્વારા સાબિત કર્યું છે કે પક્ષ આગામી સમય માટે જ્ઞાતિગત અને ભૌગોલિક સમીકરણો સાધવા સક્ષમ છે. વિપક્ષ પાસે પૂરતું સંખ્યાબળ ન હોવાથી સોમવારે ફોર્મ ભરાયા બાદ ચિત્ર સંપૂર્ણ સ્પષ્ટ થઈ જશે.
વધુ સમાચાર વાંચવા માટે અંહી ક્લિક કરો
