Jamnagar Property Dispute: જામનગરમાં મિલકતના ભાગ અને કોર્ટ મેટરના મનદુઃખને લઈને પરિવારજનો વચ્ચેનો વિવાદ ઉગ્ર બન્યો છે. શહેરના ખોજાવાડ વિસ્તારમાં રહેતા એક એડવોકેટ પર તેમના જ સગી બહેન અને ભાણેજે લાકડાના ધોકા વડે હુમલો કરી, જાનથી મારી નાખવાની ધમકી આપી હોવાની ચોંકાવનારી ઘટના સામે આવી છે. આ મામલે વકીલે પોલીસ મથકમાં ફરિયાદ નોંધાવતા પોલીસે વધુ તપાસ હાથ ધરી છે.
Jamnagar Property Dispute: શું છે સમગ્ર વિવાદ?
પોલીસ ફરિયાદમાં સામે આવેલી વિગતો મુજબ, આ વિવાદ એક સંયુક્ત જમીનના કેસને લઈને શરૂ થયો હતો:
- મુખ્ય વિવાદ: બેડ ગામે આવેલી આશરે 25 વીઘા સંયુક્ત જમીન બાબતે પરિવાર વચ્ચે ચીફ કોર્ટમાં કેસ ચાલી રહ્યો છે.
- સોગંદનામું બન્યું કારણ: આ કેસમાં પરિવારના જ સભ્ય કુલસમબેને એડવોકેટ યાકુબભાઈના પક્ષમાં સોગંદનામું આપ્યું હતું. આ સોગંદનામું કોર્ટમાં રજૂ ન કરવા માટે અન્ય સભ્યો દબાણ કરી રહ્યા હતા.
Jamnagar Property Dispute: કેવી રીતે બની ઘટના?
ખોજાવાડ વિસ્તારમાં રહેતા અને વ્યવસાયે વકીલ એવા યાકુબભાઈ યુસુફભાઈ જુમાણી ગત તા. 22 એપ્રિલ 2026ના રોજ રાત્રે પોતાના ઘરે પહોંચ્યા ત્યારે આ હિંસક ઘટના ઘટી હતી:
- બોલાચાલીની શરૂઆત: યાકુબભાઈ ઘરે આવ્યા ત્યારે તેમના ભાણેજ મુસ્તાક સુલેમાન મૈણએ કુલસમબેન વાળા સોગંદનામાને કોર્ટમાં રજૂ ન કરવા બાબતે દલીલો શરૂ કરી હતી.
- ધોકા વડે હુમલો: વાતચીત ઉગ્ર બનતા મુસ્તાક ઉશ્કેરાઈ ગયો હતો અને ઘરની અંદરથી લાકડાનો ધોકો લઈ આવ્યો હતો. આ દરમિયાન યાકુબભાઈની સગી બહેન રોશનબેન પણ ત્યાં ધસી આવ્યા હતા.
- મામાને પકડીને માર માર્યો: આક્ષેપ મુજબ, બહેન રોશનબેને ભાઈ યાકુબભાઈને પકડી રાખ્યા હતા અને ભાણેજ મુસ્તાકે તેમના વાંસાના ભાગે લાકડાના ધોકાના આડેધડ ઘા ઝીંકી દીધા હતા.
વચ્ચે પડનારને પણ ન છોડ્યા: બૂમાબૂમ થતાં યાકુબભાઈના પત્ની હલીમાબેન અને બહેન કુલસમબેન તેમને બચાવવા વચ્ચે પડ્યા હતા, પરંતુ આરોપીઓએ તેમની સાથે પણ ગાળાગાળી કરી બિભત્સ વર્તન કર્યું હતું. અંતે આસપાસના લોકો એકઠા થઈ જતાં મામલો થાળે પડ્યો હતો.
Jamnagar Property Dispute: હોસ્પિટલ અને પોલીસ ફરિયાદ
હુમલા બાદ જતા-જતા ભાણેજ મુસ્તાકે ધમકી આપી હતી કે, “જો આ સોગંદનામું કોર્ટમાં રજૂ કરશો તો અહીં રહેવા નહીં દઈએ અને જાનથી મારી નાખીશું.”
ઇજાગ્રસ્ત એડવોકેટ યાકુબભાઈને તાત્કાલિક સારવાર માટે જામનગરની જી.જી. હોસ્પિટલ ખસેડવામાં આવ્યા હતા. આ મામલે વકીલે પોતાના જ સગા ભાણેજ મુસ્તાક અને બહેન રોશનબેન સામે પોલીસ ફરિયાદ નોંધાવી છે. પોલીસે ગુનો નોંધીને કાયદેસરની કાર્યવાહી સાથે વધુ તપાસ હાથ ધરી છે.
વધુ સમાચાર વાંચવા માટે અંહી ક્લિક કરો
