પલસાણા/સુરત:
Suspicious Death in Palsana: સુરત ગ્રામ્યના પલસાણા તાલુકાના બગુમરા ગામે આવેલી એક સોસાયટીના ફ્લેટમાંથી ૨૨ વર્ષીય યુવતીની શંકાસ્પદ હાલતમાં લાશ મળી આવતા સમગ્ર પંથકમાં ભારે ચકચાર મચી ગઈ છે. યુવતીનો મૃતદેહ અર્ધનગ્ન હાલતમાં મળ્યો છે અને તેની સાથે લિવ-ઇન રિલેશનશિપમાં રહેતો યુવક રહસ્યમય રીતે ફરાર થઈ ગયો છે. ઘટનાની ગંભીરતાને જોતાં સ્થાનિક પલસાણા પોલીસ સહિત એલસીબી (LCB)નો ઉચ્ચ કાફલો તાત્કાલિક ઘટનાસ્થળે દોડી ગયો હતો અને તપાસનો ધમધમાટ શરૂ કર્યો છે.
Suspicious Death in Palsana: કંટ્રોલ રૂમને મળ્યો હતો ‘આત્મહત્યા’નો મેસેજ, પણ પોલીસ પહોંચી તો દ્રશ્ય અલગ હતું
પ્રાપ્ત વિગતો અનુસાર, પલસાણાના બગુમરા ખાતે આવેલી મહાદેવ પેલેસ સોસાયટીના ફ્લેટ નંબર ૫૦૬માં એક યુવતીએ આત્મહત્યા કરી હોવાનો મેસેજ સવારે આશરે ૯:૦૦ વાગ્યે પોલીસ કંટ્રોલ રૂમને મળ્યો હતો. આ માહિતીના આધારે જ્યારે પોલીસ ઘટનાસ્થળે પહોંચી ત્યારે રૂમનું દ્રશ્ય જોઈને ચોંકી ઉઠી હતી. મૃતક યુવતીની ઓળખ મેહવિશ ખાતૂન (ઉંમર ૨૨ વર્ષ, પિતાનું નામ: અફઝલ અલી) તરીકે થઈ છે.
Suspicious Death in Palsana: ઘટનાસ્થળેથી આપત્તિજનક સામગ્રી મળી, દુષ્કર્મ બાદ હત્યાની પ્રબળ આશંકા
સૂત્રો પાસેથી મળતી માહિતી મુજબ, મેહવિશ ખાતૂનનો મૃતદેહ ફ્લેટમાંથી અર્ધનગ્ન અને અત્યંત ગંભીર હાલતમાં મળી આવ્યો હતો. એટલું જ નહીં, ઘટનાસ્થળેથી પોલીસને કેટલીક આપત્તિજનક સામગ્રી પણ હાથ લાગી છે. આ સંજોગોને જોતાં પોલીસને શંકા છે કે યુવતી સાથે કોઈ અજુગતું કૃત્ય અથવા દુષ્કર્મ આચરવામાં આવ્યું હોઈ શકે છે અને ત્યારબાદ પુરાવાનો નાશ કરવા અથવા પકડાઈ જવાના ડરે તેની નિર્મમ હત્યા કરી દેવાઈ છે.
મેહવિશ સાથે આ જ ફ્લેટમાં લિવ-ઇન પાર્ટનર તરીકે રહેતો શિવમ નામનો યુવક ઘટના બાદથી જ ગાયબ છે, જેના કારણે પોલીસની શંકા વધુ મજબૂત બની રહી છે.
Suspicious Death in Palsana: પીએમ (Post-Mortem) રિપોર્ટ બાદ જ ખૂલશે મોતનું રહસ્ય
આ ચકચારી કેસ અંગે પલસાણા પોલીસ મથકના પીઆઈ બી.ડી. ઝીલરીયાએ જણાવ્યું હતું કે:
“સવારે ૯ વાગ્યે મહાદેવ પેલેસના ફ્લેટમાંથી આત્મહત્યા અંગેનો કોલ મળ્યો હતો. ઘટનાસ્થળે તપાસ કરતાં મૃતક યુવતી મેહવિશ ખાતૂન હોવાનું બહાર આવ્યું છે. હાલ મૃતદેહને પોસ્ટમોર્ટમ માટે સિવિલ હોસ્પિટલ ખસેડવામાં આવ્યો છે. પીએમ રિપોર્ટ આવ્યા બાદ જ મોતનું સાચું કારણ અને આ આત્મહત્યા છે કે હત્યા, તે અંગેનું ચિત્ર સ્પષ્ટ થશે.”
ફરાર પાર્ટનરને પકડવા ચક્રો ગતિમાન
હાલ સુરત ગ્રામ્ય પોલીસ અને એલસીબી દ્વારા ફરાર થઈ ગયેલા લિવ-ઇન પાર્ટનર શિવમની શોધખોળ માટે અલગ-અલગ ટીમો બનાવવામાં આવી છે. આસપાસના સીસીટીવી (CCTV) ફૂટેજ અને મોબાઈલ લોકેશનના આધારે તેને દબોચી લેવા વિવિધ દિશાઓમાં સઘન તપાસ શરૂ કરાઈ છે. પોસ્ટમોર્ટમ રિપોર્ટ અને શિવમની ધરપકડ બાદ જ આ રહસ્યમય મોત પરથી પડદો ઊંચકાશે.
વધુ સમાચાર વાંચવા માટે અંહી ક્લિક કરો: ગમખ્વાર અકસ્માત: રણુજાથી દર્શન કરી પરત ફરતાં બનાસકાંઠાના ચૌધરી પરિવારના 3ના મોત, 3 ઈજાગ્રસ્ત
