Water Crisis in Vadodara: સ્માર્ટ સિટી વડોદરાના પૂર્વ વિસ્તારમાં આવેલી અનેક સોસાયટીઓમાં પાણીની સમસ્યા દિવસેને દિવસે વધુ વિકરાળ બની રહી છે. ઉનાળાની કાળઝાળ ગરમી વચ્ચે પૂરતા પ્રમાણમાં અને શુદ્ધ પાણી ન મળતા આજે નાગરિકોના ધીરજની કૂડી તૂટી હતી. પાણીની તીવ્ર અછતથી પરેશાન સ્થાનિક રહીશોએ આજે વોર્ડ નંબર-૪ ની કચેરી ખાતે એકઠા થઈને તંત્ર સામે ભારે હોબાળો મચાવ્યો હતો અને ઉગ્ર સૂત્રોચ્ચાર કર્યા હતા.
Water Crisis in Vadodara: નવી લાઇનનું કામ ધીમું, કોર્પોરેશન ટેન્કરના ભરોસે
પૂર્વ વિસ્તારમાં પાણીનો પુરવઠો વધારવા માટે આજવા ખાતેથી નવી લાઇન જોડાણની કામગીરી હાથ ધરવામાં આવી છે, પરંતુ તંત્રની આ કામગીરી અત્યંત કાચબા ગતિએ ચાલી રહી છે. પરિણામે, હજુ પણ અનેક વિસ્તારોમાં પાણી માટે લોકો વલખાં મારી રહ્યા છે. સ્થિતિ એટલી હદે વણસી છે કે વડોદરા મ્યુનિસિપલ કોર્પોરેશન (VMC) ને મોટાભાગના વિસ્તારોમાં ટેન્કર મારફતે પાણી વિતરણ કરવાની ફરજ પડી રહી છે.
Water Crisis in Vadodara: સોસાયટીના ૩૦૦ મકાનો પ્રેશર વગરના પાણીથી પરેશાન
વોર્ડ કચેરીએ રજૂઆત કરવા પહોંચેલા ખોડીયારનગર વિસ્તારમાં આવેલી કૃષ્ણા નગર વિભાગ-૨ સોસાયટીના રહીશોએ તંત્ર પર આકરા આક્ષેપો કર્યા હતા. સ્થાનિકોના જણાવ્યા મુજબ:
- સોસાયટીના ૩૦૦ મકાનોમાં છેલ્લા ચાર મહિનાથી પૂરતા પ્રમાણમાં પાણી મળતું નથી.
- પાણી એટલા નીચા પ્રેશરથી આવે છે કે ઘરો સુધી યોગ્ય રીતે પહોંચી જ શકતું નથી.
- કોર્પોરેશન જે ટેન્કરો મોકલે છે, તેનાથી સમસ્યાનો કોઈ કાયમી ઉકેલ આવતો નથી.
- લોકોને નાછૂટકે પીવાના પાણી માટે બજારમાંથી મોંઘા ભાવના પાણીના જગ ખરીદવાની ફરજ પડી રહી છે.
Water Crisis in Vadodara: કમિશનરને ઘેરવાની ચીમકી:
રહીશોએ આક્રોશ સાથે જણાવ્યું હતું કે, આ અગાઉ પણ અનેક વખત વોર્ડ કચેરીમાં લેખિત અને મૌખિક રજૂઆતો કરવામાં આવી છે, પરંતુ આ બહેરા તંત્રના પેટનું પાણી હલતું નથી. ઉચ્ચ અધિકારીઓ પણ લોકોની ફરિયાદો સાંભળવા તૈયાર નથી. જો આગામી દિવસોમાં આ સમસ્યાનો નક્કર ઉકેલ નહીં આવે, તો રહીશોએ સીધા મ્યુનિસિપલ કમિશનરને રૂબરૂ મળીને ઉગ્ર રજૂઆત કરવાની ચીમકી ઉચ્ચારી છે.
વધુ સમાચાર વાંચવા માટે અંહી ક્લિક કરો
